ROOM DIM 1

1Man Paul on a Yesu Kiristo tumtum, ka Wina'am buol m ye m a Yesu Kiristo Tumtum la, ka gaŋi m tum ye m mool o labasuŋ la, sobid ne'. 2Wina'am da deŋim zi'el noor labasuŋ la yela, ka li yi o nodi'esidib sa'an, line sob Wina'am gbauŋin, 3ka ane Wina'am Biig ti Zugsob Yesu Kiristo la yela. Ti ya'a ten'es on a ninsaal la yela, ti mi' ye o ane David yaaŋ. 4Ka ti ya'a ten'es on a Wina'am ka a su'um nyain la yela, ti nye ka Wina'am vu'ug o kumin, ka ala ka o pa'al ne paŋ ye o ane o Biig. 5Wina'am tis mam o popielim piini n ke ka m aa o Tumtum ka li yi ne ti Zugsob Yesu Kiristo la ni na, ye m ke ka dunia buudi wusa niŋ o yadda ka siak o noor, ti Zugsob yu'ur zug. 6Ka yanam meŋ bane ka Wina'am gaŋi ya ye ya aa Yesu Kiristo nidib la, me pa'asi ani. 7M sobid gbauŋ kaŋa n tisid yanam bane wusa be Room teŋin ka Wina'am noŋi ya ka gaŋi ya ye ya aa o meŋ nidib gullim la. Ti Ba' Wina'am ne ti Zugsob Yesu Kiristo la na tisi ya yelsum ne sumalisim. 8Yiiga daan m pu'us Wina'am bareka Yesu Kiristo ni, ya wusa zug, ka me pu'us o dunia wusa wum ya yadda niŋir labaar la zug, 9ka yiti tiendi ya yela m pu'usugin saŋa wusa. Wina'am on ka m tum o tuuma ne m ya'am wusa n moon labasuŋ o Biig la yela la, mi' ye man yel si'el la ane sida. 10M sos Wina'am ye o boodim na yu'un ke ka m nyaŋe kena n kaae ya nannanna. 11M ya'amleog be ya sa'an hale ka m bood ye m nyee ya, ka ke ka ya na di'e piini line yi Wina'am Siig Suŋ ni na la, ka ya na nye paŋ. 12Man yel si'el la ane ye, mam ne yanam na la'am nye suŋir. Ka yanam na suŋ mam, ka mam me na suŋi ya, ti yadda niŋir Wina'am poogin la. 13M ba'abiise m bood ye ya baŋ ye m mo noor si'em sa, ye m kena kaae ya. Ka saŋkan la sa ne nwa, ka yel sieba vi'i m ka m pu nyaŋe. Ka m bood ye m ke ka Room dim sieba tiake ba sunya ka dol Zugsob la, wuu man niŋ bane ka' Jew dim buudi sieba la ni si'em la. 14Mam di nidib wusa sam labasuŋ la yela, Greek dim ne bane ka' ba buudi, nimbane ka ba nini nie ne nimbane ka ba nini pu nie. 15Dinzug ka m me bood hale ye m mool labasuŋ yela la yanam bane be Room teŋin la sa'an. 16Li ane labasuŋ la ni, ka Wina'am paŋ ke ka nimbane wusa niŋ o yadda la nyet faangir, Jew dim la yiiga la'am ne bane ka' Jew dim la. Linzug ka nyan pu mor m labasuŋ la yelaa. 17Li pa'ani ti Wina'am niŋid si'em n ke ka ti aa popielim dim o tuon. Ka li ane ti yadda niŋir Yesu Kiristo ni gullim ke ka ti mor popielim. Li dolne lin da sob Wina'am gbauŋin ye, “One a popielim daana Wina'am tuon la na voe ne o yadda niŋir Wina'am ni.” 18Wina'am supeen nieya, ka yit arazana ni lut nidib tuumbe'ed ne nimbane tum be'ed ka li pu dol Wina'am suere zut. Ka ba vi'id yelsida ne ba tuumbe'ed, ka li pu tumi ba nii. 19Bun lin ka ninsaal na tun'e baŋ Wina'am yela la, nie nyain ba sa'an; ka Wina'am meŋ nie li pa'ali ba. Dinzug ka o supeen li na. 20Hale saŋkan ka Wina'am da maal dunia sa la, nidib nyet Wina'am maal si'el. Ka linzug ka ba gban'e li gbin ka baŋ Wina'am a si'em la'am ne ban pu nye o ne ba nini laa, ka baŋ ye o mor paŋ kane ka' naare, ka a Wina'am. Ka dinzug ka ba ku nyaŋe yel ye ba zi' Wina'am yelaa. 21Ba pu tis o na'asi kan ka o nar ye o di'e laa, ka pu pu'us o bareka, la'am ne ban mi' ye o be laa. Ka ba ten'esug lieb zolim. Ka ba ya'am a yoog, ka ku nyaŋe gban'e si'el gbin ne. 22Ba yel ye ba ane ya'am dim, ka lee a zon, 23ka pu na'asid Wina'am one mor na'am ka ku kpi laa, ka lee tiake na'asid si'elnam bane ka nidib maan, ka ba wenne ninsaalib bane na kpi la, bee niis bee bunkonbid bee si'elnam bane vuudi ba poya zut ne. 24Dinzugo, Wina'am basi ba ye ba niŋ dian'ad dine ka ba ya'am bood ka diis taaba nyan ba niŋgbina ni. 25Ba basid Wina'am yelsida la ka pu na'asid Wina'am one maal si'el wusa laa, one nar ne zun'or saŋa line ka' naare, ka lee dol dama'ar, ka na'asid dine ka Wina'am maal la, ka maane li maluŋ. 26Dinzug Wina'am basi ba ye ba niŋ ba ya'amleog dine mor nyan. Ka po'abi naan dig ne dap la wuu Wina'am bood ye li a si'em la. Ka ba basi li ka lee dig ne taaba. 27Ka dap la me bas po'ab la. Ka ya'amleog more ba bedego ba dap taaba yela. Ka dap niŋid si'elnam dine mor nyan ne taaba. Ka dinzug ka ba di'ed namisug kane ka ba nar ne ba di'ed la ba meŋ niŋgbina ni, ban niŋid si'el la yela. 28Ka ninsaalibi zan'as ye ba mor yelsida Wina'am yela ba potenda ni la zug, Wina'am basi ba ye ba mor ya'amyoog ka niŋid dine ka ba pu nar ye ba niŋida. 29Ka bunbe'ed buudi wusa more ba. Ka li a bun bugusum, ne fufum ne kisug ne nennim ne ninkuud ne zaba ne dama'ar ne sutoog. Ba keend, 30ka pian'ade sa'amid ba taaba zut, ka kis Wina'am, ka a nimponannib, ka mor nyeesim, ka nwe'edi ba meŋ nyo'og, ka ied suepaal n na tum tuumbe'ed, ka zan'asid ba manam ne ba saamnam noya, 31ka a ninyood, ka pu doli ba nozi'elugo, ka pu mor noŋir ne ba taaba sa'ane ka me pu zoti nimbaanliga. 32Ba mi' ye Wina'am suer poogin, ninkane niŋid bunbe'ed bama nar ne ku'um, ka zan'as ka kpelim niŋid ala. Ka line a be'ed gaad ala, ane ye ba me yel ye nimbane niŋid ala ane ninsuma.

will be added

X\