NIER PA'ALUG 9

1Ka malek one pe'es anu la piebi o na'atan. Ka m nye nwadibil ka o yi saŋgbana ni lu dunia ni na. Ka ba tis o bumbok dine zulum ka ka' ben la saafi. 2Ka nwadibil la yo'og bumbok la, ka nyo'os yi na wenne bugum tita'ar nyo'os ne, ka ke ka nintaŋ la kilim lik. 3Ka na'azomnam yi nyo'os la ni n sig dunia ni na. Ka ba tisi ba paŋ wenne namis mor paŋ dunia ni si'em la, 4ka yeli ba ye, ba da sa'am si'elnam wusa line nobugid teŋinee, amaa ba poa'alim nidib bane pu mor Wina'am zanbina ba gbe'edin la gullim. 5Ka na'azomnam la daa pu mor suere na ku nida, ka lee daa namisidi ba ne nwadisa anu. Ka toog kan ka ba daa nyeti ba niŋgbina ni la daa wenne naŋ toonbi zabid si'em la. 6Ka nwadisa anu nwa saŋa, nimbama na ied kum ka ku nyee lii, ka me na bood kum, ka kum na zo ka basi ba. 7Ka na'azomnam la wenne widi bane ti'eb gur zaba ne, ka mor line wenne salima zugpibis ba zutin. Ka ba nindaas wenne nidib nindaas ne. 8Ka ba zuobid wa'am wenne po'ab zuobid ne. Ka ba nyina wenne gbigim nyina ne. 9Ka ba nyo'od daa ligil ne si'el ka li wenne kunt zaba fuud ne. Ka ba kpukpama vuud wenne tanp widi teed tanp terokonami zo ti keŋ zaba ni ne. 10Ka ba mor zuya ne toonsa wenne namis ne. Ka ba zuya la mor paŋ n na poa'alim nidib nwadis anu. 11Ka malek one gur bumbok la daa aa ba na'ab. Ka o yu'ur ne Hibiru pian'ad ane Abbadon, ka Greek pian'ad a Apoliyon. Li gbin ane Asa'uŋ. 12Yiiga susa'aŋ la gaadeya. Amaa susa'aŋa ayi kpelim na kena. 13Ka malek one pe'es ayuobu la piebi o na'atan. Ka m wum ka kukor yi salima maan maalug zin'ig dine zi'e Wina'am tuon la lodisin anaasi na, 14yel malek one pe'es ayuobu mor na'atan la ye, “Yidigim maleknam anaasi bane ka ba lo Yifiretis mo'ar sa'an la.” 15Ba daa ti'eb ne gur yuum kaŋa ne nwadig kaŋa ne dabis kaŋa ne saŋa kaŋa ye ba ku ninsaalib pudugir la yinni pudugir atan' la ni. 16Ka m wum sogianam bane a wedban'adib la kal. Li daa ane tusa piisi zin'is tusa piiga. 17Ka m zaansuŋin la ka m daa nye widi ne bane ban'adi ba la. Ka ban daa a si'em nwa. Bane ban'ad widi la daa yene zaba fut line mu'e wenne bugum ka a sabilig ne donboolim ba nyo'odin. Ka widi la zut wenne gbigima zut ne. Ka bugum ne nyo'os ne tan line nyelig n dit wuu bugum ne yitne ba noya ni na. 18Ka yeltood atan' bama, bugum ne nyo'os ne tan line nyelig n dit wuu bugum la dine daa yit widi la noya ni la daa ku ninsaalib pudugir la yinni pudugir atan' la ni. 19Widi la paŋ daa bene ba noya ne ba zuya ni. Ka ba zuya la daa wenne wiigi ne n mor zut ka ba more li poa'alim nidib. 20Ka nimbane daa kpelim ka yelbama daa pu kuu ba la, daa pu bas ban daa maal si'el ba meŋ la dolim, ka me daa pu bas kikiris ne salima ba'a la ne anzurifa ba'a ne kuga ba'a ne daad ba'a bane ku tun'e nye bee wum bee keŋ la pu'usugo. 21Ba me daa pu bas ba ninkuusim ne ba ba'akon bugub ne ba po'aboodim bee ba na'ayiigim la ka tiake.

will be added

X\