NIER PA'ALUG 8

1Ka Pe'ebil la yo'og tabilig line pe'es ayopoi la, vuud daa kae' arazana la nii saŋa bi'ela. 2Ka m nye maleknam ayopoi bane zi'e Wina'am tuon la ka ba di'e na'atana ayopoi. 3Ka malek so' mor salima laa dine ka ba niŋid tudaare la, keŋ zi'e maan maalug zin'ig la baba. Ka ba tis o tudaare bedego ye o pe'esi li Wina'am nidib pu'usugin n niŋ bimbim line zi'e na'am gbauŋ la tuon la tis Wina'am. 4Ka tudaare dine ka ba nyu'e la nyo'os ne Wina'am nidib la pu'usug yi malek one zi'e Wina'am tuon la nu'usin dut agol. 5Ka malek la nok tudaare laa la mu'e bugum bimbim la zug n pe'el laa la n lobigi li dunia ni. Ka satansug ne vuud ne sayan'asug ne teŋdamug daa naam. 6Ka maleknam ayopoi bane mor na'atana ayopoi la ti'eb ye ba piebi ba. 7Ka yiiga malek la piebi o na'atan. Ka sakuga ne bugum gendig ne ziim n kpa'adi lut dunia ni na. Ka bugum di dunia pudugir la yinni pudugir atan' la ni, ka me di tiis pudugir la yinni, pudugir atan' la ni, ka di moma'asa wusa. 8Ka malek one pe'es ayi la piebi o na'atan. Ka ba lob si'el ka lu wenne zuer tita'ar lin ka bugum dit la, ka lu dunia ku'om wusa la ni. Ka ku'om la pudugir la yinni pudugir atan' la ni kilim ziim. 9Ka bunvoeya bane me be ku'omin la pudugir la yinni pudugir atan' la ni kpi wusa. Ka aaruma la me pudugir la yinni pudugir atan' la ni sa'am wusa. 10Ka malek one pe'es atan' la piebi o na'atan. Ka nwadibil tita'ar diti wenne bugum ne yi saŋgbauŋin li mo'a ne ku'obula pudugir yinni pudugir atan' la ni. 11Ka nwadibil la yu'uri buon Toog. Ka ku'om la pudugir yinni kilim toog. Ka nidib bedego nu ku'om la kpi, ku'om la daa a toog la zug. 12Ka malek one pe'es anaasi la piebi o na'atan. Ka winig la pudug zin'isa atan', ka nwadig la me pudug zin'isa atan', ka nwadibibis la me pudug zin'isa atan'. Ka si'el nwe' ba pudugir yinni yinni, ka ba wusa pudugir yinni yinni la kilim lik. Ka nintaŋ line nie nyain la pudugir la yinni pudugir atan' la ni kilim lik. Ka yu'uŋ pielim pudugir la yinni pudugir atan' la ni me kilim lik. 13Ka m gosi nye silug tita'ar one ian'ad agol lalle, ka wum ka o yet ne kukotita'ar ye, “Susa'aŋ be, susa'aŋ be. Maleknama atan' bane kpelim la ye ba piebi ba na'atana la, ka ba kukuma ya'a ti kum, susa'aŋ na be tis bane wusa be dunia ni.”

will be added

X\