NIER PA'ALUG 7

1Ne'eŋa nya'aŋ ka m nye maleknam anaasi ka ba zi'e dunia lodisa anaasi la kad dunia sisi'em line yi zin'is wusa la lebisid ye sisi'em da da'ad teens bee ateuk bee tiig so'oo. 2Ka m nye malek si'a ka o yi winig ne tansid si'el la na ka mor si'el line maal Wina'am one voe la zanbina, ka yel maleknam bane ka Wina'am tisi ba teens ne ateuk poa'aluŋ paŋ la ne kukotita'ar ye, 3ba da poa'alim teens la bee ateuk la bee tiis la, asee ka ba ti zanbil Wina'am tumtumnib la zanbina ba gbe'ed ni. 4Ka m wum bane ka ba daa zanbili ba ne Wina'am zanbin ba gbe'edin la kal. Li daa ane tusa kobuga ne tusa piisnaasi ne tusa anaasi nidib ka yi Israel dim dood wusa la ni. 5- 8Ka tusa pii ne ayi daa yi nimbama yinni yinni doodin na. Ka dood la a Juda ne Reuben ne Gad ne Aser ne Naftali ne Manase ne Simeon ne Levi ne Issaka ne Zebulun ne Josef ne Benjamin. 9Ne'eŋa nya'aŋ la ka m gos, ka nidib la'as bedego, ka so' ku nyaŋe kaal nidib la wusaa. Ba daa yine teŋgbana wusa ne buudi wusa ne dood wusa ne pian'ad wusa ni na n ye fupielis zi'e na'am gbauŋ la ne Pe'ebil la tuon n mor kpukpara wila ba nu'usin, 10ka pian'ad ne kukotitada ye, “Ti faangir yitne Wina'am one zin'i na'am gbauŋ la zug ne Pe'ebil la sa'an na.” 11Ka maleknam la wusa zi'eni gilig na'am gbauŋ la ne kpeenmnam la ne bunvoeya anaasi la vabin na'am gbauŋ la tuon n zun'od Wina'am 12n yel ye, “Ami, bareka ne zun'or ne ya'am ne bareka pu'usug ne na'asi ne paŋ ne kpi'euŋ ane Wina'am din saŋa dine ka' benne. Ami.” 13Ka kpeenmnam la yinni bu'osi m ye, “Ano'onami a nimbama n ye fupielis? Ka ba yi yaani na?” 14Ka m lebis o ye, “Naa, fune mi', ka man zi'.” Ka o yeli m ye, “Nimbama yine fara tita'arin la na, ka piesi ba fut Pe'ebil la ziimin ka ke ka ba pelig. 15Linzug ka ba zi'e Wina'am na'am gbauŋ la tuon ka tumi tisidi o nintaŋ ne yu'uŋ o pu'usug yin la. Ka Wina'am n be ne ba la zug, ka o na guri ba. 16Ka ko'om bee ku'onuud kudin ku lem gban'e baa, ka nintaŋ bee tuultita'ar ku lem tuligi baa. 17Pe'ebil one be na'am gbauŋ la teŋsuk la na guri ba, ka doli ba keŋ ku'obulum line tisid nyovur la. Ka Wina'am na eens ninto'om wusa ba nini ni.”

will be added

X\