NIER PA'ALUG 6

1Ka m nye ka Pe'ebil la yo'og tabilis ayopoi la yinni. Ka m wum ka bunvoeya anaasi la yinni yel ne kukor dine wenne satansug ne ye, “Kem na.” 2Ka m gosi nye wedpiel. Ka one ban'ad o la mor tiraug. Ka ba tis o na'am zugpibig. Ka o yii a paŋ daan ye o zabi nyaŋ si'elnam wusa. 3Ka Pe'ebil la yo'og tabilig kane pe'es ayi la. Ka m wum ka bunvor one pe'es ayi la yel ye, “Kem na.” 4Ka wedzin'ia me yi na. Ka ba tis one ban'ad o la paŋ ye o sa'as zaba dunia ni ka nidib ku taaba. Ka o di'e su'ug tita'ar. 5Ka Pe'ebil la yo'og tabilig kane pe'es atan' la. Ka m wum ka bunvor one pe'es atan' la yel ye, “Kem na”. Ka m gos ka wedsabilig be anina. Ka one ban'ad la mor line makid la o nu'ugin. 6Ka m wum line vuud wenne kukor line yi bunvoeya anaasi la soogin ye, ki ligidi zem nid daar yinni tuuma yood. Ka kizen'ug butis bibis atan' me a nid daar yinni tuuma yood. Amaa da sa'ami kpaam ne daam laa, ka ba ligidi zu'e ya. 7Ka Pe'ebil la yo'og tabilig line pe'es anaasi la, ka m wum ka bunvor one pe'es anaasi la yel ye, “Kem na.” 8Ka m nye ka wedpipelug be anina, ka one ban'ad o la yu'uri buon Akum, ka Hades, line a kpi'imnam teŋ la doli o nya'aŋ. Ka ba tis Akum ne Kpi'im Teŋ dunia pudugir yinni pudugir anaasi la ni ye ba so'e, ka ba na ku ne su'uraug ne ko'om ne wiim ne dunia bunyuos. 9Ka on yo'og tabilig line pe'es anu la, ka m nye bane ka ba kuu ba, ban moon Wina'am pian'ad la ka yet Wina'am yelsida la zug, ka ba be maan maalug bimbim la teŋir, 10ka tansid ye, “Zugsob tita'ar, one a su'um ne sida, ye li na yuuge paae wala ka fu na kad nidib nwa saria ka namisi ba ka teki ba toba, ban kuud nidib la yela?” 11Ka ba tisi ba wusa fupielis, ka yeli ba ye, “Vu'usumi bi'ela ka guri ya tumtumnib taaba bane a yadda niŋidib ka kpelim dunia ni la, ka ba ti kuu ba wenne ban ku yanam si'em la, ka ba kal ben ti paae.” 12Ka m nye ka o yo'og tabilig dine pe'es ayuobu la. Ka teŋ dam bedego, ka nintaŋ kilim lik bedego, ka nwadig la wusa lieb zen'ugo wenne ziim ne. 13Ka nwadibibis la yi saŋgbauŋ la ni li teŋin na wenne kekama ka sisi'em yiti nwe' ka kekaŋ la dam ka welkasa lut si'em la. 14Ka saŋgbauŋ la melim wenne gbauŋ ka ba kpilim naae ne. Ka zueya ne teens bane ka ku'om gilig wusa enris. 15Ka dunia na'anam ne nintitada ne sogia na'anam ne kpa'am dim ne paŋ dim ne so' wusa, yamis ne bane ka'a yamise, ba wusa sua' tampiins lema ni ne tampiins sian'asima zueya zut, 16ka tans zueya la ne tampiins la yel ye, ba limi ba zutin sua'a ba, ye ka one zin'i na'am gbauŋ zug la ku nyee ba, ka Pe'ebil la me ku nyee ba ne o supeen la. 17Ka Pe'ebil la ne one zin'i na'am gbauŋ zug la supeen dabistita'ar paa na, ka so' so' kae' na nyaŋe zi'e ne sukpi'euŋ ba supeen la tuone.

will be added

X\