NIER PA'ALUG 5

1Ka m nye gbauŋ ka li sob li tuon ne nya'aŋ, ka mor tabilis ayopoi. Ka one zin'i na'am gbauŋ la zug n more li o datiuŋ. 2Ka m nye malek kane mor paŋ hale ka o moon n tansid ye, “Ano'one a su'um na nyaŋe lak tabilig la ka yo'og gbauŋ la?” 3Ka so' daa kae' arazana ni bee dunia ni bee teŋgbauŋ poogin na nyaŋe lak gbauŋ la gos poogine. 4Ka m daa kaas hale, bozugo so' daa kae' a su'um ye o lak gbauŋ la gos li poogin la zug. 5Ka kpeenmnam la ni yinni yeli m ye, “Da kaasida. Gosima, one yi Juda buudi ni ka mor paŋ wenne gbigim la, one a na'ab David yaaŋ la, o nyaŋ yelbe'ed wusa ka na nyaŋe yo'og gbauŋ la ne tabilis ayopoi la.” 6Ka m nye Pe'ebil ka o zi'e na'am gbauŋ dine ka bunvoeya anaasi ne kpeenmnam gilig la teŋsuk. Ka Pe'ebil la wenne one ka ba daa ku o, ka o vu'ug kumin, ka mor iila ayopoi ne nini ayopoi dine a Wina'am siisa ayopoi bane ka o tum dunia wusa ni na la. 7Ka Pe'ebil la keŋ di'e gbauŋ la one zin'i na'am gbauŋ la datiuŋ. 8Ka on di'e gbauŋ la ka bunvoeya anaasi la ne kpeenmnam piisi ne anaasi la vabin Pe'ebil la tuon. Ka kpeenmnam la yinni wusa mor kon ne salima laas, line pe'el ne tudaare dine a Wina'am nidib pu'usug la. 9Ka ba yu'um yuumpaali yet ye, “Fune su'um ye fu di'e gbauŋ la, ka laki li tabilis la, bozugo ba daa kuu uf ne. Ka fu ziim la faaenn ninsaal buudi wusa ne pian'ad gun gun ne buudi gun gun la'am ne so'olim gun gun, ka ba lieb Wina'am din. 10Ka maali ba ka ba a so'olim na'anam ne maalmaanib ye ba tum Wina'am tuuma, ka na di na'am dunia ni.” 11Ka m gos ka nye maleknam tusanam tusa sa, ka ba zi'eni gilig na'am gbauŋ la ne bunvoeya anaasi ne kpeenmnam la. 12Ka m wum ka ba du'osid ba kukoya yumi yet ye, Pe'ebil one ka ba da ku ka o vu'ug la su'um ye o di'e paŋ ne kpa'am ne ya'am ne kpi'euŋ ne na'asi ne zun'or ne sen'uŋ. 13Ka m wum ka bunvor mekama line be arazana ni ne dunia ni ne teŋgbauŋ poogin ne ateukun wusa yet ye, “Bareka ne na'asi ne zun'or ne paŋ be ne Pe'ebil la ne one zin'i na'am gbauŋ zug saŋa dine ka' benne.” 14Ka bunvoeya anaasi la siak ye Ami. Ka kpeenmnam la vabini zun'e Pe'ebil ne one zin'i na'am gbauŋ zug la.

will be added

X\