NIER PA'ALUG 4

1Ne'eŋa ka m nye ka arazana kuluŋ yo'og. Ka kukor kane ka m deŋi wum la pian'adi tisid man, ka li vuud wenne na'atan. Ka li yeli m ye, “Dum kpela na, ka m na pa'al uf dine na niŋ ne'eŋa nya'aŋ la.” 2Ka yimmo ka Wina'am Siig Suŋ la more m, ka m nye ka na'am gbauŋ digi arazana ni ka so' zin'i li zug. 3Ka o nindaa nyeen wenne kugvenla line yu'uri buon yaspa ne kanelian. Ka saa dindeog buenn gilig na'am gbauŋ la, ka dindeog la boonsim a den'em. 4Ka na'am gbana piisi ne anaasi gilig na'am gbauŋ la, ka kpeenmnam piisi ne anaasi ye fupiela ka pid salima zugpibis zin'i ba zutin. 5Ka sayan'asug yit gbauŋ la ni na ne vuud ne satansug. Ka fitlanam ayopoi lamisid dit na'am gbauŋ la tuon. Bama a Wina'am siisa ayopoi la. 6Ka si'el wenne mo'ar dig na'am gbauŋ la tuon wenne gotiŋ nie nyain ne. Ka bunvoeya anaasi zi'e gilig na'am gbauŋ la, ka nini pe'eli ba tuon ne nya'aŋ. 7Ka yiiga bunvor la wenne gbigim ne, ka one tia' la wenne na'araug ne, ka one tia' atan' la mor ninsaal nindaa. Ka bunvor one tia' anaasi la wenne silug tita'ar n ian'ad ne. 8Ka bunvoeya la yinni wusa mor kpukpama ayuobu, ka nini pe'eli ba poogin ne yiiŋ. Ka yu'uŋ ne nintaŋ ba pu basid yuumaa ka ye, “Zugsob Wina'am one mor paŋ la a su'um nyain. O a su'um. O sid a su'um. One a one da be, ka nan be, ka na ti be la.” 9Ka bunvoeya anaasi la ya'a yiti zun'od ka na'asid one be saŋa dine ka' benne ka zin'i na'am gbauŋ zug la ka pu'us o bareka, 10kpeenmnam piisi ne anaasi la iginidne one zin'i na'am gbauŋ zug la tuon ka zun'e one be saŋa dine ka' ben la, ka pidigi ba zugpibis n digil one zin'i na'am gbauŋ zug la tuon n yet ye, 11“Ti Zugsob Wina'am fune nar ye fu di'e pipilim na'asi ne zun'or ne paŋ bozugo fune maal si'el wusa, ka fu boodim yela ka fu maali ba ka ba be la.”

will be added

X\