NIER PA'ALUG 3

1Ka man nye so' la lem yeli m ye, “Som ne'eŋa tis malek one be Wina'am nidib sa'an n be Sardis teŋin la. Ne'eŋa ane toluŋ dine yi one mor Wina'am siisa ayopoi ne nwadibibisa ayopoi la na. Toluŋ la nwa. ‘M mi' yaname niŋid si'el, ka nidib ten'esid ye ya voe amaa ya ane ku'um. 2Dinzug duomi, ka kpemis line kpelim ka bood ku'um la, ka ya tuuma la pu tig Wina'am nini. 3Dinzug tenri pa'alug kan ka ya daa wum ka di'e la. Siakimini li ka tiake ya sunya. Ya ya'a pu due m na keenn ya sa'an na wenne na'ayiig ne, hale ka ya ku baŋ saŋkan ka m kenaa. 4Amaa ya nidib bi'ela be Sardis ka pu dian' ba fuude. Ba na ye fupiela doli m, ban nar la zug. 5One nyaŋ yelbe'ed wusa la na ti ye fupiela wuu ban ne, ka m ku kpiis o yu'ur nyovurpaal dim gbauŋin laa, ka na yeli m Ba' ne o maleknam la sa'an nyain ye o ane man nid. 6One bood ye o wum, ala on kelisim line ka Wina'am Siig Suŋ la yet Wina'am nidib la.’ ” 7Ka man nye so' la lem yeli m ye, “Som ne'eŋa tis malek one be Wina'am nidib sa'an n be Filadelfia teŋin la. Ne'eŋa ane toluŋ dine yi one a nyain ka a sida sob la ni na, one mor David saafi la, ka yo'ogid ka so' ku nyaŋe yoo, ka yood ka so' ku nyaŋe yo'og laa. 8Toluŋ la nwa. ‘M mi' yaname niŋid si'el, ka tisi ya suer ye ya tum m tuuma, ka li wenne kuluŋ ka m yo'og ka so' ku nyaŋe yoo, ka mi' ye ya mor paŋ bi'ela, ka la'am ne ala, ya me siaki m yelug ka pu ki'is ye ya zi' ma. 9Kelisimi. Bane a Sutaana nidib, ziri dim bane ma' ye ban ane Jew dim, ka ka' Jew dima, m na ke ka ba kena igini ya tuon ka baŋ ye m noŋi ya. 10Yaname siak m yelug ka modig la zug, m me na more ya su'uŋa ka ya da kpen' yelkan na ti kenn dunia ni na mak dunia nidib wusa la nii. 11M na kenn nannanna na. More line ka ya mor la su'uŋa, ka so' da nyaŋe faaenn ya yoode. 12One nyaŋ yelbe'ed tuuma wusa la m na maal o, ka o a za'antolug Wina'am pu'usum yir ka o kudin ku lem yi aninaa. Ka m na sob Wina'am yu'ur tabil o zugin, ne Wina'am teŋ Jerusalem Paal dine na yi Wina'am sa'an arazana ni n sig na la yu'ur, ka me na sob m meŋ yu'upaal tabil o zugin. 13One bood ye o wum, ala on kelisim dine ka Wina'am Siig Suŋ la yet Wina'am nidib la.’ ” 14Ka man nye so' la lem yeli m ye, “Som ne'eŋa tis malek one be Wina'am nidib sa'an n be Laodisea teŋin la. Ne'eŋa ane toluŋ dine yi one yu'uri buon Ami la ni na la, one sid yet line ka o nyet la, one a bun din ka Wina'am maal wusa la kpeenm. 15Toluŋ la nwa. ‘M mi' yaname niŋid si'el ka mi' ye ya tum m tuuma ka pu tumi li ma'asiga ka me pu niŋidi li tuuliga. Man boodin ne yaname naan aan ma'asiga bee yaname naan aan tuuliga. 16Amaa yaname sadigim pu ma'as bee tul m tuuma ni la, m na tobisi ya yiisi m noorin. 17Yanam yet ye ya ane kpa'am dim ka mor dine ka ya bood wusa ka si'el pu pasigi ya. Ka zi' yaname mor susa'aŋ ne nimbaanlig si'em. Ya ane noŋ dim ka a sawenya ne zunzoos. 18Dinzug m sa'ali ya ne ye ya da' salima line a salima meŋa man ni n paam kpa'am, ka me lem da' fupiela ye ligili ya nyan sawenya la, ka da' tiim niŋi ya nini la ka tun'e nyet. 19M namisid ka sa'an bane ka m noŋ la wusa ye ba zamis. Dinzug tiakemini ya sueya ka da di'emideyaa. 20Kelisimi. M buoni ya wenne one zi'e za'anoorin kabirid ne. Ka so' ya'a wum m kabirug la ka siak, m na kpen' o yin na ka man ne on la'ase di. 21One nyaŋ yelbe'ed wusa la, m na tis o suer ka o la'ase zin'i ne man m na'am gbauŋ la zug, wenne man nyaŋ yelbe'ed wusa ka la'ase zin'in ne m Ba' Wina'am o na'am gbauŋ zug si'em la. 22One bood ye o wum, ala on kelisim line ka Wina'am Siig Suŋ la yet Wina'am nidib la.’ ”

will be added

X\