NIER PA'ALUG 22

1Ka malek la lem pa'ali m mo'ar line ku'om tisid nyovur la, ka li ian'ad wuu gotiŋ ne ka yitne Wina'am ne Pe'ebil la na'am gbauŋ la ni, 2ka be teŋ la suer tita'ar la soogin. Ka tiig line tisid nyovur la zi'e mo'ar la gbeed ayi la ni, ka ba wen wela noor piinayi yuum poogin, ka wen noor yinni nwadig poogin. Ka tiig la vaand tisid dunia so'olim wusa laafe. 3Ka Wina'am nopoor la ku lem be ya'asa. Bozugo Wina'am ne Pe'ebil la na'am gbauŋ na be li ni. Ka o tumtumnib na zun'e o, 4ka nye o nindaa. Ka o yu'ur na sob ba gbe'edin. 5Ka yu'uŋ ku lem bee. Ka Zugsob Wina'am na ke ka li a nyain, ka ba ku lem bood fitla ne nintaŋ ani. Ka ba na di na'am saŋa line ka' benne. 6Ka malek la yeli m ye, “Yelbama ane asida. Ka Zugsob Wina'am one tisid o nodi'esidib o Siig Suŋ la, tum o malek ye o kena pa'al o tumtumnib yel ban ku yuuge, ka niŋ la.” 7Yesu yel ye, “Li ku yuuge, ka m na kena. Yelsum be ne one siak gbauŋ kaŋa nodi'esug la yet si'el la.” 8Man Joon n wum ka nye yelbama wusa. Ka man daa wum ka nye li naae la ka vabin malek one pa'ali m yelbama la tuon ye m zun'e o. 9Ka o yeli m ye, “Da niŋ alaa. Ka man me ane fu tumtum tiraan la'am ne fu ba'abiis bane a nodi'esidib ne nimbane siak bun line be gbauŋ kaŋa ni la. Zun'om Wina'am.” 10Ka o yel man ye, “Da su'a gbauŋ kaŋa nodi'esug la yet si'el laa, bozugo saŋa la li'eliya, ka yelbama wusa na niŋ. 11Kel ka one a tuumbe'ed daan kpelim aa ala. Ka one tum dian'ad tuuma kpelim niŋim ala. Ka one a popiel on kpelim tum line a su'um. Ka one suunre a nyain on kpelim aa ala.” 12Ka Yesu yel ye, “Kelisimi. Li ku yuuge, ka m na kena. Yood la be m sa'an. M na tis so' wusa o tuuma yoode a si'em. 13Mane a Alfa ne Omega, ka a yiiga daan ne nya'aŋ daan ka a bun wusa pin'ilug ne li naar.” 14Yelsum be ne bane pie ba fuud nyain la. Dinzugo ba na mor suer na di nyovur tiig la wela, ka na kpen' za'anoorin n keŋ teŋ la ni. 15Ka nimbe'ednam ne bane dit tima la ne bane tum dian'ad tuuma la ne ninkuudib la ne ba'amaanib la ne nimbane wusa n noŋ ye ba ma'a ziri la ku kpen' teŋ la poogin ne, ka na bene teŋ la yiiŋ. 16“Man Yesu tumi m malek ye o yel uf yelbama ka fu tu'as tis Wina'am nidib la. Mane a na'ab David yaaŋ ne beogin nwaddar line nyeen.” 17Wina'am Siig Suŋ ne Pe'ebil Po'apaal la yel ye, “Kem na.” Ka one wumi li la me yelim ye, “Kem na.” Ka one wusa ka ku'onuud more o la, kel ka o kena, ka one me bood la, kel ka o di'e piini line a nyovur ku'om la zaalim. 18Man Joon sa'al so' mekama wum gbauŋ kaŋa nodi'esug yet si'el la ne nimmua. So' ya'a yel si'el n paas gbauŋ kaŋa yet si'el la, Wina'am na maligim paas on sob yeltood line sob gbauŋ kaŋa ni la. 19Ka so' ya'a yiis si'el gbauŋ kaŋa nodi'esug yet si'em la ni, Wina'am na moŋ on sob o pudugir line be nyovur tiig la ni, la'am ne Teŋ Suŋ la kpen'eb. Tiig ne teŋ kane yela n sob gbauŋ kaŋa ni la. 20One yet ye yelbama ane sida la yel ye, “Sida li ku yuuge, ka m na kena.” Li a su'um. Ti Zugsob Yesu kem na. 21Ti Zugsob Yesu yelsum na be ne ya wusa. Ami.

will be added

X\