1 Ka m nye saŋgbauŋ ne teŋgbauŋ paal. Ka yiiga saŋgbauŋ ne teŋgbauŋ ne ateuk gaad ka lem kae'. 2 Ka m nye Jerusalem Teŋ Paal line a su'um nyain, ka li yi arazana, Wina'am sa'an n sigid na wenne po'a paale ye fuvenla n ti'eb ye o kul o sid ne. 3 Ka m wum ka kukor tans yi na'am gbauŋ la zug na n yel ye, “Wina'am yir yu'un be dunia nidib sa'an. Ka o be ne ba, ka ba na aa o nidib. Ka Wina'am meŋ na bee ba ni ka aa ba Wina'am, 4 ka na eenns ba ninto'om wusa. Yelkuda la wusa gaadeya, ka kum ne susa'aŋ ne kaasug ne toog ku lem be ya'asa.” 5 Ka one zin'i na'am gbauŋ zug la yel ye, “M maan si'el wusa ne bunpaala.” Ka yeli m ye, “Som ne'eŋa n digil bozugo pian'ad la ane sida ka a yelmeŋir.” 6 Ka yel man ye, “Li naaeya. Mane a Alfa ne Omega, ka a si'el wusa pin'ilug ne li naar la. Ka ku'onuud ya'a kuud so', man na tis o nyovur ku'obulum zaalim ka o nu. 7 Ka one nyaŋ yelbe'ed wusa la na di'e lina wusa. Ka man na aa o Wina'am ka on me na aa m biig. 8 Amaa dabiem dim la ne bane ka' yadda, ne nimbe'ednam la ne ninkuudib la ne bane tum dian'ad tuuma la ne bane dit tima la ne ba'amaanib la ne ziri dim la wusa zin'ig ane bugum mo'ar line pe'el ne bugum ne tan line nyelig n dit wuu bugum la ni. Lina a ku'um line pa'as ayi la.” 9 Ka maleknam ayopoi la ni yinni bane daa mor laas ayopoi, ka li pe'el ne yeltood ayopoi line kpelim nya'aŋ la yeli man ye, “Kem na, ka m pa'ali fu Po'a Paal la, one a Pe'ebil la po'a.” 10 Ka Wina'am Siig Suŋ more m. Ka malek la noki m du zuetita'ar zugin, ka pa'ali m Jerusalem teŋ line a su'um nyain la, ka li yi Wina'am sa'an arazana ni n sigid na. 11 Ka Wina'am na'am la paŋ nyeene li ni. Ka teŋ la me nyeen wuu kugvenliŋ line ka ba buon yaspa ka li nyeen wuu gotiŋ ne. 12 Teŋ la daa mor zaŋguom titada ka ba zug wa'am ne za'anoya ne kolis piinayi. Ka maleknam piinayi gur za'anoya la. Ka Israel dim buudi piinayi la yuda daa sob kolis la zugin. 13 Ka za'anoya atan' daa be zaŋguom anaasi la yinni, yinni, ni. Ka atan' be ya nya'aŋ baba. Ka atan' be ya datiuŋ baba. Ka atan' be ya dagobug baba. Ka atan' me be ya tuon baba. 14 Ka ba daa eenb teŋ la zaŋguoma la ne kuga piinayi. Ka Tumtumnib piinayi la yuda daa sob kuga la zugin. 15 Ka malek kane daa pian' tisi m la daa mor salima daug line ka ba more makid la ye o mak teŋ la ne li kolis ne li zaŋguoma la. 16 Ka teŋ la daa ane teŋ mauk. Ka li wa'alim ne li yaluŋ la zem ne taaba. Ka malek la mak teŋ la ne daug line ka ba more makid la. Ka li yaluŋ ane maila tusir yinni ne kobus anu. Ka li wa'alim ne li yaluŋ ne li wa'alim line zi'e la wusa zem taaba. 17 Ka malek la me mak zaŋguoma la. Ka li wa'alim la daa ane ninsaal kantiig kobuga ne piisnaasi ne anaasi. Malek kantiig me ane ala. 18 Ka zaŋguoma la daa me' ne kugvenliŋ line yu'uri buon yaspa. Ka teŋ la meŋ daa a salima ameŋa line nyeen wuu gotiŋ ne. 19 Ka kugvenla buudi wusa n daa be teŋ la eenbir kuga la ni n ke ka ba venl bedego. Ka yiiga eenbir kuga la daa ane yaspa. Ka ayi daan la a safir. Ka atan' daan la a agat. Ka anaasi daan la a emeral. 20 Ka anu daan la a onik. Ka ayuobu daan la a kanelian. Ka ayopoi daan la a kirisolat. Ka anii daan la a beril. Ka awai daan la a topas. Ka piiga daan la a kirisopas. Ka piinayinni daan la a yasin. Ka piinayi daan la a ametis. 21 Ka kulis piinayi la daa ane kugvenla line yu'uri buon peel la piinayi. Ka ba maal kulis la yinni yinni ne peel yinni. Ka teŋ la sueya la daa ane salima ameŋa n nyeen wuu gotiŋ ne. 22 Ka m daa pu nye Wina'am pu'usum yir teŋ la nii, bozugo Zugsob Wina'am paŋ tita'ar daan la ne Pe'ebil la aa anina pu'usum yir. 23 Ka Wina'am na'am paŋ ne Pe'ebil la daa nyeen li ni, ka ket ka li a nyain. Ka linzug ka teŋ la daa pu bood winig ne nwadig ye ba nyeen li nii. 24 Ka dunia so'olim buudi wusa me na goond neesim la ni. Ka dunia na'anam na more ba kpan'am keŋ teŋ la ni. 25 Ka teŋ la za'anoya maligim pu yood nintaŋa, bozugo yu'uŋ ku be aninaa. 26 Ka ba na mor dunia na'am ne kpan'am n kenn teŋ la ni na. 27 Ka line ka'a titu'aa wusa ne one tum nyan tuuma ne ziri dim la ku kpen' teŋin laa. Nimbane yuda sob Pe'ebil la nyovurpaal dim la gbauŋ la ni ma'aa na kpen' teŋ la poogin.
