1 Ka m lem nye malek so' ka o yi arazana ni sigid na n mor bumbok zuluŋ la saafi ne baans line to'oŋ taaba ka kpi'em la o nu'ugin, 2 ka gban'e dragon one a waaf line da be kudumin sa, ka a kikiris Na'ab ne Sutaana la, n loo o digil yuma tusa, 3 ka nok o lob bumbok zuluŋin la ka kpar ka nok si'el taasi li, ye o da nyaŋe ma' dunia dim buudi wusa n ti paae yuma tusa laa. Ka yuma tusa la nya'aŋ ba na idig o n ke ka o yi paalo saŋa bi'ela. 4 Ka m nye na'am gbana ka ba tis bane zin'i li zugin la paŋ ka ba na kat saria, ka lem nye nimbama siis, bane ka ba daa kuu ba, bam moon yelsida line ka Yesu pa'al ne Wina'am pian'ad la yela. Nimbama daa pu zun'od bunyua la ne o win laa, bee di'ed o zanbina ba gbe'edin bee nu'usinee, ka yu'un vu'ug na ka la'as ne Kiristo a na'anam yuma tusa la poogin. 5 Ka bane daa kpelim la pu vu'ug naa, asee yuma tusa la ti gaad. Yiiga kumvu'ugir nwa. 6 Bane paam yiiga kumvu'ugir la na nye yelsum ka me a su'um nyain. Ka ku'um line paas ayi la ku nyaŋe baa, ka ba na a Wina'am ne Kiristo maalmaanib ka ba la'as ne Kiristo di na'am yuma tusa. 7 Ka yuma tusa la ya'a ti gaad, ba na bas Sutaana 8 ka o yi sarega ni n ma' dunia buudi wusa, bane be zin'is wusa dunia ni la, bane ka ba buoni ba ye Gog ne Magog la. Ka na la'ase ba wusa keŋ zabirin ka ba zan'a la'as a bedego wuu titanbi'isug line dig mo'ar noorin ne. 9 Ka ba yi pe'el teŋgbauŋin n keŋ gilig Wina'am nidibi la'ase be zin'isi'a ne teŋ kane ka Wina'am noŋ la. Ka bugum yi arazana ni kena dii ba. 10 Ka maleknam nok Sutaana one ma'ad dunia nidib la n lob o bas bugum mo'ar line pe'el ne bugum ne tan line nyelig n dit wuu bugum la ni, zin'ikan ka ba deŋim lob bunyua ne ziri nodi'es la bas la. Ka anina ka ba na namis nintaŋ ne yu'uŋ, saŋa line ka' benne. 11 Ka m lem nye na'am gbauŋ piel tita'ar ka so' zin'i li zug. Ka teŋgbauŋ ne saŋgbauŋ zo melim o tuon, ka so' ku lem nyee ba ya'asa. 12 Ka m nye bane kpi la, bane daa a tadimnam ne kpi'emnam, ka ba zi'e na'am gbauŋ la tuon. Ka so' lakidi gbana, ka me lem lak gbauŋ si'a line a gbauŋ kane ka ba sob bane mor nyovurpaal yuda n niŋ la. Ka Wina'am kad bane kpi la saria ka li dolne ban daa niŋid si'em ka li sob gbana la ni la. 13 Ka ateuk bas bane daa kpi li puugin la. Ka Ku'um ne Kpi'im Teŋ la me bas nimbane daa kpi n bee ba ni la. Ka Wina'am kadi ba zan'a saria ka li dolne ban da niŋid si'em la. 14 Ka maleknam nok Ku'um ne Kpi'im Teŋ la n lobi bas mo'ar line pe'el ne bugum la ni. Ka bugum mo'ar kaŋa ane ku'um ayi daan la. 15 Ka so' yu'ur ya'a daa pu sob nyovurpaal dim gbauŋin laa, ba na lobi ba bas bugum mo'ar la ni.
