NIER PA'ALUG 2

1Ka man nye so' la one yel man ye, “Som ne'eŋa n tis malek one be Wina'am nidib sa'an n be Efesus teŋin la. Ne'eŋa ane toluŋ dine yi one mor nwadibibisa ayopoi o datiuŋ nu'ugin la na, one ken salima fitla ayopoi soogin la. 2Toluŋ la nwa. ‘Man mi' yanam niŋid si'el, ka mi' yanam tum ne kpi'euŋ si'em, ka mor sumodigir si'em, ka mi' ye ya zan'asid nimbe'ednam, ka daa mak bane ye ba ane Kiristo Tumtumnib la gos, ka lee baŋ ye ba ka'a alaa, ka baŋ ye ba ane ziri dim. 3M mi' ye ya modigid ka namisid man zug ka pu basida. 4Amaa mane nye ya taal si'em ane anwa. Ya pu noŋi m wuu yaname daa noŋi m yanam daa pin'ili doli m yiiga si'em laa. 5Ten'esimi yaname daa niŋid si'em ka yu'un basi li la. Tiakimi ya tuuma ka tum yaname daa tum si'em yiiga la. Ya ya'a pu tiake ya sueyaa, m na keenn ya sa'an na n noki ya fitla la li zin'igin. 6Amaa ne'eŋa ka ya niŋid ka li a su'um. Ya kis line ka Nikolaitan nidib la niŋid, wenne mane kis li si'em la. 7One bood ye o wum, ala on kelisimi line ka Wina'am Siig Suŋ la yet Wina'am nidib la. One nyaŋ yelbe'ed wusa la ka m na tis o suer ka o di tiig line tisid nyovur ka be Wina'am lombo'ogin la wela.’ ” 8Ka man nye so' la lem yeli m ye, “Som ne'eŋa tis malek one be Wina'am nidib sa'an n be Smirna teŋin la. Ne'eŋa ane toluŋ line yi one a yiiga ne nya'aŋ daan la na, one da kpi ka lem vu'ug la. 9Toluŋ la nwa. ‘M mi' ya namisug yela, ka mi' ye ya ane noŋ dim, amaa sida ya ane kpa'am dim, ka mi' pian'abe'ed din ka bane yel ye ba ane Jew dim ka ka' ala la pian'ade ya yela. Ba ane Sutaana nidib. 10Da zo yaname ye ya di fara si'a la dabiem. Kelisimi. Sutaana na ke ka ba kpen'esi ya sarega ni maki ya, ka ya na nye namisug dapiiga. Niŋimini m yadda hale ne ya kum, ka m na tisi ya piini line a nyovur. 11One bood ye o wum, ala on kelisimi line ka Wina'am Siig Suŋ la yet Wina'am nidib la. One nyaŋ yelbe'ed wusa la, kum kane paasida ayi la ku niŋ o si'ela.’ ” 12Ka man nye so' la lem yeli m ye, “Som ne'eŋa n tis malek one be Wina'am nidib sa'an n be Pergamum teŋin la. Ne'eŋa ane toluŋ kane yi one mor su'uraug dine ka li tuon ne nya'aŋ wusa dit la na. 13Toluŋ la nwa. ‘M mi' ye yaname be si'el la ane zin'ikan ka Sutaana na'am gbauŋ be. Amaa ya sid doli m, hale saŋa kan ka ba daa ku Antipas one sid diti m kaset tisid nidib la, zin'ikan ka Sutaana be la ya ni, ya daa kpelim niŋidi m yadda. 14Amaa ya taal ane anwa bi'ela. Sieba bee ya ni ka dol Balaam pa'alug one da pa'al Balak on na niŋ si'em ke ka Israel dim tum tuumbe'ed. O da ke ka ba di ba'ar diib, ka me ke ka dap ne po'ab sa'am taaba. 15Ala men, yanam me mor nidib ya ni ka ba dol Nikolaitan dim pa'alug. 16Tiakimini ya sueya. Ya'a ka' alaa, m na kena zab ne nimban dim ne su'uraug dine line na yi m noorin na la. 17One bood ye o wum, ala on kelisimi line ka Wina'am Siig Suŋ la yet Wina'am nidib la. One nyaŋ yelbe'ed wusa la ka m na tis o diib line yit saazug na la sieba ka o di, ka tisi ba wusa yinni yinni kugpiel line zug ka yu'ur paal sob, ka so' zi'i lii, asee one di'e li la.’ ” 18Ka man nye so' la lem yeli m ye, “Som ne'eŋa tis malek one be Wina'am nidib sa'an n be Tiatira teŋin la. Ne'eŋa ane toluŋ kane yi Wina'am Biig one nini wenne bugum pielim ne, ka o noba nyeen wenne anzurifa line ka ba sas ne. 19Toluŋ la nwa. ‘M mi' ya tuuma ne ya noŋilim ne ya yadda niŋir ne yaname niŋid si'el la'am ne ya sumodigir, ka lem mi' ye ya tum nannanna gat yaname daa deŋi tum yanam daa pin'ili doli m si'em la. 20Amaa mane nye ya taal si'em nwa. Ya siak Jezebel one a po'a ka yel ye o ane Wina'am nodi'es la, ka o bee ya ni, ka pa'an ka ma'adi m tumtumnib, ka po'ab ne dap sa'amid taaba, ka dit bada diib. 21M tis o saŋa ye o tiak o tuumbe'ed, amaa o pu bood ye o bas o tuumbe'ed laa. 22Dinzug m na ke ka o digin ne namisug. Ka bane la'as ne o n tum tuumbe'ed la, ya'a pu bas ba tuumbe'ed la, ban me na namis bedego. 23M na ke ka o biis kpi. Ka Wina'am nidib wusa na baŋ ye mane a one mi' nidib potenda ne ba boodim la, ka yo so' mekama wusa o tuuma yood. 24Amaa ya sieba bane be Tiatira ka pu dol pa'alkaŋaa, ka me pu zamis line ka sieba buon Sutaana yelsua'ada laa, m ku mor yeel sieba zi'ili ya. 25Amaa ya gban'am line ka ya mor la kiŋ kiŋ hale ne man na ti kena. 26- 27One nyaŋ yelbe'ed wusa la, ka kpelim niŋid man boodim, ka kudin ku basi, m na tis o paŋ kan ka m di'e m Ba' Wina'am sa'an la buudi, ka na tis o teens wusa paŋ ka o na so'e ba ne paŋ ka sa'ami ba, wenne one mor kunt dansaar nwa'ad duguda ka li liebid sawies ne, 28ka me tis o bekeeung nwaddar la. 29One bood ye o wum, ala on kelisim dine ka Wina'am Siig Suŋ la yet Wina'am nidib la.’ ”

will be added

X\