NIER PA'ALUG 19

1Ne'eŋa nya'aŋ ka m wum nidib bedego kukoya vuud arazana ni ka li ye, “Zun'omi Wina'am. Ka yolisim ne na'asi ne paŋ ane o din. 2O kad saria ne sida ne yelmeŋir. Ka kad po'agoondtita'ar one sa'am dunia ne o tuumbe'ed la saria, ka namis o, on ke ka o tumtumnib la kpi la zug.” 3Ka nidib la lem tans ya'as ye, “Zun'omi Wina'am. Ka bugum n dit teŋtita'ar si'a la nyo'os dut ne agol saŋa dine ka' benne.” 4Ka kpeenmnam pisi ne anaasi la ne bunvoeya anaasi la vabin n zun'e Wina'am one zin'i na'am gbauŋ zug la n siak ye, “Ami. Zun'omi Wina'am.” 5Ka kukor yi na'am gbauŋ la ni na ye, “Yanam bane a Wina'am tumtumnib, tadimnam ne kpi'emnam bane zot Wina'am la, zun'om Wina'am.” 6Ka m lem wum kukor dine vuud wenne nidib bedego vuud ne ka wenne ku'om surugid ne paŋ si'em ne satansug tita'ar ne, ka li yel ye, “Zun'omi Wina'am, Zugsob Wina'am tita'ar la a na'ab la zug. 7Keli ka ti maal sumalisim ka ti sunya malis, ka ti na'as Wina'am. Ka Pe'ebil la po'adiir la saŋa paaeya, ka po'a la me ti'ebi ya. 8Ka po'a la mor suer na ye fupielis line nyeen ka a nyain.” (Fupielis la ane Wina'am nidib popielim tuuma.) 9Ka malek la yeli m ye, “Som ne'eŋa ye, ‘Yelsum be ne bane ka ba buoli ba ye ba kenn Pe'ebil la po'adiir di'ema ni la na.’ ” Ka lem ye, “Bama a Wina'am pian'ad ameŋa.” 10Ka m vabin o tuon ye m na'as o. Amaa ka o yeli m ye, “Da niŋ alaa. Ka man ane fu tumtum tiraan ne fu ba'abiis bane mor Yesu Kiristo kaset suŋ la. Zun'om Wina'am.” Yesu kaset la ane line ka Wina'am Siig la nie pa'al. 11Ka m nye ka arazana yo'og, ka wedpiel be anina, ka one ban'ad o la yu'uri buon Yelsida Sob. Ka o kat saria ka zabid zaba ne sida. 12O nini daa wenne bugum pielim ne, ka o pit na'am zugpibis bedego o zugin. Ka o mor yu'ur ka li sobi o ni ka so' zi'i lii, asee on gullim. 13Ka o daa ye fuug line ka ba los ziimin. Ka yu'ur kane ka ba buon o la ane Wina'am Pian'ad. 14Ka arazana zabzabidib ye fupielis line a nyain n ban'ad wedpielis dol o. 15Ka su'uditiŋ daa yi o noorin na. Ka o na zaŋi li zabi nyaŋ buudi wusa ka o so'e ba ne paŋ, wenne kunt dansaar ne. Wina'am tita'ar la supeen la lu ba zut wenne ban yiti noodi nwiakid veen si'em la. 16Ka yu'ur kane daa sob o fuugin ne o gberin la ane, Na'anam Na'ab ne zugsobnam Zugsob. 17Ka m nye malek ka o zi'e winigin, ka yel niis bane ian'ad agol ne kukotita'ar ye, “Kemi na la'as Wina'am di'ema tita'arin la n di, 18ka onb na'anam niŋgbina ne zabzabidib kpeenmnam la ne zabzabidib ne widi ne wedban'adib ne nidib wusa, bane a yamis ne bane ka'a yamise ne tadimnam ne kpi'emnam la wusa niŋgbina.” 19Ka m nye bunyua la ne dunia na'anam ne ba zabzabidib ka ba la'as ye ba zab ne one ban'ad wief la ne o zabzabidib. 20Ka ba gban'e bunyua la ne o ziri nodi'es one daa maan nyalima n ma' bane mor bunyua la zanbina ne bane na'as o win la, ka nok bunyua la ne ziri nodi'es la ka ba nan voe n lobi ba bas mo'ar line pe'el ne bugum ne tan line nyelig n dit wuu bugum la ni. 21Ka su'ug kane daa yi wedban'ad la noorin na la kuu o dataas bane kpelim la. Ka niis wusa dii ba niŋgbina n tig.

will be added

X\