NIER PA'ALUG 18

1Ne'eŋa nya'aŋ ka m lem nye malek so' ka o yi arazana ni n sigid na. O daa mor paŋ tita'ar, ka o paŋ ke ka dunia wusa nie nyain pe'es. 2Ka o tans n yel ne kukotita'ar ye, “Babilon teŋtita'ar la sa'ameya. Li sid sa'ameya, ka yu'un kilim zin'i kan ka sibe'ednam ne kikiris ne niis bane a bunbe'ednam ka ba ne'esid ba la pe'el anina. 3O daa ke ka buudi wusa mor ya'amleog ne po'agoondir la. Ka po'agoondir la ne dunia na'anam digin sa'am taaba. Ka o po'agoondir kpan'am la ka o more dit yoog yoog la, ke ka dunia kpikpinnib nye kpan'am o ni. Linzug ka o sa'am la.” 4Ka m wum Wina'am kukor ka li yi arazana ni na ye, “M nidiba, yimi ne o sa'an na, ka ya da la'as ne o tum tuumbe'ed, ka me namis ne oo. 5Bozugo o tuumbe'ed la la'asne du n zem wuu zuer n bood saazug paar. Ka Wina'am tenri o tuumbe'ed la wusa. 6Niŋim o wuu on yiti niŋid si'em la, ka yo o, o tuuma yood abuyi. Pe'elim o butiŋ ne daam kane kpi'emi noor ayi n gaad on yiti kuan'ad si'em la. 7Tisimi o namisug ne susa'aŋ n zem wuu on daa yiti tisid o meŋ na'asi ne bunsuma si'em la. Ka o yeti o meŋ ye, ‘Man po'ana'ab nwa, m ka' pokoonre, m ku baŋ namisug ne susa'aŋa.’ 8Ka on yet si'el la zug namisug na sigi o zugin daar yinni na, ka wiim ne susa'aŋ ne ko'om na gban' o, ka bugum na di o. On Zugsob Wina'am one kat o saria la mor paŋ tita'ar.” 9Dunia na'anam bane digin ne o ka dit malisim ne o bunsuma la, ya'a ti nye o bugum diib nyo'os, ba na kaas o yela, 10ka zoo o namisug la dabiem n zi'e lalli n yel ye, “Oi, oi, Babilon, Babilon teŋ tita'ar kaŋa ta'am nyet namisug nannanna yimoo!” 11Ka dunia kpikpinnib me kaas ka fabul o zug, so' kae' na len da'a ba la'ad la zug. 12So' pu len da'adi ba salima ne anzurifa ne kugvenla, ne fusuma ne fuzen'es ne fubane nyeen kil kil, ne daad bane buudi wusa nyuugo malis la, ne la'abane ka ba zaŋ wabug nyina bee daad bane ligidi zu'e bee anzurifa bee kunt bee salima kuga n maal la, 13ne kakaduru ne si'el ka li me wenne kakaduru ne tudaare ne mir ne frankinsense, ne daam ne kpaam ne zom ne ki ne niigi ne pe'is ne widi ne widi terokonam ne yamis ne ninsaalib nyovuya men. 14Ka kpikpinnib la yet o ye, “La'abane ka fu bood ye fu moren la, ne fu kpan'am ne fu la'avenla gaadeya, ka fu ku len nyee ba ya'asa.” 15Ka kpikpinnib bane kuosid la'abama ka nyet kpan'am o sa'an la na zo o namisug la dabiem n zi'eni lalli ka kaas ka fabul ka ye, 16“Oi, oi, teŋtita'ar, line wenne po'a one ye fusuma ne fuzen'es ne salima ne kugvenla la'ad bedego. 17Kpan'am kaŋa nwa ta'am sa'amne nannanna yimmo.” Ka aaruma dim ne nimbane kpen'ed aaruma n ken, ne nimbane tum aaruma tuuma ne bane ken ne aaruma n kpimisid la 18zi'e teŋin ka nye o bugum diib nyo'os ka zi'e lalli n kaas ye, ba nam zi' nye teŋtita'ar ka li a wuu ne'e. 19Ka gbin'e titan bugi ba zut ne uusug ka kaas ka fabul ka ye, “Oi, oi, teŋtita'ar kane ka bane mor aaruma ateukun kpimisidi nyeti ba kpan'am yiti o arazak ni la, ta'am sa'amne nannanna yimmo.” 20Ka kukor yi arazana ni n yel ye, “Arazana dim ne Wina'am nidib ne o Tumtumnib ne o nodi'esidib la, maalim sumalisim. Bozugo Wina'am kad teŋ la saria ka saans o, on daa niŋi ba si'em la zug.” 21Ka malektita'ar teŋe kugir dine zem wuu neertita'ar ne n lob ateukun la ka yel ye, “Ba na ti uk Babilon teŋtita'ar la n lob anwa n sa'am. Ka so' kudin ku len nyee li ya'asa, 22ka me kudin ku wum ka so' nwe' kon ne bee yu'um yuuma bee piebid wiig bee na'atan teŋ la nii. Ka nidib me ku len tum tuumsi'a aninaa, ka me ku len wum neer la vuude. 23Ka fitla bugum ku len nie aninaa, ka dau me ku len di po'a ya'asa. Teŋ la kpikpinnib bane daa a kpi'emnam dunia ni, ka teŋ la zaŋi li ba'ad bugub la n ma' buudi wusa.” 24Ka Wina'am nodi'esidib ne o nidib ne bane ka ba daa kuu ba dunia ni wusa la da kpi Babilon teŋ nu'usin. Dinzug ka Wina'am sa'ami li la.

will be added

X\