NIER PA'ALUG 17

1Ka maleknam ayopoi bane moren laasa ayopoi la yinni kenn m sa'an na ye, “Kem na, ka m pa'al uf ban ye ba namis po'agoondir tita'ar one a teŋtita'ar line kpi'e kolis bedego la si'em. 2Dunia na'anam la tum dian'ad tuuma ne po'agoondir la, ka nidib bane be dunia ni la me niŋ ala.” 3Ka Wina'am Siig Suŋ la daa more m ka malek la zee m keŋ moogin. Ka m nye po'a ka o ban'ad bunyua zin'a, ka yuda line tu'ud Wina'am sobi gilig bunyua la niŋgbiŋ wusa. Ka bunyua la daa more zuta ayopoi ne iila piiga. 4Ka po'a la daa yene fuzen'ug ne salima la'ad ne kugvenla bedego, ka mor salima butiŋ line pe'el ne bunbe'ed line yi o tuumbe'ed ni la. 5Ka yu'ur daa sob o gbe'ugun ka li gbin pu nie. Ka yu'ur la daa ane, Babilon Tita'ar la, Po'agoonda Ma ne Dunia Bunbe'ed Wusa Ma. 6Ka m nye ka po'a la nu Wina'am nidib ne nimbane daa niŋ Yesu yadda ka ba kuu ba la ziim n kool. Man daa nye o la, li daa lidigi m. 7Ka malek la bu'osi m ye, “Bo ka fu lidig ala? M na pa'al uf po'a la ne bunyua one ka o ban'ad ka o mor zuta ayopoi ne iila piiga la yelsua'adir la gbin. 8Bunyua one ka fu nye la da voe saŋsi'en, ka pu lem voeya, ka na naam bumbok zuluŋ la ni du na. Ka o ya'a du na o na keŋ zin'ig kan ka o na sa'am la ni. Ka nidib bane be dunia ni ka ba yuda pu sob nyovurpaal dim gbauŋin la ka dunia nam pu pin'il la, na gos bunyua la ka li lidigi ba. Bozugo bunyua la da voe, ka pu lem voeyaa, amaa o na lem vu'ug ya'as. 9“Ne'eŋa boodne ya'am ne mi'ilim. Zuta ayopoi la ane zueya ayopoi bane ka po'a la zin'i ba zut la. 10Ba me ane na'anama ayopoi. Ka anu kpi, ka one pe'es ayuobu la a na'ab nannanna, ka yinni nam pu di na'am. O ya'a ti di na'am o na be dabisa bi'ela. 11Ka bunyua one da voe ka pu lem voe la, pe'es anii na'anama ayopoi la ni, ka na keŋ zin'ikan ka o na sa'am la ni. 12“Ka iila piiga ban ka fu nye la ane na'anam piiga, amaa ba nam pu di'e na'am laa. Amaa ban ne bunyua la na ti la'ase di'e na'am la saŋa bi'ela. 13Ka ba piiga la na mor noor yinni ka tis bunyua la ba paŋ ne ba kpi'euŋ. 14Ba na zab ne Pe'ebil la, ka Pe'ebil la ne o nya'andolib bane ka o da buoli ba o sa'an ka gaŋi ba la ka ba a sida dim la, na zabi nyaŋ bunyua la ne na'anam la, bozugo Pe'ebil la n a zugsobnam Zugsob ne na'anam Na'ab la zug.” 15Ka malek la yeli m ye, “Mo'abane ka fu nye ka po'a la be ani la, ane nidib ne tigir ne buudi kon'ob kon'ob ne pian'ad kon'ob kon'ob. 16Ka iila piiga bane ka fu nye la ne bunyua la na kisig po'agoondir la, ka zaŋ on mor si'el wusa ka bas o biel, ka onbi o niŋgbiŋ ka ke ka bugum di o. 17Ka Wina'am ke ka ba niŋ o boodim ka ba siak tis bunyua la ba na'am paŋ n ti paae saŋkan ka Wina'am pian'ad la na ti niŋ ameŋa. 18Po'a kane ka fu nye la ane teŋtita'ar line so'e dunia na'anam wusa.”

will be added

X\