NIER PA'ALUG 16

1Ka m wum tansug n yit pu'usum yin la n yet maleknam ayopoi la ye, “Kem kpa'e Wina'am supeen line pe'el laas ayopoi la dunia zug.” 2Ka yiiga malek la keŋ kpa'e o din dunia zug. Ka fen'ed pon'osa bane zabid naam bane mor bunyua la zanbin ne bane na'asidi o win la niŋgbina ni. 3Ka malek one pe'es ayi la kpa'e o dine niŋ ateukun. Ka ateuk la ku'om tiake wenne one kpi ziim ne, ka bunvoeya bane be ateukun la wusa kpi. 4Ka malek one pe'esa atan' la kpa'e o dine niŋ kolis ne ku'obulis ni, ka ku'om la kilim ziim. 5Ka m wum malek one kpa'e o din ku'omin la ka o yel Wina'am ye, “Fune a su'um nyain, ka da be, ka kpelim be la. Ka fu saria ban ka fu kat la ane sida. 6Ka nidib daa ku fu nidib ne fu nodi'esidib ka ba ziim yi, ka dinzug ka fu tis bane kuu ba la ziim ye ba nu. Ban narin ye ba di'en si'eli la.” 7Ka m wum kukor ka li yi maan maalug zin'igin la ni na ye, “Zugsob Wina'am tita'ar, fu saria kadib la ane sida ne su'um.” 8Ka malek one pe'es anaasi la kpa'e o din winig la zug. Ka ba tis winig la paŋ ye o di nidib la wuu bugum ne la. 9Ka nintaŋ tuulug la daa di nidib, ka ba tu'ud Wina'am one so'e yeltood bama la yu'ur. Amaa ba pu tiake ba sueya n na'as Wina'am. 10Ka malek one pe'es anu la kpa'e o din niŋ bunyua la na'am gbauŋ la zug. Ka bunyua la so'olim wusa lieb lik. Ka nidib dumi ba zilima ba niŋgbina toog la zug, 11ka tu'ud Wina'am one be arazana ni la ba niŋgbina zabir ne ba fen'ed la zug. Amaa ba pu tiake ba sunya n basi ba tuumbe'ed laa. 12Ka malek one pe'es ayuobu la kpa'e o dine niŋ mo'atita'ar Yifiretis ni, ka mo'ar la kudig ka ke suer n tis na'anam bane yi ya nya'aŋ na la. 13Ka m nye kikiris atan' ka ba wenne lomis yi dragon la noorin ne bunyua la noorin ne ziri nodi'es la noorin na. 14Ba ane Sutaana kikiris bane maal bunnyalima ka yi keŋ dunia na'anam wusa ni n la'ase ba kenn tanpin na, Wina'am one galis la dabis tita'ar la ni. 15Wina'am yel ye, “Kelisimi, m kenna wenne na'ayiigi ken si'em la. Sumalisim be ne one nei ka pu gbise, ka ye o fuud ye o da keŋ bieli ka nidib nye o nyane.” 16Ka kikiris la la'as na'anam la keŋ zin'ikan buon Armageddon ne, Hibiru dim pian'ad la ni. 17Ka malek one pe'esa ayopoi la kpa'e o din pebisim ni. Ka kukotita'ar yi na'am gbauŋ dine be pu'usum yin la na ye, “Li naaeya.” 18Ka sayan'asug ne vuud ne satansug daa naam ka teŋ daa dam bedego. Teŋ nan zi' dam hale baa ninsaal pin'ilugin saa. Ne'eŋa daa a teŋdambe'edi gaad wusa. 19Ka teŋdamug la pudug teŋtita'ar la zin'isa atan'. Ka dunia teens la wusa sa'am. Ka Wina'am tienn Babilon teŋtita'ar la yela, ka ke ka o nu o supeen tita'ar butiŋ daam la wusa. 20Teens bane ka ku'om giligi ba la daa melim, ka zueya wusa biris. 21Sakuga titada bane ka ba yinni tebisim zem wuu yoor ne ku'om, yit agol n lut nidib zutin. Ka ba tu'ud Wina'am, sakuga namisidi ba la zug. Li daa ane namis tita'ar.

will be added

X\