NIER PA'ALUG 15

1Ka m lem nye bunnyaluŋ tita'ar si'a line a zanbin n be arazana ni. Ka li a maleknama ayopoi ne yeltood ayopoi. Bama a yeltood bane kpelim nya'aŋ la, bozugo ba ya'a ti naae, Wina'am supeen la me na ti naae. 2Ka m nye si'el line wen wuu mo'ar line a nyain wuu gotiŋ ne, ka gendig ne bugum. Ka m lem nye bane zabi nyaŋ bunyua la ne o win ne o yu'ur kal la, ka ba zi'eni kpi'e mo'ar la mor kona dine ka Wina'am tisi ba la ba nu'usin, 3ka yu'um Wina'am tumtum Moses ne Pe'ebil la yuuma ye, “Zugsob Wina'am tita'ar, fune tum tuumtitada ne tuumnyalima. Fune a buudi wusa na'ab, ka fu tuuma sueya a su'um ne sida. 4Zugsoba, fun gullim a su'um, ano'one ku zo fu dabiem ka zun'e fu yu'ure? Buudi wusa na kena n zun'e fu, bozugo fu popielim tuuma la nie paalo ni.” 5Ne'eŋa nya'aŋ ka m gosi nye ka arazana pu'usum yir la yo'og, ka fuug doog line pa'an Wina'am beilim la be anina. 6Ka maleknama ayopoi bane mor yeltood ayopoi line kpelim nya'aŋ la, yi pu'usum yin la na ye fupiela bane a nyain, ka salima senbidis loo ba nyo'od. 7Ka bunvoeya anaasi la yinni nok salima laas ayopoi line ka Wina'am one be saŋa line ka' ben la supeen pe'eli ba ni la tis maleknama ayopoi la. 8Ka Wina'am na'asi ne o paŋ pe'el pu'usum yir la wenne nyo'os ne. Ka so' daa ku tun'e kpen' li nii, asee saŋkan ka yeltood ayopoi bane ka maleknama ayopoi mor la ti naae.

will be added

X\