NIER PA'ALUG 14

1Ka m gos ka Pe'ebil la zi'e Zion zuerin Jerusalem ni. Ka nidib tusa kobuga ne tusa piisnaasi ne tusa anaasi bane mor o yu'ur ne o Ba' yu'ur la ka li sob ba gbe'edin ka zi'e o sa'an. 2Ka m wum kukor ka li yi arazana ni na vuudi wenne ku'osusuud tita'ar ne satansug tita'ar ne, ka me wenne kon nwe'edibi n nwe'edi ba kona si'em la. 3Ka ba zi'e na'am gbauŋ ne bunvoeya anaasi ne kpeenmnam la tuon ka yu'um yuum paal dine ka so' ku tun'e zamise, asee nidib tusa kobug ne tusa piisnaasi ne tusa anaasi bane ka Wina'am faaenn ba dunia ni la ma'aa. 4Ba ane dap bane luaki ba meŋ ne po'ab ka a nyain, ka dol Pe'ebil la ken zin'ikan ka o ken wusa, ka nye faangir ninsaalib soogin, ka a yiiga bun wela bane ka ba zaŋi tis Wina'am ne Pe'ebil la. 5Ziri pian'ad pu yi ba noorin ne, ka ba me pu mor taale. 6Ka m nye malek so' ka o ian'ad saa agol ka mor labasuŋ kane ka' naare, ye o mooli li tis nidib wusa bane be dunia ni, la'am ne teŋgbana ne buudi pian'ad wusa, 7ka tans n yel ye, “Zom Wina'am ka zun'e o yu'ur la, bozugo saŋa kan ka o na kad nidib saria la paae na. Zun'om Wina'am one maal arazana ne dunia ne mo'a ne ku'obulis wusa la.” 8Ka malek one pe'es ayi n dol yiiga daan la ye, “Babilon teŋtita'ar la sa'ameya. Li sid sa'ameya. Teŋ la daa wenne po'agoondir ne ka ke ka nidib buudi wusa tum tuumbe'ed ne o wenne daam line kpi'em ka o tisi ba ka ba nu ne.” 9Ka atan' daan dol yiiga maleknama ayi la n tans yel ye, “So' ya'a zun'e bunyua la ne o win ka di'e zanbin la o gbe'ugun bee o nu'ugin, 10Wina'am sunf na pelig ne o wenne daam line kpi'em line ka o kpa'e ne supeen n niŋ o butiŋin la n ke ka o nuu li. O na namis maleksuma ne Pe'ebil la tuon n kpen' bugumin ne tan line nyelig ka tul bedego la ni. 11Ka so' ya'a di'e bunyua la zanbin la bee zun'e li ne li win, o na namis bugum dine ka li nyo'os dut agol saŋa dine ka' ben la ni, ka ku nye vu'usum nintaŋ bee yu'uŋo.” 12Linzug li a su'um ye Wina'am nidib bane siak o noyelug ka dol Yesu ne yadda niŋir la, modigim. 13Ka m wum kukor ka li yi arazana ni na ye, “Som ne'eŋa. Line yi zina ken sa, yelsum be ne bane dol ne Zugsob la ka kpi la.” Ka Wina'am Siig Suŋ la siak ye, “Sida, ba na vu'us ne tuumkpi'ema ka ba tuumsoma na doli ba.” 14Ka m gosi nye saŋgbauŋ piela ka so' wenne Ninsaal Biig zin'i li zug n pid salima zugpibig o zugin, ka mor gon'og line noore dit o nu'ugin. 15Ka malek so' yi Wina'am pu'usum yin la n yel one zin'i saŋgbauŋ zug la ne kukotita'ar ye, “Nokim gon'og la bun, bozugo saŋa la paaeya, ka dunia la bi'igi siak bunib.” 16Ka one zin'i saŋgbauŋ la zug zaŋ o gon'og la kia dunia ka buni li. 17Ka malek si'a yi arazana pu'usum yin la na, n me mor gon'og line noor dit. 18Ka malek one so'e bugum la yi maan maalug zin'ig na yel malek one mor gon'og line noore dit la ne kukotita'ar ye, “Nokim gon'og la n pon' veen tiis wela dunia ni. Ka dunia la wenne veen tiis lombon'og ka li wela la bi'igi ya.” 19Ka malek la nok o gon'og la n pon' veen wela dunia ni, ka nok wela la niŋ zin'ig kan ka ba nwiakid wela ku'om la. Wela la nwiakir wenne Wina'am supeen tita'ar ne. 20Ka ba yi teŋ la kpeŋ n nwiak wela la, ka ziim yi zin'ikan ka ba nwiak li la wenne mo'ar tita'ar ne. Ka li wa'alim a wuu maila kobus yi. Ka wief ya'a sigin li ni, li zuluŋ na paae o salibir.

will be added

X\