NIER PA'ALUG 12

1Ka si'el nie arazana ni, ka mor gbin sua'adir. Po'a daa be, ka o fuug daa ane nintaŋ la. Ka nwadig la bee o noba teŋirin. Ka na'am zugpibig bee o zugin, ka nwadibibis pii ne ayi bee li ni. 2Ka o mor poog ka o sa'ar la toe la ke ka o kaas n bood ye o du'a. 3Ka si'el lem nie arazana ni ya'as, ka wenne bunyua zin'a tita'ar line ka ba buon dragon, ka mor zuta ayopoi ne iila piiga. Ka na'am zugpibis pibili o zut la wusa. 4Ka nwadibibis pudug zin'is atan' ka dragon la uk o zuur n da'e pudugir yinni yiis saŋgbauŋin n bas dunia ni na. Ka o zi'e po'a one bood du'am la tuon n gur ye po'a la du'a ka o ob o biig la. 5Ka po'a la du'a biribiŋ one na so'e buudi wusa ne paŋ. Ka ba daa ze biig la mor o keŋ Wina'am ne o na'am gbauŋ la sa'an. 6Ka po'a la zo keŋ moogin. Ka anina ka Wina'am maal zin'igi digil po'a la, zin'ikan ka ba na gos o dabisa tusir ne kobus yi ne piisyuobu. 7Ka zaba ko' arazana ni. Ka malek kpeenm Maikel ne o maleknam la zab ne dragon one la'as ne o maleknam ka ba zab ne Maikel. 8Ka ba daa nyaŋ dragon ne o maleknam la, ka ba len ka' suer na be arazana ni ya'asa. 9Ka ba daa nok dragon tita'ar la lobi yiis. Dragon ane waaf kan da be kudumin sa, ka o yu'ur buon kikiris na'ab, bee Sutaana, ka ma'ad dunia wusa la. Ka ba yiis o ne o maleknam lobi sigis dunia ni na. 10Ka m wum kukotita'ar arazana ni ka li yel ye, “Nannanna Wina'am faangir la ne o paŋ ne o na'am saŋa la sid paa na ka o Kiristo paŋ saŋa me paa na, bozugo ba nok one gbi'idi ba ba'abiis niŋi Wina'am tuon nintaŋ ne yu'uŋ la lobi yiis arazana ni. 11Ka ba ba'abiis la nok Pe'ebil la ziim ne sida dine ka ba mool la n zab, ka pu zo ba nyovur naare ka siak ye ba kpi. 12Ka dinzugo arazana ne ban bane wusa be anina la maalimi sumalisim. Amaa susa'aŋ be n tis teŋgbauŋ ne ateuk bozugo Sutaana sigi ba ni na, ka o sunf pelig hale on mi' ye o saŋa kpelim bi'ela la zug.” 13Ka dragon la baŋ ye ba nok o lob sigis dunia ni na la, o daa kad po'a one du'a biig la ye o gban'e o. 14Ka ba daa tis po'a la niiŋ tita'ar kpukpama ayi ye o ianki keŋ o zin'ig line be moogin la, zin'ikan ka ba na gur o yuma atan' ne pusuk n yiis o waaf la zaba ni. 15Ka waaf la puus ku'om ka li yi o noorin na, wenne mo'ar ne n dol po'a la ye ku'om la di o. 16Amaa teŋ daa suŋ po'a la tans tans mugulim n fuenn ku'om dine yi dragon la noorin na la. 17Ka dragon la suunr pelig ne po'a la hale, ka o keŋ ye o zab ne po'a la yaas bane kpelim n siak Wina'am noyelug ka yet nidib Yesu yela la. 18Ka dragon la zi'e mo'ar gbeug.

will be added

X\