NIER PA'ALUG 11

1Ka so' daa tisi m makir dibir, ka yeli m ye, “Duom mak Wina'am pu'usum yir la ne maan maalug zin'ig la, ka kaal bane pu'usid Wina'am pu'usum yin la. 2Amaa da mak pu'usug yir saman laa, bozugo ba zaŋi li tis bane ka' Wina'am nidib ka ba na noodi giligid Jerusalem Teŋsuŋ la n sa'amidi li, nwadis piisnaasi ne ayi. 3Ka m na tumi m nidiba ayi bane na sid pian'ad m yela la, ka ye boto fuud, ka tisi ba paŋ ka ba di'es Wina'am pian'ad n tis nidib dabisa kobus piiga ne ayi ne piisyuobu.” 4Nidib ayi bama ane Olive tiis ayi ne fitla ayi bane zi'e dunia Zugsob la tuon la. 5Ka so' ya'a zig ye o poa'alimi ba, bugum yitne ba noya ni na sa'ami ba dataas la. Ka ala ka ba kuud one zig ye o poa'alimi ba. 6Ka ba mor paŋ na gban'e saa, ka saa ku ni saŋa kam ka ba tumi ba nodi'esug tuuma, ka lem mor paŋ na ke ka ku'om kilim ziim, ka me mor paŋ na zaŋ yeltood buudi wusa poa'alim dunia dim saŋa kan ka ba bood. 7Ba ya'a ti naae labaar la moolug, bunyua one yi bumbok dine ka' ben ni na la na zab ne ba ka nyaŋe kuu ba. 8Ka ba niŋgbina na dig teŋtita'ar kan ka ba da kpa'a ba Zugsob dapuudir zug la sueren. Yuda line pa'al teŋ la a si'em ane Sodom ne Egipiti. 9Ka nidib bane yi buudi ne pian'ad ne teŋgbana wusa ni na, na gosi ba niŋgbina daba atan' ne pusuk, ka ku ke ka ba mumi baa. 10Ka dunia nidib sunya na ma'ae nidib ayi nwa ku'um la yela. Ka ba na maal sumalisim ka tis taaba piini, bozugo nodi'esidib ayi nwa la ke ka nidib namisid dunia ni. 11Ka daba atan' ne pusuk la nya'aŋ, vu'usum line tisid nyovur la daa yi Wina'am sa'an kena kpen'e ba ni ka ba vu'ug. Ka dabiem bedego kpen' bane nyee li la. 12Ka nidib ayi la wum ka kukotita'ar yi arazana ni na yeli ba ye, “Dumi kpen' na.” Ka ba dataas la gosidi ba ka ba kpen'ed saŋgbauŋin dut arazana ni. 13Ka saŋa kan yim, ka teŋ daa dam hale. Ka Jerusalem teŋ la pudug zin'is piiga la, yinni daa lu n sa'am. Ka nidib tusa ayopoi daa kpi teŋ la daa dam la yela. Ka dabiem kpen' nimbane kpelim la, ka ba na'as Wina'am one be arazana ni. 14Susa'aŋ dine pe'es ayi la gaadeya. Amaa gosimi, susa'aŋ dine pe'esid atan' na kenn nannanna na. 15Malek one pe'es ayopoi la pieb o na'atan la, ka kukotita'ar vuud arazana ni n yet ye, “Dunia so'olim kilim ti Zugsob ne o Kiristo la din, ka o a na'ab saŋa dine ka' ben la.” 16Ka kpeenmnam piisi ne anaasi bane zin'i ba na'am gbana zut Wina'am tuon la, vabin teŋin n zun'od Wina'am yet ye, 17“Ti pu'usid Zugsob Wina'am tita'ar, one be ka da be la bareka, on zaŋi o paŋ tita'ar la ka pin'il o na'am la zug. 18Ka bane ka' Wina'am nidib la sunya da due bedego, amaa o supeen saŋa paa na ka o na kad bane kpi la saria, ka yoo o tumtumnib bane aa o nodi'esidib, ne o nidib bane na'as o, kpi'emnam ne tadimnam la, ka sa'am bane sa'am dunia la.” 19Ka Wina'am pu'usug yir dine be arazana ni la yo'og ka ba nye daka dine pa'al nonaar dine ka Wina'am zi'el o nidib la. Ka sayan'asug ne vuud ne satansug ne teŋdamug ne sakuga bedego daa naam.

will be added

X\