1 Yela ban ka Yesu Kiristo daa nie pa'al o tumtumnib la sobne gbauŋ kaŋa ni. Wina'am daa tis o yelbama ye o bigis Wina'am tumtumnib lin ku yuuge ka yelbane na kena. Kiristo daa tumne o malek o tumtum Joon sa'an ka o yel o yelbama. 2 Joon daa yel bun lin ka o nye la wusa. Ka ne'eŋa wusa ane labaar kane yi Wina'am sa'an na la, ne yelsida lin ka Yesu Kiristo daa yiis la. 3 Yelsum be ne one karem Wina'am noor pian'auk kane ka o nodi'es daa pian' la ne bane wumi li ka siak bun line sob gbauŋ kaŋa nwa ni la. Bozugo saŋa la li'eliya ka ne'eŋanam na niŋ. 4 Man Joon sobid gbauŋ kaŋa n tisid Wina'am nidib bane la'as teensa ayopoi bane be Asia so'olimin la. Wina'am one da be, ka kpelim be, ka na ti be sa ne siisa ayopoi bane be o na'am tuon la, 5 ne Yesu Kiristo one yet Wina'am yela ne sida ka a one da vu'ug kumin yiiga la ka a dunia na'anam na'ab la na tisi ya yelsum ne sumalisim. Yesu Kiristo noŋi ti ka kpi ka o ziim yi ye o yiisi ti ti tuumbe'edin 6 ka ke ka ti a na'anam ne maalmaanib ye ti tum n tis o Ba' Wina'am. O na nye zun'or ne na'am saŋa dine ka' benne. Ami. 7 Gosimi, one kenna ne saŋgbana la. So' mekama na nye o, la'am ne bane kuns o la men. O ya'a ti kena, dunia buudi wusa na kum ban zot o la yela. Sida, li na niŋ. 8 Zugsob Wina'am la a one mor paŋ wusa ka da be, ka be, ka na ti be la yel ye, “Mane a Alfa ne Omega, ka a si'el wusa pin'ilug ne li naar.” 9 Man Joon ane ya ba'abiig one la'as ne ya Yesu so'olimin, ka dit fara ka modigid ne ya, tinam a yinni ne Yesu la zug. Man daa moon Wina'am pian'ad ka yet man mi' si'el Yesu Kiristo yela la zug, ka ba daa more man keŋ Patmos teŋ kane ka ku'om giligi li la. 10 Alasidaar line a Zugsob la dabisir la, Wina'am Siig Suŋ la daa kpen' m, ka m wum kukor tita'ar line kum wuu na'atani piebidi m nya'aŋ. 11 Ka li daa yel ye, “Som lin ka fu nyet la digil, ka zaŋ gbauŋ la n tolimi tis Wina'am nidib bane la'as teensa ayopoi la, ka a Efesus ne Smirna ne Pergamum ne Tiatira ne Sardis ne Filadelfia ne Laodisea dim la.” 12 Man fendigi ye m gos ye ano'one pian'ade tisidi ma, ka nye salima fitla ayopoi. 13 Ka so' zi'e ba soogin wenne Ninsaal Biig ye fuug line wa'ami paae o noba. Ka salima senbidiŋ loo o nyo'og. 14 Ka o zuobid daa pelig wenne guŋgum bee sakuga ne. Ka o nini wenne bugum pielim ne. 15 Ka o noba nyeen wenne anzurifa ka ba nyeligi li bugumin n ke ka li ma'ae ka ba sasi li ka li lieb nyain. Ka o kukor vuud wenne ku'omi zot ka su'ugid ne paŋ si'em la. 16 Ka o mor nwadibibisa ayopoi o datiuŋ nu'ugin. Ka su'uraug line dit tuon ne nya'aŋ yi o noorin na. Ka o nindaa nyeen wenne nintaŋ soos winig ne. 17 Man daa nye o la m daa igini o tuon ka wenne niŋkane kpi ne. Ka o daa zaŋi o datiuŋ nu'ug n pa'ali m zug ka ye, “Da zot dabiem. Ka mane a yiiga ne nya'aŋ daan la. 18 Mane a one voe la. M daa kpine, amaa m yu'un voe saŋa dine ka' benne, ka so'e ku'um ne ku'um teŋ wusa. 19 “Dinzug, som bun lin ka fu nyet, line be nannanna, ne line na ti niŋ nya'aŋ. 20 Nwadibibisa ayopoi line ka fu nye m datiuŋ nu'ugin ne salima fitla ayopoi la yelsua'ada la gbin ane anwa. Nwadibibisa ayopoi la ane Wina'am nidib bane la'as zin'isa ayopoi la maleknam, ka fitla ayopoi la a Wina'am nidib bane la'as zin'isa ayopoi la.”
