FILIMON 1

1Man Paul one a sarega nid Yesu Kiristo yela, ne ti ba'abiig Timoti sobid gbauŋ tisidi ti zua suŋ Filimon one a ti tumtum tiraan, 2ne ti taunn Afia ne Arkipus one a ti sogia tiraan Yesu Kiristo tuuma ni, ne Wina'am nidib bane la'ased fu yin la. 3Ti Ba' Wina'am ne ti Zugsob Yesu Kiristo na tis uf yelsum ne sumalisim. 4M pu'usid Wina'am bareka saŋa mekama ka tiendi fu yela m Winsosugin, 5bozugo m wum fun niŋ ti Zugsob Yesu yadda si'em la'am ne noŋilim line ka fu mor ne yadda niŋidib la. 6M sosid Wina'am ye tiname a yadda niŋidib ne taaba la, na ke ka ti baŋ su'uŋa ne line wusa a su'um ka aa ti din tinam a yinni ne Kiristo la. 7M ba'abiiga fu noŋilim la tis man sumalisim ka li kpe'eŋi m sunf hale, bozugo fu ma'ae yadda niŋidib la wusa sunya. 8Dinzugo m bood ye m sos uf noŋir zug, la'am ne man mor kpi'euŋ na tun'e tis uf noor la. 9Li ane man Paul one a Yesu Kiristo niŋkudug ka nan be sarega ni o yela la, 10sosid uf m biig Onesimus yela, on ka m liebi o saam m sarega beilim ni la, (Onesimus gbin ane ye tumir.) 11O daa ka' tumir saŋsi'enee, amaa o yu'un sid mor tumir man ne fu sa'an. 12Ka m lem tum o fu sa'an na, one a m nyoorin kobug. 13Li naani malisini m bedego o ya'a kpelimini m sa'an ka zi'ene fu noba zug suŋini m, man nam be sarega ni Wina'am pian'ad yela la. 14Ka m pu bood ye m tum si'el ka fu zi' li ti'ire, ka fu yelsum na a fu meŋ boodim ka ka' mugusugo. 15Daasi'eree, line ke ka o daa bas fu sa'an saŋa bi'ela la, ane ye fu lem di'e o ya'as ka o be ne uf saŋa mekama yu'us, 16ka lem ka' fu yamug ma'anee, hale o gat yamug ka yu'un a ba'abinoŋir. M noŋ o bedego, amaa fun na noŋ o gaad ala, bozugo o ane fu yamug ka me a fu ba'abiig, Zugsob la ni. 17Ka fu ya'a sid ane m dolin taa, di'em o wuu fun naani di'eni m si'em la. 18Ka o ya'a daa tum uf ne be'ed bee more fu si'el, fun nokimi li, ka li a m sam. 19Man Paul, sob ne'eŋa ne m meŋ nu'ug, ye m na yoo li wusa. Li pu narin ye m tienn uf ye fu meŋ ane sam doli man. 20Eenn, m ba'abiiga, m bood nyood fu sa'an tinam a yinni ne Zugsob la zug. Bugilimi m suunr ne line dol Kiristo la yela. 21Man baŋ ye fu na tumi m boodim la zug, ka m sobi tis uf ka mi' ye fu pun na tum ka li gaad mam yel uf si'em la. 22M bood ye fu ti'eb saam doogi digili m, ka fu Winsosugin la, m mor ti'ir ye, Wina'am na yiis m kpela tis uf. 23Epafras one ka ti la'am be sarega ni Yesu Kiristo yela la, pu'usid uf. 24M tumtum tiraan Luuk ne Maak ne Aristarkus ne Demas me pu'usid uf. 25Ka Zugsob Yesu Kiristo la yelsum na be ne ya wusa.

will be added

X\