FILIPI DIM 4

1Ala zug m ba'abiise, yanam ban ka m noŋ hale ka bood ye m nye ya la, li ket ka m mor sumalisim ka lem a m nyood la. M zuanoŋa, zi'enimi kiŋ kiŋ yanam a yinni ne Zugsob la. 2M belim ne po'abama, Yuodia ne Sintike ye ban a yinni ne Zugsob la, ba niŋim noor yinni ne taaba. 3M zoongo ameŋa, m me sosid uf ye fu suŋ po'ab la. Ba daa la'as ne man n tum Kiristo labasuŋ tuuma la ne Kelement ne tumtum taab bane kpelim ka ba yuda sob nyovur paal dim gbauŋin la. 4More sumalisim saŋa wusa yanam a yinni ne Zugsob la. Ka m na lem yel ya'as ye, more sumalisim. 5Kel ka nidib wusa nye ya suguru. Zugsob la kenna la li'elne. 6Da ke ka si'el yela paki yaa, amaa pu'usum Wina'am si'el wusa ni ne sosug la'am ne bareka pu'usug, ka o baŋi ya sosug yela. 7Wina'am na tisi ya sumalisim line gat din ka ninsaalib na baŋi li gbin ka na guri ya sunya ne ya ten'esa Yesu Kiristo ni. 8M Ba'abiise, li ba'asug ane anwa. Keli ka ya ya'am kpen'e si'el mekama line a sida, ne line mor zun'or, ne line a yelsida, ne line a popielim ne line venl, ne tuumsuma ne si'el mekama ka li a su'um ka nar pian'asuŋ. Ten'esimi bama yela. 9Niŋimi line ka ya zamis, ka di'e, ka wum, ka nye m sa'an la, ka Wina'am one tisidi ti sumalisim na be ne ya. 10Li malisi m hale Zugsob sa'an la ya ba'a lem be ne man ya'as la. Ya ba'a sid daa be ne mam, amaa ya daa ka' suer sia' na pa'ali lii. 11Li ka'ane m yel ye si'eli po'ogi ma. M pun zamis ye m beilim ya'a a si'em wusa li ku paki ma. 12M mi'ilim taduŋo a si'em ka lem mi' morem a si'em. M zamis ye m tun'e bei ne yela mekama wusa ni, li ya'a a tigir bee ko'om bee kpan'am bee noŋ. 13M tun'e tum si'el mekama wusa ne paŋ kan ka Kiristo tisidi m la. 14Ka la'am ne wala sa ya maal su'um yaname la'am suŋi m ne m namisugin la. 15Ka yanam Filipi dim mi' ye labasuŋ moolug pin'ilugin ya teŋin la, mam daa yi Masedonia ka toom la, Wina'am nidibi be teŋ si'a pu tisi m bee di'e si'eli m sa'ane asee yanam ma'aa. 16Bozugo mam daa be Tesalonika teŋin la, ya daa tum n suŋim noor bedego. 17Li ka'a piini ka mam booda, amaa m bood ye ya di'e li nyood. 18M di'e piinbane wusa ka ya tis Epafroditus ye o mor na la ka li siaki m boodim. Li wen wuu bun line ka li nyuug malis ka ba nyu'e tis Wina'am ka o di'ed ne sumalisim. 19Ka m Wina'am on ka m siak na tisi ya line mekama nar ne ya, ka li dolne o kpa'am tita'ar line be Yesu Kiristo ni la. 20Ti Ba' Wina'am na nye zun'or saŋa kane ka' benne. Ami. 21Pu'usum Wina'am nidib mekama wusa bane a yinni ne Yesu Kiristo la. Ti ba'abiis bane la'am be ne m la pu'usidi ya. 22Wina'am nidib wusa pu'usidi ya hale line gat ane na'ab Kaisa yidim la. 23Ti Zugsob Yesu Kiristo yelsum na be ne ya.

will be added

X\