FILIPI DIM 3

1Ba'asugo, m ba'abiise, more sumalisim ne Zugsob la ni. Li pu daam man ye m lem sob bun kan yela ya'ase, bozugo li ane suŋir tisi ya. 2Gu'usimi ya meŋ ne nimbe'ednam la, bane tum tuumbe'ed la, la'am ne bane kpen'esid nidib baŋo la, ka pa'an ye ba ane Wina'am nidib la. 3Ka tiname baŋo kpen'eb la pa'al ye ti sid pu'usid Wina'am ne o Siig Suŋ paŋ, ka nwe'ed nyo'og Yesu Kiristo ni. Ti pu tie ninsaali niŋid si'el yela. 4Hale baa m meŋi naani moren suekane na keen ka m nwe' nyo'og ne saalib yela laa. So' ya'a ten'es ye o mor suekane na ke ka o nwe' nyo'og ne saalib niŋire, mane lee gat. 5Ban n du'a man daba anii daar ka ba kpen'esi m baŋo. Mane a Israel nid, Benjamin doog buudi ka a Hibiru nid yelmeŋir, ka Jew dim wada la dolisug yela ka m a Farisee nid. 6Ka li ya'a ane nimmua yela m da namisid Wina'am nidib bane niŋ Yesu yadda. Ka popielim line a wada siakir la yela la, m daa ka' gba'aree. 7Ka yelbane wusa ka m naani nokin ka li da aa m nyood la, ka Kiristo yela, ka m noki li ka li a zaalim. 8Asida, m ten'es ye si'el mekama ane zaalim. Ka Yesu Kiristo baŋir yela a su'um gati li wusa. On yela ka m lu si'el mekama ni ka noki li ka li a sa'ad, ye Kiristo lee na a m nyood, 9ne mam be o sa'an la. M pu lem mor popielim line a m meŋ din ne, line a wada suer dolim. M yu'un mor ne popielim line yi Yesu Kiristo yadda niŋirin ka a Wina'am din line ka ti di'ed ne yadda niŋir. 10Ka bood ye m baŋ o ne o ku'um vu'ugir la paŋ, ka la'am namis ne o ka wenne o ne o kumin, 11ye daasi'ere m na tun'e nye ku'um vu'ugir. 12Li ka'ane ye m pun deŋim nye piini la bee lieb su'um naae, amaa m nyidigid ye m gban'e piinkane yela ka Yesu Kiristo gaŋi m la. 13M ba'abiise m pu ten'es ye m nyaŋe li nanne. Lin ka m nyidigid la ane ye m tam nya'aŋ bun ka lee mood ye m paam line be tuon la. 14M zotne hale ye m paae naar la ben, ye m di piini la. Ka piini la ane ye Wina'am buoli man arazana ni ka li yi Yesu Kiristo ni na. 15Keli ka tinam bane yadda bi' la mor poten'er kan men, ka so' ya'a mor poten'er si'a, Wina'am na nie li ka ya baŋ. 16Keli ka ti gban'e line ka ti deŋim siak la kiŋ kiŋ. 17M ba'abiise, la'amini taaba tu'asi mam tuuma, ka kpansimi bane beilim tu'asi ti beilim a si'em la. 18M deŋim yeli ya noor bedego, ka lem yeti ya ne ninto'om ye nidib bedego be ka a dataas ne Yesu Kiristo dapuudir la yela. 19Ba ba'asug ane sa'uŋ, ka ba niŋgbiŋ boodim aa ba Wina'am. Ba nokid line a nyan la, n nwe'edi ba nyo'og, ka ba ya'am kpen'ed ne line a dunia bun ma'aa. 20Ka tiname a arazana nidib la, zin'ikan ka ti guri ti faangid Yesu Kiristo yiib na la. 21One na tiakedi ti taduŋ niŋgbiŋ ka li wen wuu o niŋgbiŋ line venl pilpil la. O na niŋ ala ne o paŋ kane ket ka o nyaŋ ka so'e si'el mekama la.

will be added

X\