FILIPI DIM 2

1Ya beilim Kiristo yela ya'a sadigim kpe'eŋi ya, ka o noŋilim belisi ya, ka ya a bane la'am di'e Wina'am Siig Suŋ la, ka ya mor noŋilim ne nyoog ne taaba, 2keli ka m sumalisim pe'el, ne yaname mor poten'er yinni ne noŋilim yinni ne taaba ne ya'am yinni ne sunf yinni la. 3Da niŋ si'el line yi nennimin ne tita'alimine, amaa lee siemi ya meŋ ka ten'esi ye ya taaba a su'um gati ya. 4Keli ka ya wusa poten'er be ne taaba suŋir ni, ka ka'ane ya meŋ din ma'anee. 5Poten'er kane nar ye ya mor ane Yesu Kiristo poten'er. 6Wina'am a si'em la, ala men ka Kiristo ae, amaa o pu ten'es ye on zemis ne Wina'am la, o na kpelim gban'e kiŋ kiŋ nee, 7ka lee siene o meŋ ka lieb wuu yamugi a si'em la, ka ba du'a o ka o lieb ninsaal. 8Ka on nie wuu ninsaali a si'em la, o sie o meŋ ka siak ku'um wuu tuumbe'ed sobne hale n kpi dapuudir zug. 9Linzug ka Wina'am du'os o hale, ka tis o yu'ur line gat yuda wusa. 10Ka Yesu yu'ur zugo bun line wusa voe ka be zin'ig wusa bee saazug bee teŋ zug bee teŋ teŋir, na igini o tuon ka du'os o yu'ur. 11Ka so' mekama na yel ye, Yesu Kiristo a Zugsob la, ka li zun'e ti Ba' Wina'am la yu'ur. 12Dinzugo m zuanoŋa, mam daa bene ya ka ya siakidi m yelug si'em la, niŋimi ka li gati ala m ya'a ka'a ya sa'ane, ka tumi tuuma line yi ya faangir ni na la su'uŋa ne dabiem zotim. 13Wina'am be ya ni n tum ye ya poten'er doli o boodim suŋ, ka ya sid na tumi li. 14Niŋimi si'el mekama ka nyunyolug ne noŋgban nwa'ar kae', 15ye ya a nyain ka taal ka'asige, ka a Wina'am biis bane ka'a gbadaa ka bei nimbe'ednam ne ninyood soogin, ka nie nyain wuu neesim dunia nwa ni, 16ka gban'e nyovur pian'ad la kiŋ kiŋ. Ya ya'a niŋi ala, m na nwe' nyo'og ne ya Yesu Kiristo ken na daar la, ye m zigib ne m tuuma la wusa pu niŋ zaalim. 17Hale baa m ya'a zaŋi m nyovur tis ka li wenne maan ne, yanam yadda niŋir zug, li na malis man ka m na maal sumalisim ne ya wusa. 18Ala mene li su'um ka ya sunya ma'ae ka ya mor sumalisim ne m. 19M mor ti'ir ti Zugsob Yesu Kiristo ni ye ti ku yuuge ka na tum Timoti ya sa'an na ka o na tisi ya m labaar ka m sunf ma'ae. 20On ma'aa mor poten'er yinni ne mam ka on ba'a sid be ne ya yela hale. 21So' mekama zigid ne o meŋ yela ka ka'ane Yesu Kiristo yelaa. 22Ka ya mi' Timoti su'um a si'em ka mi' ye mam ne one tum labasuŋ tuuma wen wuu dau ne o biigi niŋid si'em la. 23Dinzugo m mor poten'er ye m na tum o ya sa'an to'oto, m ya'a baŋ m yela la na niŋ si'em. 24Ka m meŋ me mor ti'ir Zugsobin la ye li ku yuuge ka m me na kena. 25M gban'e li ka li nar ye m tumi m ba'abiig, Epafroditus one a m tumtum tiraan ka lem a m sogia tiraan ka a one ka ya tum o ye o suŋi m la. 26Ka o bood hale ye o nyee ya wusa; ka o sunf sa'am yaname wumi o ban'as yela la. 27Sida, o daa ben'edne ka nwaas kum. Ka Wina'am zo o nimbaanlig, ka li ka'ane on ma'aa nimbaanliga, amaa la'am ne mam men, ka m susa'aŋ da lem pe'ese. 28Dinzug ka m mood ne nimmua hale ye m tum o ya sa'an na, ka ya ya'a nye o, ya sunya na malis, ka m ya'am na ma'ae men. 29Di'emin o ne sumalisim hale Zugsob la zug. 30O daa nwaasne kum Kiristo tuuma yela, ka keesi o nyovur ye o suŋi man ne line ka ya meŋ pu nyaŋe suŋi m la. Na'asimi niŋkan buudi.

will be added

X\