1 Mam Paul ne Timoti bane a Yesu Kiristo tumtumnib n sob gbauŋ kaŋa nwa. Ti sobid tisid Wina'am nidib bane a yinni ne Yesu Kiristo ka be Filipi teŋin la'am ne Wina'am nidib bane a tuongatib ne suŋidib la. 2 Ti Ba' Wina'am ne ti Zugsob Yesu Kiristo na tisi ya yelsum ne sumalisim. 3 M ya'a ten'esi ya yela m yiti pu'us Wina'am bareka saŋa wusa. 4 Ka m ya'a yiti sosid Wina'am tisidi ya wusa m sosidne ne sumalisim, 5 tiname a tumtumnib ne taaba hale pin'ilugin sa ti paae saŋa nwa la. 6 M mi' hale ye one pin'il tuumsuŋo ya sunya ni la, na tum li naae Yesu Kiristo ken dabisir la. 7 Li a su'um ka m ten'esi ya wusa yela ala, mam more ya poten'er la zug. Dinzug m ya'a be ne sarega ni bee ti la'am pa'an ne nidib ye labasuŋ la a sida ya na la'am di'ed Wina'am popielim piini la ne man. 8 Ka Wina'am baŋ ye m ya'am boodi ya wusa ne noŋilim line yi Yesu Kiristo ni na. 9 Ka m sosid Wina'am ye ya noŋilim na pe'es hale ne mi'ilim ne baŋir ameŋa, 10 ye ya gaŋ line a su'um la ka a nyain ka dian'ad kae' n gur Yesu Kiristo lebig na dabisire, 11 ka pe'el ne popielim tuuma line yi Yesu Kiristo sa'an na n tisid Wina'am yu'ur zun'or ne na'asi. 12 M ba'abiise, m bood ye ya baŋ ye line niŋi m la, sid suŋ ka labasuŋ la ken tuon. 13 Li ke ka gomena yin sogianam wusa ne so' mekama baŋ ye m sarega ni beilim la ane Kiristo yela, 14 ka ba'abiis la tita'am sa mor kpi'euŋ ne ti Zugsob la, m sarega beilim la zug, ka ba mor kpi'uŋo pe'es hale ye ba pian'ad Wina'am labaar la ka dabiem kae'. 15 Sieba moon Kiristo yela la ne fufum ne nennim ka sieba tum ne poten'esuŋ. 16 Ka poten'esuŋ dim la mooni li noŋirin ka baŋ ye Wina'am zi'eli man ye m gu'e bane zan'as labasuŋ la. 17 Ka sieba pu moon Kiristo yela ne popielim, amaa ba mooni li ne nennim ka ten'esid ye m namisug la pa'as, mam be sarega ni la. 18 Li pu pake. Line gaad li wusa ane Kiristo labaar la moolug hale li ya'a dolne poten'esuŋin bee poten'ebe'edin ne, li kpelim malis man. 19 Ka m mi' ye li yit ne ya Wina'am pu'usum ni na ne Yesu Kiristo Siig suŋir ni, ka line naam la na tisi m faangir. 20 Lin ka man bood hale ka mor ti'ir li yela ane ye m ku di nyan ne ka lee mor sukpi'euŋ ka Kiristo nye na'asi man ni nannanna, wuu on yiti nye si'em saŋa wusa la, m ya'a kpi bee m ya'a voe. 21 Ne mane, m ya'a voe ne, m voe ne Kiristo zug, ka m ya'a lem kpi ne, li ane nyood tis im. 22 Ka m ya'a voe ka na tum tuumsuma li a su'um. Amaa man bood ba' ne ma la zug, m ku nyaŋe gban'e line ka m na gaŋi. 23 M bood ye m yi beilim kaŋa nwa ka bei ne Kiristo; ka line a su'um hale. 24 Amaa yanam yela, li a su'um ka m kpelim voe. 25 M mor sukpi'euŋ ne man yel si'el la ka linzug ka m mi' ye m na kpelim be ne ya wusa, ka yaname niŋ Yesu Kiristo yadda la na tugus ne sumalisim. 26 Ka m ya'a ti be ne ya ya'as, ya na tun'e nwe' nyo'og ne m hale Yesu Kiristo ni. 27 Lin a si'em wusa keli ka ya beilim tual ne Kiristo labasuŋ la, ka m ya'a keenn ya sa'an na bee m ya'a pu kenaa, m na wum ye ya gban'e poten'er yinni kiŋ kiŋ, ka mood ne yadda yinni ne noor yinni ye labasuŋ la siakir na keŋ tuon. 28 Da zoti ya dataas dabiem baa bi'elaa, ka ya sukpi'euŋ na pa'ali ba ye ba na ba'as be'ed. Amaa ka lee pa'al ye yanam na nye faangir line yi Wina'am sa'an na la. 29 Ka li ane Wina'am tisid ka li ka' ya yadda niŋir la ma'anee, asee ya la'am namis Kiristo zug. 30 Ka ya namisug wenne yaname da nye man namisid si'em la, ka wumid ka ya nan kpelim bee li puugin nannanna la.
