MATEO 8

1Ka Yesu sig zuer zug na ka nidib bedego du'e dol o. 2Ka kukom keenn o sa'an na igin ka yel ye, “Zugsoba, fu ya'a bood, fu na tun'e ke ka m nye laafe.” 3Ka Yesu tienn o nu'ug n si'is o ka yel o ye, “M bood ala, nyem laafe.” Ka yim o nye laafe ka o kukom ban'as la bas o. 4Ka Yesu lem yel o ye, “Mit ka fu yel so'. Amaa kem Wina'am maalmaan sa'an ka ke ka o gos uf, ka maal maan tis Wina'am wuu Moses da sob ye ba niŋ si'em la. Ka li na pa'al nidib ye fu nye laafe nannanna.” 5Ka Yesu daa kpen' Kapeenum ka Room dim sogia kpeenm kenn o sa'an na n sos o 6ye, “M Zugsoba, m tumtum be yin n ben' n pon'olim, ka namisid hale.” 7Ka Yesu yel o ye, “M na kena n ti'eb o.” 8Ka sogia kpeenm la lebis yel o ye, “M pu su'um ye fu kenn man yin ne. Kudim yelim ne fu noor pian'auk ma'aa, ka m tumtum la na nye laafe. 9Mam meŋ mor sogia kpeenm one so'e man, ka man me mor sogianam ban ka m so'e. Ka m ya'a yel so' ye, ‘Kem’ o kenne. Ka m ya'a lem yel so' ye, ‘Kem na’ o ken ne na. Ka m ya'a yel m tumtum ye, ‘Niŋim ne’ o niŋidne ala.” 10Ka Yesu n wum la, ka li lidig o. Ka o yel nidib bane dol o la ye, “M pu nye so' ka o niŋ m yadda wenne dau kaŋa nwaa, hale baa Jew dim so'olim nii. 11M yeti ya ye, nidib bedego na ti yi yatuon ne yanya'aŋ na n zin'in Wina'am so'olim ni, ne ti yaanam Abraham ne Isaak ne Jakob n dit. 12Ka bane nar ye ba naan diin Wina'am so'olim faar la, ba na kadi ba kpen'es likin. Anina ka nidib na ti kaasid ka ga'ad nyina.” 13Ka Yesu yel sogia kpeenm la ye, “Kem kul. Ka li na niŋ wenne fun niŋ man yadda si'em la.” Ka saŋkan la ka o tumtum la nye laafe. 14Ka Yesu keŋ Piita yin, ka nye Piita diem po'a ka o ben'ed ka digi ka o niŋ tul. 15Ka Yesu si'is po'a la nu'ug ka o niŋtuulum la bas o. Ka o maal Yesu saauŋ. 16Ka zaam ma'ae ka ba mor nidib bane mor kikiris la bedego n kenn Yesu sa'an na. Ka o noor pian'ad ma'aa ka o kad kikiris la yiis ka ti'eb ban'adnam wusa. 17Ka lin ka Azaya da sob o yela la niŋ sida ye, “O di'e ti niŋgbina toog ka yiisi ti ban'as wusa.” 18Ka Yesu n nye ka nidib bedego gilig o la, o yel o nya'andolib la ye ba dol o keŋ beuŋ gbeug la sa. 19Ka gbauŋmi'id keenn o sa'an na yel o ye, “Pa'ana m na dol uf, fun na keŋ zin'isi'a wusa.” 20Ka Yesu lebis o ye, “Teŋinbumis more ba vont, ka niis more ba teed, amaa Ninsaal Biig la pu mor zin'ig ka o na kuki o zugo.” 21Ka dau yinni one a Yesu nya'andol yel ye, “Zugsoba, kel ka m keŋ yiiga mumi m saam.” 22Ka Yesu lebis o ye, “Dol mam ka ke ka bane pu mor Wina'am nyovur paal la mum ku'um.” 23Ka Yesu kpen' aaruŋin la ka o nya'andolib dol o. 24Ka sisi'em tita'ar gbirigi kenn beuŋin la na. Ka ku'opila ligil aaruŋ la. Ka Yesu gbisid. 25Ka o nya'andolib keŋ nie o ka ye, “Zugsoba, ti kpiide. Faanmi ti!” 26Ka Yesu lebis ye, “Yanam bane ka ya yadda niŋir pu zu'e la, bo ka ya zot dabiem?” Ka Yesu tans sisi'em ne ku'opila la ka li lebi ma'ae yirr. 27Ka li lidigi ba wusa. Ka ba bu'os taaba ye, “Niŋkaŋa nwa a ano'one, hale ka sisi'em ne ku'opila siakidi o noore?” 28Ka ba paae beuŋ gbeug line a Gadarene teŋin la, ka dapa ayi bane ka kikiris doli ba yi yaadin na n tu'os o. Nidib zoti ba ka so' pu dol anina gata. 29Ka ba tans ye, “Wina'am Biiga, bo be tinam ne fun sisoogine? Fu kena ye fu namisi ti ka li saŋa nam pu paae?” 30Ka kukurnam bedego kpi'e anina dit. 31Ka kikiris sos o noor ye, “Fu ya'a kadi ti fun ke ka ti keŋ kpen' kukurnamin la.” 32Ka o yeli ba ye, “Kemi.” Ka ba yi dapin la ka kpen' kukurnamin la. Ka kukurnam la wusa zo kukuna ni n sig beuŋin la ka ku'om dii ba. 33Ka bane guri kukurnam la zo keŋ teŋ poogin yel line maal dap ayi la, ban ka kikiris daa doli ba la. 34Ka teŋ la nidib wusa yi keŋ Yesu sa'an, ka ban nye o la, ba sos o ye o yimi ba teŋin.

will be added

X\