MATEO 5

1Ka on nye nidib bedego, ka ba kena la, o du zuer zug n zin'i. Ka o nya'andolib la'as o sa'an na. 2Ka o pin'il n pa'ani ba. 3Ka Yesu pa'an ye, “Wina'am yelsum be ne bane siedi ba meŋ la, bozugo Wina'am so'olim ane ba din. 4Wina'am yelsum be ne bane mor susa'aŋ la, bozugo Wina'am na belisi ba. 5Wina'am yelsum be ne bane mor sumbugusum la, bozugo ba na so'e dunia. 6Wina'am yelsum be ne bane ka Wina'am tuumsuma ko'om ne ku'onuud more ba la, bozugo ba na tig. 7Wina'am yelsum be ne bane zot taab nimbaanlig la, bozugo Wina'am na zo ba nimbaanlig. 8Wina'am yelsum be ne popielim dim la, bozugo ba na ti nye Wina'am. 9Wina'am yelsum be ne zabpansidib la, bozugo Wina'am na buoli ba ye o biis. 10Wina'am yelsum be ne bane ka ba namisidi ba, ba popielim tuuma zug la, bozugo Wina'am so'olim ane ba din. 11“Wina'am yelsum be ne yanam ban ka ba tu'udi ya, ka namisidi ya, ka pian'ad ziri pian'abe'ed n zi'ini ya, yanam dol man la zug. 12Keli ka ya sunya malis, ka ya mor ti'ir, bozugo ya nyood ane bedego arazana ni. Ala men ka ba da namis Wina'am nodi'esidib bane deŋi ya tuon la.” 13Ka Yesu lem yel ye, “Ya ane yaarum dunia nwa ni. Ka yaarum mimilim ya'a yi, li na lem nye mimilim yaani? Ka li yu'un lieb ne zaalim. Ka li su'um ye ba lobig bas, ka nidib na nood ne noba. 14“Ya ane dunia nwa neesim. Ka ya me wenne teŋ kane ka ba me zuer zug la, ka li ku tun'e n su'aa. 15Bee nid kae' na nyu'e fitla, ka pibil ne peogo, amaa o na zuol li si'el zugin, ka li nie nyain n tis nidib ban wusa n be yin la. 16Dinzugo keli ka ya neesim nie nyain nidib tuon, ka ba nye ya tuumsuma, ka pian'a ya Ba' one be arazana ni la yu'ur. 17“Da ten'es ye m kena ye m sa'am Wina'am wada laa, bee o nodi'esidib pian'ad laa. M pu kena ye m sa'ami lii, amaa m kena ye m pa'ali li gbin ameŋa. 18Yelmeŋir ka m yeti ya ye, Wina'am wada bumbil baa yinni ku sa'am, asee agol ne dunia ti sa'am, ka yelug la wusa lieb ameŋa. 19Dinzugo one sa'am Wina'am wada bumbil yinni, ka pa'al o taab ala, ba na ti buon o nimbil arazana so'olim ni. Amaa one n siak Wina'am noor, ka pa'al o taab ala, ba na ti buon o nintita'ar arazana so'olim ni. 20Yelmeŋir ka m yeti ya ye, ya tuumsuma ya'a pu venl n gaad gbauŋmi'idib ne Fariseenama, ya ku tun'e nye suer n kpen' arazana so'olim nii. 21“Ya pun wum ka ba da yel kudum dim ye, ‘Da ku nidaa, ka on mekama ku nid, mor yel antu'a zin'igin.’ 22Amaa man yeti ya ne ye, on mekama wusa, ka o sunf pelig ne o ba'abiig, mor yel antu'a zin'igin. Ka one me yel o ba'abiig ye, ‘Yalim nwa,’ o mor yel kpeenmnam sa'an. Ka one me yel o ba'abiig ye, ‘Fu ka'a voonre,’ on daana na nye namisug bugum teŋ. 23“Dinzugo, fu ya'a mor fu piini ye fu tis Wina'am n kenn Wina'am pu'usum yin, maan zin'ig ye fu maal maan, ka anina ka fu tienn ye fu mor yel ne fu ba'abiig, 24fun basimi fu maan zin'ikan ni, ka keŋ n deŋi maal fu yel la ne fu ba'abiig la, ka nyaan leb n maal maan la tis Wina'am. 25“Deŋim maal fu yel ne fu zabadintaa to'oto yanam nam be sueren la. Li ya'a ka'a ala, fu zabadintaa la na ta'as uf koto ni. Ka antu'a tu'ad la na tu'a fu tu'am. Ka ba mor uf kpen'es sarega ni. 26Yelmeŋir ka m yeti ya ne ye, fu ku nye suer n yi sarega ni laa, asee fu yo fu sam la wusa. 27“Ya wum ka ba da yel ye, ‘Mit ka ya sa'am po'a bee dau.’ 28Amaa man yeti ya ne ye, so' ya'a gos po'a, ka o ya'amleog kpen' o, o sa'am po'a la ne o poten'erin. 29Fu datiuŋ nif ya'a ke ka fu tum taal, fun kpidigim li n lob bas, bozugo li su'um ye fu nif yinni na ti sa'am, n son'e ye ba zaŋ fu niŋgbina wusa n lob bugum teŋ. 30Ka fu datiuŋ nu'ug ya'a ke ka fu tum taal, fun fi'igim li n lob bas, bozugo li su'um ye fu lua yinni na ti sa'am, n son'e ye ba zaŋ fu niŋgbina wusa n lob bugum teŋ.” 31“Ba pun da yel ye, ‘One lebis o po'a, tisim o kaseta gbauŋ line pa'an ye o lebis po'a la.’ Amaa man yeti ya ne ye, on mekama lebis o po'a, ka li ka' ye po'agoondir yela, one ke ka po'a la lieb po'agoondir. 32Ka one me di po'a kan ka o sid lebis la, me na ane po'asa'uŋ. 33“Ya lem wum ya'as ka ba da yel kudum dim ye, ‘Da pan'alim ziri pan'aluŋo, amaa kel ka ya pan'aluŋ a ameŋa ne Zugsob la.’ 34Dinzug ka man yeti ya ye, da po baa bi'ela mene. Ka da po arazana, bozugo li ane Wina'am na'am gbauŋ, 35bee po dunia ni, bozugo li ane o noba zi'elug zin'ig bee po Jerusalem, bozugo li ane na'atita'ar la teŋ, 36bee po fu zugo, bozugo, fu ku tun'e n ke ka fu zuobug yinni lebig pielig bee sabiliga. 37Kel ka ya pian'ad na ane eenn, eenn, bee ayei, ayei, bozugo li ya'a gaad ala, li ane tuumbe'ed sob la din. 38“Ya pun wum ka ba da yel ye, ‘Nif yood nif sam, ka nyin yood nyin sam.’ 39Amaa man yeti ya ne ye, da yi'e tuumbe'ed sam ne. Amaa so' ya'a nwe' fu datiuŋ yier, fun fendigim fu dagobug yier la me tis o. 40So' ya'a gban'e uf koto ni n di'e fu banaa, fun kel ka o di'e fun dansika la men. 41Ka so' ya'a mugus uf ye fu dol o mail yinni, fun dol o mail ayi. 42So' ya'a sos uf si'el, fun tisim o, ka da moŋ one bood pe'eŋire fu sa'ane. 43“Ya pun wum ka ba da yel ye, ‘Noŋimi fu buudi ka kisigi fu bi'em.’ 44Amaa man yeti ya ne ye, ya noŋimi ya bi'emnam, ka sos Wina'am n tis bane namisidi ya. 45Ka ya na lieb ya Ba' one be arazana ni la biis, bozugo one ket ka o nintaŋ nied n tisid ninsuma ne nimbe'ednam, ka ket ka saa niid tisid bane a yelmeŋir dim ne bane ka'a yelmeŋire. 46Bozugo fu ya'a noŋ ne bane noŋ uf la, li nyood a bo? Hale baa lampodi'esidib me niŋid ala. 47Ka fu ya'a pu'usidne bane a fu ba'abiis gullim ne, fu maan bo ka li gaad fu taaba? Buudi ban pu dol Wina'am wusa niŋid ala men. 48Dinzugo ya bei su'uŋa wenne ya Ba' one be arazana ni la n a su'uŋa si'em la.

will be added

X\