MATEO 4

1Ka Wina'am Siig Suŋ la daa zaŋ Yesu n keŋ moogin, ka Sutaana ti mak o. 2Ka o lo noor dabisa piisnaasi yu'uŋ ne nintaŋ wusa. Ka o ko'om daa zabid. 3Ka Sutaana kenn o sa'an na, ka yel o ye, “Fu ya'a ane Wina'am Biig, fun yelim kuga nwa ye ba kilim diib.” 4Ka Yesu lebis ye, “Li sobne Wina'am gbauŋin ye, ‘Ninsaal ku tun'e voe ne diib yel ma'ane, asee pian'ad kan wusa yit Wina'am noorin la paas.’ ” 5Ka Sutaana mor Yesu n kpen' teŋsuŋ (line a Jerusalem) la n du Wina'am pu'usum yin la zug, 6ka yel o ye, “Fu ya'a ane Wina'am Biig, fun basim fu meŋ n lu teŋin, bozugo li sobne ye, ‘Wina'am na tis o maleknam noor ye ba mor uf ne ba nu'us hale ka fu ku tu'ug fu nobir ne kugire.’ ” 7Ka Yesu yel o ye, “Li me sobne ye, ‘Mit ka fu mak fu Zugsob fu Wina'am.’ ” 8Ka Sutaana mor Yesu ya'as n du zuetita'ar zug pa'al o dunia so'olim wusa ne li paŋ, 9ka yel o ye, “Fu ya'a siak n igin zun'e man, m na tis uf nwa wusa.” 10Ka Yesu yel Sutaana ye, “Kem sa, li sobne ye, ‘Wina'am gullim ka fu na siak n zun'e o, ka tum n tis o.’ ” 11Ka Sutaana bas Yesu ka keŋ. Ka maleknam kena n suŋ o. 12Ka saŋkan ka Yesu wum ye ba gban'e Joon la, o keŋ Galilee so'olim, 13ka yi Nazaret n keŋ Kapeenum teŋin line kpi'e Galilee beuŋ noorin, Zebulun ne Naftali yaas teŋin. 14Ka lin ka Wina'am nodi'es Azaya n da yel si'el la lieb ameŋa ye, 15“Zebulun ne Naftali nidib, nimbane be Joodan mo'ar nya'aŋ n be ateuk baba la, zin'ig la me ane Galilee teŋ kane ka bane ka' Jew dim buudi be anina la. 16Nimbane be anina la, bane be likin la, na nye neesim bedego. Neesim na be n tis bane be teŋ line a lik wenne ku'um teŋ la ni.” 17Saŋkan la ka Yesu daa moon ye, “Tiakim ka basi ya tuumbe'ed, bozugo Wina'am na'am la li'elne.” 18Ka Yesu n daa ken Galilee beuŋ noorin la, o nye Simon one buon Piita la, ne o ba'abiig Andrew, ka ba lobid ba sau beuŋ noorin la; ka li ane ba tuuma la. 19Ka Yesu yeli ba ye, “Kemi na dol man ka m na pa'ali ya suer kan ka ya na ke ka nidib dol man, wuu ziŋgban'adib niŋid si'em gban'ad zimi la.” 20Ka ba kpelim basi ba zimi la'ad la, ka dol o. 21Ka one gaad tuon la o nye nidib ayi ya'as bane a Zebedee biis la. Ba yuda buon Jemes ne Joon. Ka ban ne ba ba' Zebedee be aaruŋ la ni n maane ba zimi la'ad, ka Yesu buoli ba. 22Ka ba kpelim bas aaruŋ ne ba ba', ka dol o. 23Yesu daa giligid Galilee so'olim wusa n kpen'ed la'asug doodin n moon Wina'am so'olim labaar ka ti'ebid nidib ba ban'as buudi wusa. 24Ka o labaar giligid Siriya teens wusa, ka ba zaŋ bane wusa ben'ed wiim buudi buudi n kenn o sa'an na, bane namisid ne wiim mekama wusa ne niŋgbina zabir, ne bane ka kikiris doli ba ne kpisiŋkpi'ir dim ne ponda, ka o ke ka ba wusa nye laafe. 25Ka nidib bedego yi Galilee teŋin ne Dekapolis teŋin ne Jerusalem ne Juuda teŋin ne Joodan mo'ar gbeug n dol o.

will be added

X\