MATEO 3

1Saŋkan la ka Joon one suud nidib Wina'am ku'om la keŋ Juuda moogin n moon 2n yet ye, “Tiakimi ya sunya ka bas ya tuumbe'ed; ka Wina'am na'am la li'elne.” 3Wina'am nodi'es on ka ba buon Azaya la da sob yel Joon yela la, ye, “So' be moogin, n moon ne kukotita'ar ye, ‘Maalimi suer su'uŋa ka ti'ebi gur Zugsob la. Maalimi suer la su'uŋa o zug.’ ” 4Joon da yene fukan ka ba maal ne yugum konbid, ka nok gbauŋ senbidiŋ n loo o sia. Ka o diib da ane na'azomnam ne siint. 5Ka nidib da yi Jerusalem ne Juuda so'olim wusa ne teens bane kpi'e Joodan mo'ar wusa n kenn o sa'an na, 6ka peligi ba poos n tu'asi ba tuumbe'ed. Ka o suu ba Wina'am ku'om mo'arin la. 7Ka on nye ka Farisee dim ne Sadusii dim bedego kenna ye o suu ba Wina'am ku'om la, o yeli ba ye, “Yanam bane wenne wiigi nwa, ano'one yeli ya ye ya zom Wina'am supeen yela line kenna la? 8Ala zug tumme tuum bane pa'an ye ya tiakeya, 9ka da ten'esid ye, Abraham ane ya yaaba. Ka m yeti ya ye, Wina'am tun'e zaŋ kuga nwa n maal yaas tis Abraham. 10Nannanna lieŋ be tiis gbinin. Ka tikan wusa pu wel welsumaa, ba na nwaesi lob bugumin. 11“Man suudi ya Wina'am ku'om, ka li pa'al ya tiaker yela. Ka one doli mam nya'aŋ la mor paŋ gati m. Ka m pu nar ye m zal o ta'ada. On na suu ya ne Wina'am Siig Suŋ ne bugum. 12O zanl wanzauk o nu'ugin ka na yeleg ki line be zieŋin la, ka na vaae ki bielim la n su buorin, ka nyu'e udug la ne bugum line pu kpiisida.” 13Ka Yesu yi Galilee n kenn Joodan mo'arin na ye Joon suu o Wina'am ku'om. 14Ka Joon zan'as, ka yel ye, “Li su'um ka fun na suu man, fu lee kene man sa'an naa?” 15Ka Yesu lebisi yel o ye, “Kel ka ti siak niŋ ala nannanna, bozugo li su'um ye ti tum Wina'am bood si'em la wusa.” Ka o siak ala. 16Ka one suu o naae la, Yesu du ku'om gbeug na, ka nye ka arazana yo'og. Ka o nye Wina'am Siig Suŋ sigid na wenne dawan ne n zoon o zugin. 17Ka kukor yi arazana ni na n yel ye, “Oŋa ane man binoŋir, one ke ka m sunf malis bedego.”

will be added

X\