MATEO 28

1Ka Jew dim vu'usum daar n gaad la, Alasidaar bekeeung, ka Meeri one yi Magdala ne Meeri so' isig keŋ ye ba kaae yaug la. 2Ka teŋgbauŋ dam hale, bozugo Zugsob malek yi arazana sig na n bilig kugir la, ka ke yaug la noor, ka zin'i kugir la zug. 3Ka o nindaa nyeen wuu saa iansug ne. Ka o fuug pelig hale nyain. 4Ka dabiem kpen' bane gur yaug la. Ka ba kirid wenne ku'um la. 5Ka malek yel po'ab la ye, “Da zoti dabiem, bozugo m mi' ye ya boodne Yesu, on ka ba daa ku la. 6O ka' kpelaa. O vu'ugne wenne on daa yel si'em la. Kemi na gos ban daa digil o zi'ig si'a la. 7Kem to'oto n yel o nya'andolib la ye, o vu'ugiya ka bas ku'um. Ka o na deŋi ya tuon n keŋ Galilee teŋin. Anina ka ya na nye o. Li ane ameŋa ka m yeti ya.” 8Ka po'ab la bas yaug la ne dabiem amaa ba daa mor sumalisim bedego ka keŋ to'oto ye ba yel o nya'andolib la. 9To'oto yim ka Yesu tu'osi ba n pu'usi ba. Ka ba kena igin o tuon n pu'us o. 10Ka Yesu yeli ba ye, “Da zoti dabiem ka keŋ yel m ba'abiis ye, ba kem Galilee teŋin, ka ba na nye m anina.” 11Ka ban daa wa'ae la, sogianam sieba bane guri yaug la leb teŋ poogin la yel maalmaan kpeenmnam la line naam wusa. 12Ka ba la'as ne kpeenmnam sieba n gban'e noor yinni ka tis sogianam ligidi bedego, 13ka yeli ba ye, “Yelimi nidib la ye o nya'andolib la kene yu'uŋ na ka ya gbisid ka ba zu niŋgbiŋ la. 14Ka gomena la ya'a wum ne'eŋa ti na maal suer ka ya yi yela ni.” 15Ka sogianam la di'e ligidi la ka tum wuu ban yeli ba si'em la. Ka labaar kaŋa yadig n gilig Jew dimin ti paae nannanna nwa. 16Ka nya'andolib piinayinni la keŋ Galilee n du zuekan ka Yesu daa yeli ba ye ba keŋ la. 17Ka ban nye o la, ka ba igini o tuon n na'as o, amaa sieba bi'es o. 18Ka Yesu li'eli ba sa'an ka yeli ba ye, “M di'e paŋ kane be arazana ne dunia ni wusa. 19Dinzugo kemi nidib buudi wusa ni, ka ke ka ba liebi nya'andolib. Suumi ba Wina'am ku'om ne Ba' la yu'ur zug ne Biig la yu'ur zug ne Siig Suŋ la yu'ur zug. 20Ka pa'ali ba m noyelug kan wusa ka m tisi ya la, ye ba siaki li. Baŋimi ka m na be ne ya saŋa wusa n ti paae dunia naar.”

will be added

X\