MATEO 27

1Ka beug nie ka maalmaan kpeenmnam ne kpeenmnam sieba gban'e noor ye ba ku Yesu. 2Ka ba loo o more keŋ Pilate one a Gomena la sa'an. 3Ka Judas one zam Yesu la n nye ka ba gban' o lo ye ba ku o la, ka o sunf sa'am ka o mor anzurifa ligidi piistan' la n lebi tis kpeenmnam la 4ka yel ye, “M tum taalne man zam nid kane pu tum be'ede ka ba na kuu o la.” Ka ba yel ye, “Ti ba'a kae'. Li ane fu zugin yela.” 5Ka Judas lob ligidi la bas ka keŋ yul o meŋi kpi. 6Ka kpeenmnam la zaŋ ligidi la ka ye, “Li ane ziim ligidi. Li pu nar ka ti zaŋ ligidi la n gendig pu'usum yin ligidi nii.” 7Ka ba gban'e noor yinni ye ba nok ligidi la da' ya'ab ya'ab poog ye ba mum saam. 8Hale la'am ne zina ba kpelim buon zin'ikan la ye ziim poog. 9Ka lin ka Wina'am nodi'es, Jeremia da sob la sid niŋ sida ye, “Ka ba nok anzurifa ligidi piistan', ligikan la ka Israel yaas da gban'e noor yinni ye ba yoo la 10n da' ya'ab ya'ab poog la wenne Zugsob la yeli m si'em la.” 11Ka Yesu zi'e Gomena la tuon ka o bu'os o ye, “Fune a Jew dim na'ab laa?” Ka o lebis o ye, “Eenn, fune yel ala.” 12Ka kpeenmnam la yel ye o niŋ si'elnam ka li a tuumbe'ed. Ka o pu lebis si'ela. 13Ka Pilate yel o ye, “Fu pu wum ban yet si'em la wusa n zi'el uf laa?” 14Ka o pu lebis si'el si'ela, ka li lidig Gomena la hale. 15Li da ane anwa ku'um malek gaadug daar tienr di'ema saŋa la, ka li mor suer ye Gomena la yiis sarega nid yinni bas, on ka nidib bedego na gaŋ la. 16Saŋkan la ba daa mor nimbe'ug one be sarega ni, ka ba buon o Barabbas. 17Ka nidib la la'as bedego na, ka Pilate bu'osi ba ye, “Ano'on ka ya bood ye m basi, Barabbas bee Yesu, on ka ba buon Kiristo la?” 18Pilate baŋ ye li ane nennim yela ka ba gban' Yesu. 19Ka Pilate n zin'in saria kadib zin'igin la, ka o po'a tolim tis o labaar ye, “Yiisimi fu nu'ug ne popielim daana la yela ni; ka man zaansim o yela yu'uŋ ka li daam man bedego.” 20Ka kpeenmnam la nyaŋe ke ka nidib la yel Pilate ye, o basim Barabbas, ka ku Yesu. 21Ka Gomena la lem bu'osi ba ya'as ye, “Nidib ayi nwa, ya bood ye m basi ano'one?” Ka ba lebis ye, “Barabbas.” 22Ka Pilate bu'osi ba ye, “Ya ye m niŋ Yesu, on ka ba buon Kiristo la wala?” Ka ba tansid ye, “Kpa'am o dapuudir zug kuu o.” 23Ka o bu'osi ba ye, “O tuumbe'ed a bo?” Ka ba lem tansid bedego ye, “Kpa'am o dapuudir zug, kpa'am o dapuudir zug.” 24Ka Pilate nye ka o ku nyaŋe niŋ si'el la, ka tukpeedug du'ed bedego la, ka o nok ku'om pie o nu'usi ba wusa tuon ka yel ye, “Mam ba'a kae' dau kaŋa kuub yela nii. Li ane ya yela.” 25Ka nidib la lebis ye, “O kuub la yela doli tinam ne ti yaas.” 26Ka o bas Barabbas tisi ba, ka ke ka ba bu' Yesu ne kpa'asa ka nok o tis ye ba kpa' o dapuudir zug. 27Ka Gomena la sogianam mor Yesu kpen' Gomena la yin ka ba wusa la'ase giligi o, 28ka pilig o fuug ka yeel o fuzen'ug, 29ka maal gon'os zugpibigi n pid o ka nok dansaar niŋi o datiuŋ nu'ugin, ka la'ad o yet ye, “Naa, Jew dim na'aba.” 30Ka tubis nintoond mad o, ka nok dansaar nwe' o zug. 31Ka bane la' o naae la ka ba zaŋ fuzen'ug la ka lebis o meŋ fuudi yeel o, ka mor o keŋ ye ba kpa' o tabil dapuudir zug. 32Ban daa yit la, ka nye dau one yi Sairene teŋin, ka o yu'ur buon Simon, ka ba mugus o ye o ze dapuudir la. 33Ka ba paae zin'isi'a ka li yu'ur buon Golgota, li gbin ane zunwana zin'ig. 34Ka ba nok daam gendig ne buntoogi n tis o ye o nu. Ka on lemi li la ka zan'as nuub. 35Ka ba kpa' o dapuudir zug ka nok o fuud n bugul bugulum n pudugi tis ba meŋ, 36ka yu'un zin'i gosid o. 37Ka ba sobi tabili o zug baba yelkan zug ka ba gban' o la, “Oŋa a Yesu, one a Jew dim na'ab la.” 38Ka ba me kpa' na'ayiis baba ayi n kpi'el Yesu, ka yinni be o datiuŋ ka oŋa la be o dagobug. 39Ka bane gati anina baba ka nye o la gomisidi ba zut ka tu'ud o yet ye, 40“Fune yet ye fu na nwa'e Wina'am pu'usum yir la ka lem me' li daba atan' poogin la, dinzugo faaenmi fu meŋ. Fu ya'a sid ane Wina'am Biiga, fun naamim dapuudir la zug sig na.” 41Ala men ka maalmaan kpeenmnam ne gbauŋmi'idib ne kpeenmnam sieba la'ad o n yet ye, 42“O suŋid sieba, ka lee ku nyaŋe suŋ o meŋa. One n a Israel dim na'ab la, din la o sigim dapuudir zug nannanna na, ka ti naan siak o. 43O niŋ Wina'am yadda ye o a sida sob, ka Wina'am ya'a noŋ o, on faaenmi o nannanna, bozugo o ye o ane Wina'am Biig.” 44Ka na'ayiis bane ka ba kpa'a kpi'el o la me tu'ud o ala. 45Ka nintaŋ buluŋ ka zin'ig wusa lebug lik n ti paae zaamnoor, karefa atan'. 46Saŋkan la ka Yesu tans ne kukotita'ar ye, “Eli, Eli, lama sabaktani.” Li gbin ane ye, “M Wina'am, m Wina'am, bo ka fu basi ma?” 47Ka bane zi'e kpi'e anina ka wumi li la sieba yel ye, “Dau la buoni Elija.” 48Ka yinni zo keŋ zaŋ sooso n los danmi'isugin niŋ kikan'ar zugin n tis o ye o nu. 49Ka bama la yet ye, “Ti gu'usim ka gos ye Elija na kena suŋ o bee.” 50Ka Yesu tans ne kukotita'ar ka nyaan kpi. 51Ka fuug lin beŋ Wina'am pu'usum doog zin'is ayi la aaenn zugini, hale ti paae teŋin, zin'is ayi. Ka teŋ dam, ka tampiins nwa', 52ka yaad yo'os ka popielim dim bedego bane daa kpi la vu'ug kumin, 53ka yi yaadin la na. Ka Yesu n ti vu'ug kumin la ka ba kpen' Jerusalem ka nidib bedego nye ba. 54Ka sogianam ne ba kpeenm bane zi'e gur Yesu la nye ka teŋ la dam la, ne line naam la, ka dabiem kpen'e ba hale ka ba yel ye, “O sid ane Wina'am Biig.” 55Ka po'ab bedego bane yi Galilee n daa suŋid Yesu la, doli kena zi'e lalle sa n gosid o. 56Ba sieba ane Meeri Magdalene ne Meeri one a Jemes ne Josef ma la, ne Zebedee biis la ma. 57Ka zaam ma'ae ka dau so' paae na ka o yu'ur buon Josef one yi Aramatea na, o ane kpan'a ka lem a Yesu nya'andol, 58ka kenn Pilate sa'an na n sos o ye o tis suer ka o zaŋ Yesu niŋgbiŋ la keŋ mum. Ka Pilate bas noor ye ba tisim o. 59Ka Josef zaŋ ku'um la vilig ne pien pielig, 60ka mum ku'um la, on Josef meŋ yapaalig kane ka ba tu tampiing zug la. Ka bilig kugtita'ar ligil yaug la noor. 61Meeri Magdalene ne Meeri so' da zin'i anina kpa'a yaug la. Daar kan la ka Jew dim tiebid ba vu'usum daar yela. 62Ka vu'usum daar kane pin'in daar kan zaam la, ka maalmaan kpeenmnam ne Farisee dim la'as Pilate sa'an na 63n yel o ye, “Zugsoba, ti tenr ye dama'a la da nan voe la, o da yel ye, ‘M na vu'ug kumin daba atan' daar.’ 64Dinzugo basim noor tisi ti ka ti gur yaug la su'uŋa n ti paae daba atan' la, ka li ya'a ka'a ala o nya'andolib la na zu ku'um la keŋ, ka ma' nidib ye o vu'ug kumin, ka dama'a kaŋa nwa yu'un na gaad yiigin la.” 65Ka Pilate yeli ba ye, “Ya mor sogianam bane gur, kel ka ba gur yaug la ka so' ku nyaŋe kpen'e wuu yaname na bood si'em la.” 66Ka ba keŋ niŋ ala, n zanbil kugir la ka ke ka sogianam guri li.

will be added

X\