1 Yesu n daa pian' pian'ad nwa naae la, ka yel o nya'andolib la ye, 2 “Baŋimi ye li kpelim daba ayi ka ku'um malek gaadug maluŋ la tienr dabisir paae. Ba na zaŋ Ninsaal Biig la n tis ka ba kpa' o tabil dapuudir zug.” 3 Ka Wina'am maalmaan kpeenmnam ne teŋin kpeenmnam la'as taaba n ken Kaifas yin. Kaifas da ane Wina'am maalmaan kpeenm. 4 Ka ba tu'as ne taaba n gban'e noor yinni ban na niŋ si'em n sua' gban'e Yesu n ku o. 5 Ka ba yel ye, “Ka'a maluŋ la daar laa, bozugo nidib la na ti zabidi o zug.” 6 Ka Yesu daa be Simon one da a kukom la yin n be Betani teŋin. 7 Ka Yesu da be ani n dit ka po'a so' da kenn o sa'an na n mor alabasta kugir kolibir ne tudaare din ligidi zu'e hale bedego n kpa'e n waligi Yesu zug. 8 Ka o nya'andolib n nye li la, ba sunya pelig ne. Ka ba bu'os ye, “Bo ligsa'uŋi nwa? 9 Bozugo ba naani kuosin tudaare nwa ligidi bedego n zaŋi li suŋ noŋ dim.” 10 Amaa Yesu baŋ ba ten'esug ka yeli ba ye, “Bo ka ya daam po'a la ala? O maal man yelsum. 11 Noŋ dim bene ya sa'an daar wusa, amaa man ku be ne yanam saŋa wusa. 12 On kpa'e tudaare niŋe m niŋgbiŋ nwa, pa'al ye o ti'ebidi ban na ti mum mam si'em. 13 Yelmeŋir ka m yeti ya ye, labasuŋ la n ken zin'isi'a wusa dunia zug, ba na yel po'a nwa yela, ka li niŋ o tienr.” 14 Ka Yesu nya'andol yinni, on yu'ur buon Judas Iskariot, daa keŋ maalmaan kpeenmnam sa'an 15 n yeli ba ye, “Ya na tisi m bo, ka m zaŋ Yesu niŋ ya nu'ugine?” Ka ba yo o anzurifa ligidi piistan'. 16 Ka din saŋa, ka o pin'il n bo suer kan ka o na zam Yesu. 17 Maluŋ pin'ilug daar kan ka ba na di bodobodo lin ka ba pu niŋ dabin la, Yesu nya'andolib kenn o sa'an na n bu'os o ye, “Fu bood ye ti maal zin'ikane ka fu na di maluŋ tienr diib la?” 18 Ka o lebis n yeli ba ye, “Kemi teŋ poogin la so' sa'an n yel o ye, ‘Ti Pa'an la yel ye, “M saŋa paaeya. Ka m na maal maluŋ tienr fu yin, man ne m nya'andolib.” ’ ” 19 Ka o nya'andolib la niŋ wenne Yesu n yeli ba la, n maal maluŋ tienr la diib. 20 Ka zaam ma'ae, ka o zin'in ne o nya'andolib pii ne yi la ye ba di. 21 Ka ban dit la, Yesu yeli ba ye, “Yelmeŋir ka m yeti ya ye, nid yinni ya sa'an nwa na zam man.” 22 Ka ba sunya sa'am hale, ka ba pin'il n bu'osid o yinni yinni ye, “Zugsoba, li ane man bee?” 23 Ka Yesu lebisi n yeli ba ye, “On ka o nu'ug na sia'al ne m nu'ug laan la, one na zam man. 24 Ninsaal Biig la na kpi wenne din pun da sob m yela si'em la. Amaa toog be one zam Ninsaal Biig la zug. Li da pu su'um ye o ma du'a o.” 25 Ka Judas one na zam Yesu la lebis n yel ye, “Pa'ana, li ane man bee?” Ka Yesu yel o ye, “Fun yel ala.” 26 Ka ban daa dit la, Yesu zaŋ bodobodo n pu'us Wina'am bareka ka gben'es n tis o nya'andolib la, ka yeli ba ye, “Di'em nwa n di. Lina a m meŋ niŋgbiŋ.” 27 Ka o zaŋ nwam n pu'us Wina'am bareka ka tisi ba ye, “Ya wusa di'em nu. 28 Bozugo nwa ane man ziim line ane nonaar yela. Ziim line yi ye nidib bedego nye suguru. 29 M yeti ya ne ye, m ku lem nu daam nwa ya'ase, asee daar kan ka m na lem nu danpaal ne ya, m Ba' so'olim ni la.” 30 Ka ban daa yuum Wina'am yuuma n naae la, ba yi n ken Olives Zuerin la. 31 Ka Yesu yeli ba ye, “Yanam wusa na ki'is ka bas man zina yu'uŋa, bozugo li sobne ye, ‘M na ku konbkem la ka pe'es na widig.’ 32 Amaa man ya'a ti vu'ug ka bas ku'um, m na deŋi ya tuon keŋ Galilee.” 33 Ka Piita lebis ye, “Hale baa bama wusa ya'a na zo ka bas fun, man ku bas foo.” 34 Ka Yesu yel Piita ye, “Yelmeŋir ka m yet uf ye, zina yu'uŋa nwa, fu na ki'is man noor atan' ka noraug naan kaas.” 35 Ka Piita lebis yel ye, “Hale baa li ya'a su'um ye man kpi ne fun, m ku ki'isi fu.” Ka o nya'andolib la wusa me yel ala. 36 Ka ban ne Yesu yi ken zin'ikan buon Gesemane la, ka o yel o nya'andolib la ye, “Kpelimi kpela, ka man keŋ tuon n sos Wina'am.” 37 Ka Yesu dol Piita ne Zebedee biis ayi. Ka o suunr sa'am bedego. 38 Ka o yeli ba ye, “M suunr sa'ameya, hale ka li wenne mam ye m kpine. Kpelimi kpela ka guri m.” 39 Ka o keŋ tuon bi'ela n vanbin teŋin, ka sos Wina'am ye, “M Ba', li ya'a a su'um, ke ka daam nwam nwa line pa'al m namisug la, gaad ka ke mam. Amaa ka'ane ye m sunf boodim, amaa lin ka fu bood ye li niŋ la.” 40 Ka o leb o nya'andolib la sa'an n nye ka ba gbisidne. Ka o bu'os Piita ye, “Yanam ku tun'e nie ne man baa bi'ela? 41 Niemi, ka sos Wina'am ka ya da kpen' makirine. Siig la bood Wina'am dolim, amaa ya niŋgbina ka' paŋa.” 42 Ka o lem leb ya'as n sos Wina'am n yel ye, “M Ba', daam nwam nwa ya'a ku gaad ka ke mam asee m nu li, kel ka li niŋne fu ya'am boodim.” 43 Ka o lem leb o nya'andolib la sa'an na ya'as, ka nye ka ba kpelim gbisidne, bozugo gbenn um daa more ba hale. 44 Ka o ke ba, ka leb ya'as, noor atan' daan n sos Wina'am ne pian'ad yin la gullim. 45 Ka o lem leb o nya'andolib la sa'an na, ka bu'osi ba ye, “Ya kpelim gbisidne ka vu'usidaa? Gosimi, saŋa paae na, ka ba pun zam Ninsaal Biig la, ka zaŋ o niŋ tuumbe'ed dim nu'usin. 46 Duomi ka ti keŋ. Gosim one n zam man la paae na.” 47 Ka on nam kpelim pian'ad la, ka Judas one a o nya'andolib pii ne yi la nid yinni, kenna ne nidib bedego bane yi maalmaan kpeenmnam ne kpeenmnam sa'an na, ne su'uraad ne balaya. 48 One zam o la, pun pa'ali ba si'el ye, “On ka m muak o noor la, one la. Gban'am o.” 49 Ka Judas paae Yesu sa'an na ka kpelim pu'us o ye, “Naa, Pa'ana,” ka muak o noor. 50 Ka Yesu bu'os o ye, “M zua, fu kena ye fu niŋ bo?” Ka ba kena gban'e Yesu. 51 Ka Yesu nid yinni fue o su'uraug n kia' maalmaan tumtum tobir n fi'ig. 52 Ka Yesu yel o ye, “Lebisim fu su'uraug la su li teongun, bozugo bane zabid ne su'us la na kpi ne su'us.” 53 Ka Yesu bu'os o ye, “Fu pu baŋ ye m tun'e sos m Ba' ka yimmo ka o na tis man maleknam tusa si'em naa? 54 Ka li ya'a niŋ ala, Wina'am gbauŋ n daa yel si'el la, na niŋ wala ka li a ameŋa?” 55 Ka Yesu bu'os nidib bedego la ye, “Ya kena ne su'uraad ne balaya ye ya gban'e m wenne faand bee? Daar wusa ka m be Wina'am yin n zamisid nidib, ka ya pu gban'e ma. 56 Amaa nwa wusa niŋne n pa'al ye Wina'am nodi'esidib n daa yel si'el n sob Wina'am gbauŋin la, ane ameŋa.” Ka o nya'andolib la wusa bas o ka zo. 57 Ka bane gban' o la, mor o keŋ maalmaan kpeenm Kaifas yin. Anina ka gbauŋmi'idib ne kpeenmnam daa pun la'as. 58 Ka Piita be nya'aŋ sa n dol hale n paae maalmaan kpeenm la samanin. Ka o kpen' zakin zin'i ne tumtumnib, ye o baŋ li koosug a si'em. 59 Ka maalmaan kpeenmnam ne nimbane yiti gban'e noor Jew dim yela la zan'asa, bo ziri kaset dim ye ba ma' tis Yesu, ka ba ku o. 60 Ka ba pu nye baa yinni, hale baa ziri kaset dim bedego daa ma' ziri tis o. Li nya'aŋ la ka nidib ayi due 61 n zi'e, ka yel ye, “Dau nwa daa yel ye, o na tun'e nwa'e Wina'am pu'usum yir la, ka lem nok daba atan' n me' li naae.” 62 Ka maalmaan kpeenm la due n zi'e, ka bu'os Yesu ye, “Fu ku lebis si'el ne bane yet si'em wusa tis uf laa?” 63 Amaa ka Yesu pu lebis si'ela. Ka maalmaan kpeenm lem pian'ad ne Yesu ya'as ye, “Poom ne Wina'am one voe la, ka yele ti, fu ya'a ane Kiristo one a Wina'am Biig la.” 64 Ka Yesu lebis n yel o ye, “Fun yel ala.” Amaa m yeti ya ye, “Lin pin'il zina zaŋ ken sa, ya na ti nye Ninsaal Biig la ka o zin'in Wina'am one so'e paŋ la datiuŋ ka kenna ne saŋgbana.” 65 Ka maalmaan kpeenm aaenn o meŋ fuud, ka yel ye, “Fu tu'ud Wina'am. Ti pu lem bood ye so' lem di kaset ya'ase. Ya pu wum on tu'ud Wina'am si'em la. 66 Ya ten'esid ye bo?” Ka ba lebis ye, “O su'um ne ku'um.” 67 Ka ba tubis nintoond n mad o nindaa, ka nwe' o ne kpisinkpila. Ka sieba nwe' o ne tampian'as 68 n yel o ye, “Fun Kiristo, baŋim one nwe' uf la.” 69 Ka Piita daa zin'i zakin la, ka bipuŋ keŋ o sa'an na n yel o ye, “Fu me daa bene ne Yesu, one yi Galilee la.” 70 Ka o ki'is ba wusa tuon n yel ye, “M pu baŋ fun yel si'el laa.” 71 Ka o yi yaŋirin ka bipuŋ so' lem nye o, ka yel bane be anina la ye, “Oŋa me daa be ne Yesu, one yi Nazaret la.” 72 Ka Piita ki'is ya'as, ka po ye, “M zi' oo.” 73 Li niŋ bi'ela, ka bane zi'e la li'el Piita ka ye, “Ameŋa, oŋa ane Yesu nid yinni, bozugo o pian'ad viig o gbin.” 74 Ka Piita pin'ili po, ka kaanb kaanbbe'ed tis o meŋ ye, “Mam zi' dau nwaa.” Ka saŋkan la ka noraug kaas. 75 Ka Piita yu'un tienn Yesu n sa yel si'el la ye, “Fu na ki'is noor atan' ye, fu zi' ma, ka noraug nyaan kaas.” Ka o yi yiŋ n kum hale bedego.
