MATEO 25

1“Dinzugo saŋkan la Wina'am so'olim na a wuu po'asada piiga bane zaŋ ba fitlanam n keŋ ye ba tu'os po'adit la. 2Ka anu mor ya'am. Ka anu ka'a ya'am. 3Ka bane ka'a ya'am la, mor ba fitlanam, ka pu mor kpaam. 4Amaa bane mor ya'am la, mor kpaam ne ba laas. 5Ka po'adit la yuug la zug ka ba wusa zoonsim gbis. 6“Ka yu'uŋ tisoos, ka kuŋ kaas ye, po'adit la kenna, duom n yi n tu'os o. 7“Ka po'asada la wusa due n maali ba fitlanam lauŋ. 8Ka bane ka'a ya'am la, yel bane mor ya'am la ye, ‘Bu'omi ya kpaam la n tisi ti; ka ti fitlanam kpigidne.’ 9“Ka bane mor ya'am la lebis ye, ‘Ayei, ti ya'a niŋ ala, kpaam la ku siak tinam ne yanam wusa. Kemi bane kuosid kpaam sa'an n da'e na.’ 10“Ka ban ken ye ba da' la, ka po'adit la paae na, ka bane ti'ebi naae la, dol o kpen' di'ema la zin'igin. Ka ba yo' za'anoor la. 11“Ka bane kpelim la, paae na n buon n yet ye, ‘Zugsoba, zugsoba, yo'ogum n tisi ti.’ 12“Ka o lebis ye, ‘Li ane ameŋa ka m yeti ya ye, m zi' yaa.’ ” 13Ka Yesu ye, “Dinzugo yanam me gu'usimi, bozugo ya zi' daakan ka Ninsaal Biig la na kenaa. 14“Yelkaŋa ya'as na wenne dau so' one daa ti'ebid ye o nwie. Ka buol o tumtumnib n zaŋ o araza'as niŋi ba nu'usin, 15ka tis yinni ligidi yon anu, ka tis yinni yon ayi, ka tis yinni yolug yinni. O tisne so' wusa on na tun'e si'em ben, ka nwie. 16Ka one di'e yon anu la pu yuuge, ka due nok o ligidi la n tolum n nye yon anu nyood. 17Ala men ka one di'e yon ayi la, nye yon ayi nyood. 18Amaa ka one di'e yolug yinni la keŋ n tu bok n pin' o zugsob ligidi la. 19“Ka li yuug hale, ka ba zugsob leb kul na ye o gelig ban tum si'em. 20Ka one di'e yon anu la, kena ne yon anu n paas n yel ye, ‘M zugsoba, fu daa tisi m yon anu. Gosima, m nye yon anu n paas.’ 21“Ka o zugsob yel o ye, ‘Li a su'um. Fu ane tumtumsuŋ one tum ne sida. M tis uf bun bi'ela, ka fu tum sida ne li. Dinzugo m na ke ka fu so'e bunam bedego. Zin'inim n maal sumalisim ne fu zugsob.’ 22“Ka one di'e yon ayi me kena n yel ye, ‘M zugsoba, fu daa tisi m yon ayi. Gosima, m nye yon ayi n paas.’ 23“Ka o zugsob yel o ye, ‘Li a su'um. Fu ane tumtumsuŋ one tum ne sida. M tis uf bun bi'ela ka fu tum sida ne li. Dinzugo m na ke ka fu so'e bunam bedego. Zin'inim n maal sumalisim ne fu zugsob.’ 24“Ka one di'e yolug yinni la, kena n yel ye, ‘M zugsoba, m mi' fu ane sukpi'euŋ daan. Ka fu bunne zin'ig kan ka fu pu bude, ka ku'on zin'ig kan ka fu pu yadige. 25Din ka m zo dabiem, ka keŋ pin' fu ligidi la teŋin. Di'emi fu bun.’ 26“Ka o zugsob lebis ye, ‘Tumtumbe'ed nwa. Fu ane gbanya'a. Fu mi' ye m bun zin'ig kan ka m pu bude, ka ku'on zin'ig kan ka m pu yadige. 27Li su'um ka fu daa naan zaŋin m ligidi n digil banki ni. Ka m ya'a kena la, man naan di'en m ligidi la ne nyood. 28Di'em o ligidi la n tis one mor yon piiga la. 29Bozugo ban wusa mor la, ba na nye paas, ka ba morem zu'e. Amaa one pu mor la, ba na di'e on mor si'el wusa la.’ 30Ka o zugsob yel ye, ba yiisimi dau be'ed kaŋa n bas likin. Anina ka ba na ti kaasid ka ga'adi ba nyina. 31“Saŋkan ka man, Ninsaal Biig la, na ti kena ne m na'am tita'ar ne m maleknam wusa la m na zin'i m na'am gbauŋ venliŋ la zugin. 32Ka dunia so'olim wusa na la'as m tuon, ka m na baki ba ben ben wenne konbkem bakid o pe'es ne o boos ben ben si'em la, 33ka zi'el pe'is m datiuŋ ka zi'el boos m dagobug. 34“Ka na'ab la na yel bane be o datiuŋ la ye, ‘Kemi na yanam bane mor m Ba' Wina'am yelsum la. Ya na di'e so'olim kan ka Wina'am pun ti'eb ye o tisi ya, hale ka dunia nam pu pin'il la. 35Bozugo m ko'om daa zabid, ka ya tisi m diib. Ku'onuud daa more m, ka ya tisi m ku'om ka m nu. M daa ane saan, ka ya di'e m. 36M daa ane biel, ka ya tisi m fuud, ka daa ben'ed, ka ya kaae m, ka daa be sarega ni, ka ya kenn m sa'an na.’ 37“Ka bane a tuumsuma dim la na lebis ye, ‘Zugsoba, saŋkan ka ti nye uf, ka fu ko'om zabid, ka ti tis uf diibo? bee ku'onuud mor uf, ka ti tis uf ku'om? 38Bee saŋkan ka ti nye uf ka fu ane saan, ka ti di'e fo? Bee saŋkan ka fu a biel, ka ti tis uf fuude? 39Bee saŋkan ka ti nye uf, ka fu ben'ed, bee fu be sarega ni, ka ti kaae uf?’ 40“Ka na'ab na lebisi ba ye, ‘Li ane ameŋa ka m yeti ya ye, yanam daa niŋ ala n tis m ba'abiig one kpelim kpaar la, li ane mane la ka ya niŋ tis.’ 41“Ka o na yel bane be o dagobug la ye, ‘Kemi sa, yanam bane ka Wina'am po noor n tisi ya la. Kemi kpen' bugum kane pu kpiigida la, bugum line ka Wina'am ti'eb ye o kpen'es Sutaana ne o nya'andolib la. 42Bozugo m ko'om daa zabid, ka ya pu tisi m diibo. Ku'onuud daa mor m, ka ya pu tisi m ku'om ye m nu. 43M daa ane saan, ka ya pu di'e ma. M daa ane biel, ka ya pu tisi m fuude. M daa ben'ed bee m daa be sarega ni, ka ya pu kaae ma.’ 44“Ka ba na lebis o ye, ‘Ti Zugsoba, saŋkan ka ti nye uf, ka fu ko'om zabid, bee ku'onuud mor uf, bee fu a saan, bee fu a biel, bee fu ben'ed, bee fu be sarega ni, ka ti pu suŋi fu?’ 45“Ka o na lebisi ba ye, ‘Ameŋa ka m yeti ya ye, yanam daa pu niŋ ala n tis m ba'abiig one kpelim kpaar la, li ane mane la ka ya pu niŋ tise.’ 46“Ka ba na keŋ kpen' namisug line ka' ben la ni. Amaa tuumsuma dim la na di'e nyovur line ka' naare.”

will be added

X\