MATEO 24

1Ka Yesu yi Wina'am pu'usum yin la n ken sa. Ka o nya'andolib keŋ o sa'an ye ba bigis o Wina'am pu'usum yir dood la. 2Ka o yeli ba ye, gosim ne'enam wusa. Li a sida ka m yeti ya ye, hale kugir yinni ku ti kpelim o tiraan zuginee. Ba na lobi ba wusa bas teŋin. 3Ka on keŋ zin'in Olive zuer zugin la, o nya'andolib ma'aa kenn o sa'an na, ka yel o ye, “Yelimi ti saŋa kan ka ne'enam nwa na naam, ne zanbin line na pa'ali ti fu ken saŋa ne dunia naar saŋa.” 4Ka o lebisi ba ye, “Da ke ka so' ma'a yaa. 5Bozugo nidib bedego na kena n pian'ad m yu'ur n yet ye, ‘Mane a Kiristo la,’ ka na pan'as nidib bedego ka ba yidig. 6Ka ya na wum tanp tukpeedug yamma, ka lem wum li labaar lallisa. Da ke ka dabiem more yaa. Ne'eŋa na niŋ, ka lee ka' dunia naar benne. 7Ka buudi na zab ne buudi, ka na'ab so'olim me na zab ne na'ab so'olim, ka ko'om tita'ar na lu hale, ka teens na dam zin'is bedego. 8Ka namisug ne'eŋa wenne po'a naani sa'a ye o du'a ne. 9“Ba na gban'e ya n tis, ka ba namisi ya, ka buudi wusa na kisigi ya man yu'ur zug. 10Ka nidib bedego na bas yelsida suer la lieb tuumbe'ed dimi n gbi'id taaba, ka kis taaba. 11Ka ziri nodi'esidib bedego na due pan'as nidib bedego ka ba yidig. 12Ka tuumbe'edi pe'esid la zugoo ka nidib bedego noŋilim na sie. 13Ka one na modigi paae li ben la na nye faangir. 14Ka Wina'am so'olim labakaŋa nwa na mooli gilig dunia, ka buudi wusa na wumi li, ka li ben nyaan paae. 15“Ka ya ya'a nye bun kisa line sa'amid si'el mekama, lin ka Wina'am nodi'es Daniel da sob li yela la, ka li zi'e Wina'am zin'isuŋin la, (kel ka one karem la baŋ ne'e gbin,) 16bane be Juuda teŋin zom keŋ zueya ni. 17Ka bane be yiiŋ da lem kpen' doodin ye ba zaŋ si'ela. 18Ka one be poogin da fendigi leb yin ye o zaŋ o fuugo. 19Li na toe saŋkan la tis po'ab bane mor poos ne bane mor bilies. 20Sosimi Wina'am ka ya zoos saŋa da sia'al waad saŋa bee Jew dim vu'usum daare. 21Ka namistita'ar na kena n toe hale n gaad dunia pin'ilugin la n ti paae saŋkan la, ka namisug ku len bee zem wuu ne'eŋa ya'asa. 22Ka Wina'am ya'a pu deŋim sien dabisa laa, ka ba gima, so' naan ku tiliginee. Amaa nidib ban ka o gaans la zug, o na sie dabisa la. 23“Ka so' ya'a yeli ya ye, ‘Gosimi, Kiristo nwa, bee Kiristo la be kpe'e sa,’ da siakiyaa. 24Ka ziri Kiristonam ne ziri nodi'esidib na due tum tuumnyalima ne tuum kpi'ema line na pa'al ye ba mor paŋ, hale n ti boodin ye ba naani pan'asin ban ka Wina'am gaans la (li ya'a tun'e niŋin.) 25Man yeti ya ne'eŋa ne ye ya gu'us ka li nan pu paa na. 26“Ka ba ya'a yeli ya ye, ‘Gosimi, o be moogin,’ da keŋi anii. Bee ba ya'a ye ‘O sua' doogin,’ yanam da siaki. 27Ka Ninsaal Biig la ken la na, na wenne wuu saa naani iank ya nya'aŋ n ti paae ya tuona la. 28Bunkpiiluŋ ya'a be zin'isi'a, zuund na la'as ani. 29“Ka namis kaŋa ya'a kpelim naae, ‘winig na lieb zibisug, ka nwadig ku nie, ka nwadibibis na naam saazug n lut na. Ye ka si'elnam bane mor paŋ agol na dam.’ 30“Ka Ninsaal Biig ken la na, zanbin na nie saazug. Ka dunia buudi wusa na kaasidi nwe'edi ba meŋ. Ka ba na nye Ninsaal Biig la n kenna n be saŋgbana zug ne paŋ ne o na'am ka li nyeen pil pil. 31Ka o na tum o maleknam ka na'atan pi'eb hale ka ba la'as ninban ka Wina'am gaans la, dunia zin'is ben wusa. 32“Keli ka kekaŋ pa'ali ya si'el. Kekaŋ ya'a ti bus vanpola n ti nobugi sobig la, ya mi' ye seeung li'eliya. 33Ala men ya ya'a nye ne'enam wusa ya na baŋ ye Ninsaal Biig la lebug li'elne, hale n paae za'anoorin. 34Asida ka m yeti ya ye, zumaaŋ kaŋa nwa nidib ku gaade, asee ne'enam wusa naam. 35Saazug ne dunia na gaad, ka man pian'ad la lee ku gaade. 36“Ka li dabisa ne li saŋa la, so' ku baŋi lii, hale baa maleknam bane be arazana ni bee Biig la meŋa, asee Ba' one a Wina'am la gullim. 37Ninsaal Biig la ken na, na wenne Noa saŋa la ne. 38Ku'om da nan pu di dunia la, saŋkan la nidib daa dit ka nuud, ka dit po'ab ka tisid ba biis sidib hale n ti paae daakan ka Noa kpen' aaruŋ tita'arin la. 39Ka ba pu baŋi li yela hale saa ni ka ku'om di ba wusa. Li me na ane ala n tis Ninsaal Biig ken la na. 40Ka dapa ayi na be poogin ka ba na zaŋ yinni ka bas yinni. 41Po'aba ayi'iŋa na be neerin, ka ba zaŋ yinni ka bas yinni. 42“Gu'usimi; ka ya zi' ya Zugsob la na leb daasi'er naa. 43Baŋimi ye yidaan la ya'a baŋ saŋkan ka na'ayiig na kena ye o zuu, o na ti'ebi gur, hale ka na'ayiig la ku nyaŋe kpen' zuu. 44Dinzugo yanam me ti'ebimi; ka Ninsaal Biig la na kena saŋkan ka ya ku baŋi. 45“Dinzugo ano'one lee a tumtum kane a yelsida sob ne ya'amdaana, ka o zugsob noke o yir wusa gu'ul o, ka tisi o noor ye o diisim bane be ani la saŋa kane nara. 46Tumtum kan na paam yelsum o zugsob ya'a leb na nye ka o tum ne wuu one yel o si'em la. 47Li ane asida ka m yeti ya ye o zugsob la na ke ka o gur on so'e si'el wusa. 48Ka o ya'a a tumtum one a bugis, ka ten'es o meŋ yela ye, o zugsob ku kul to'o naa. 49Ka o pin'ili bu'ud o tumtum taaba la, ka dit ka nuud ne danuudib, 50ka o zugsob na leb na daakan ka o ku baŋi, 51ka o na namis o, ka ke ka o la'as ne zam dim. Anina ka ba na kum ka ga'ad nyina.

will be added

X\