MATEO 23

1Ka Yesu yel o nya'andolib ne nidib la ye, 2“Gbauŋmi'idib ne Farisee dim di'e Moses zin'ig. 3Dinzugo ba ya'a pa'ali ya si'em, yanam tum ala ka da gosidi ba tuuma, bozugo ba pa'ane ka pu dol ban pa'an si'em laa. 4Ba pa'alug la wenne zetebisa ka ba lo ziil nidib ne, amaa ba meŋ ku si'isi li ne ba nu'ubila ye ba suŋi baa. 5“Bozugo ba zaŋ Wina'am gbauŋ la sobsieba n sobi niŋ daka bibisin n tabil ba gbeedin ne ba nu'usin. Ka pa'asidi ba futusa wa'alim. 6Ba bood kpeenmnam zin'isa di'ema maluŋin ne zin'isuma la'asug doodin, 7ka bood ye nidib pu'usidi ba da'asin ye, ‘Naa, pa'ana.’ 8“Da ke ka ba buoni ya ye ‘Pa'ana.’ Bozugo ya more pa'an yinni ma'aa, ka yanam wusa a ba'abiis ne taaba. 9Da buoni so' ye, ‘Ti ba'’ dunia nwa nii. Bozugo ya more Ba' yinni, one be arazana ni. 10Ka da ke ka so' buoni ya ye, ‘Zugsoba.’ Bozugo ya more Zugsob yinni, one a Kiristo la. 11One a kpeenm ya sa'an o su'um ye o a ya tumtum. 12Ka one bood ye o du'os o meŋ, Wina'am na sigis o. Ka one bood ye o sigis o meŋ Wina'am na du'os o. 13“Farisee dim ne gbauŋmi'idib bane a zam dima, ya na paam toog, bozugo ya yo' Wina'am so'olim la ye nidib ku kpen'e. Yanam pu kpen'eda, ka me ku bas suer ye nidib kpen'e. 14“Farisee dim ne gbauŋmi'idib bane a zam dima. Ya na paam toog, bozugo ya faand pokonya ya ka ma'ad nidib n pu'usid Wina'am ne pu'us wa'a. 15“Gbauŋmi'idib ne Farisee dim, bane a zam dima. Ya na paam toog, bozugo ya lo'oŋidne ateuk ne teŋ bane lal hale. Ka ya ya'a paam nid yinni ka o siaki dol ya suer ya na ke ka o keŋ bugum teŋ hale n gat yanam meŋ noor ayi'iŋa. 16“Yanam bane a tuongatib ka a zunzoos la, ya na paam toog, bozugo ya yet ye, so' ya'a po pan'alim ne Wina'am pu'usum yin la, li ane zaalim. Amaa so' ya'a po pan'alim ne salima line be yir la poogin la, li ane tilas ye o na lebis o pan'aluŋ la. 17Zunzoos bane a zon ne, line kpi'ema? Salima la bee pu'usum yir line ket ka salima la a Wina'am bunsuma la? 18Ya lem pa'an ye so' ya'a po pan'alim ne Wina'am maan zin'ig la li ane zaalim. Amaa so' ya'a po ne piini line be maan zin'ig la, li ane tilas ye o na lebis o pan'aluŋ la. 19Zunzoose, line kpi'ema? Piini la bee maan zin'ig line ket ka piini la a Wina'am bunsuma la? 20Ka one po ne maan maalug bimbim la me po ne la'am ne line be anina wusa. 21Ka one po ne pu'usum yir la me po ne la'am ne Wina'am one be anina la. 22Ka one po arazana la me po ne Wina'am na'am gbauŋ, ne one zin'i li zug la. 23“Gbauŋmi'idib ne Farisee dim, bane a zam dima. Bozug ka ya pudugidi ya zenma'asa zin'is piiga, ka yiisid yinni tisid Wina'am, ka pu niŋid yela bane kpi'em wada la poogin line a popielim ne nimbaanlzoor ne yadda niŋir laa. Li a su'um ka ya maalin yelbama ka da yiis sieba n base. 24Yanam bane a tuongatib ka a zunzoose, ya yiisid pompu'os ya bunnuuda ni basid, ka lee von yugum. 25“Gbauŋmi'idib ne Farisee dim bane a zam dima, ya na paam toog. Ya piesidi ya laas ne butiis nya'aŋ la ka ba a nyain, ka ba poogin la pe'el ne filuŋ ne fufum bunam. 26Farisee dim bane wenne zunzoose! Piemi line be ya laas poogin yiiga la ka li nya'aŋ me na a nyain. 27“Gbauŋmi'idib ne Farisee dim bane a zam dima. Ya wenne yaad ka ba pent ne penti piel ne ka li venl hale, ka li poogin pe'el ne ku'um konba ne pon'osug. 28Ya ane ala men. Ya ket ka nidib ten'esid ye ya ane ninsuma ka ya poogin pe'el ne zam ne tuumbe'ed. 29“Gbauŋmi'idib ne Farisee dim, bane a zam dima. Ya meed Wina'am nodi'esidib yaad ka maan Wina'am ninsoma la yaad ka li venl hale. 30Ka yel ye, yanam ya'a da beene ya yaanam saŋa la, ya ku suŋini ba n kuun Wina'am nodi'esidib laa. 31Ya dine ya meŋ kaset ye ya ane bane da ku nodi'esidib la yaas, 32ka kpelim naae lin ka ya yaanam da pin'il la. 33“Yanam wiigi ne wiigi biise, ya na niŋ wala luak ne saria kadib daan la ka o ku kpen'esi ya bugum teŋine? 34Dinzugo m tum nodi'esidib ne ya'amdim ne gbauŋmi'idib, ka ya na ku sieba, ka kpa' sieba dapuuda zut, ka bu sieba ne kpa'asa ya la'asug doodin ka doli ba buga teŋ teŋ n namisidi ba. 35Lin ke ka popielim dim wusa bane ka nidib ku dunia ni la ziim na zuoni ya zutin, line pin'il Abel kuub n ti paae Barakia biig, Zekaria kuub saŋa la, one ka ya ku Wina'am pu'usum doog ne maan maalug bimbim teŋsuk la. 36Sida ka m yeti ya ye, nwa me na paae zumaaŋ kaŋa nidib wusa. 37“Jerusalem dima, Jerusalem dima, bane kuud Wina'am nodi'esidib ka lobid ban ka Wina'am tumi ba la ne kuga. Noorin babiga ka m bood ye m la'ase ya wenne nonya'aŋ la'asedi o biise o kpukpama ni si'em la, ka ya me pu siakida. 38Baŋimi Wina'am na basi ya ka ya teŋ lieb zaalim. 39M yeti ya ye, ya ku len nyee m ya'asa, asee ka ya ti yel ye, ‘Wina'am yelsum be ne one kenna ne Zugsob la yu'ur.’ ”

will be added

X\