1 Ka Yesu lem pian'a ba ne siilis, ka yel ye, 2 “Wina'am so'olim la wenne na'atita'ar one maali o biig po'adiir di'ema. Ka o tumi o tumtumnib ye ba buol nidib ban ka o daa deŋi tienn ba la. 3 Ka ba pu bood ye ba kenaa. 4 “Ka o lem tum tumtumnib sieba ya'as n ye, ‘Yelim ban ka m daa deŋi tienn la ye m ti'eb diibi zi'el, hale ka ku na'araad ne konbbeda, ka si'el mekama wusa ti'ebeya.’ 5 “Ka ba zan'as ka keŋe ba ken. Ka yinni keŋe o poogin, ka yinni keŋe o kuosim zin'igin. 6 Ka bane kpelim la gban'e o tumtumnib la tu'u ba yaal ka kuu ba. 7 Ka na'ab la sunf pelig, ka o tum o zabzabidib, ka ba ku ninkuudib la ka nyu'e ba ya. 8 “Ka o buol o tumtumnib la ka ye, ‘Si'el mekama ti'ebeya, ka man daa tienn sieba la ka' ninsuma, 9 dinzugo kemi suekita ni, ka ya ya'a nye nidib si'em, yanam buolimi ba di'ema la ni na.’ 10 Ka tumtumnib la niŋ ala ka ba keŋ suekita ni ka buol ban nye sieba wusa, ninsuma ne nimbe'ednam. Ka nidib pe'el di'ema zin'igin la. 11 “Ka na'ab la keŋ ye o gos nidib la, ka nye ka dau so' pu ye di'ema fuugo. 12 Ka o yel o ye, ‘M zua, li niŋ wala ka fu kenn di'ema la na, ka pu yee li fuugo?’ Ka o pu nyaŋe lebis si'ela. 13 “Ka na'ab la yel o tumtumnib ye ba loom o nu'us ne o noba yiis o lob likin sa. Ka anina ka nidib na ti kum ka ga'adi ba nyina.” 14 Ka Yesu lem yel ye, “Nidib bedego ka ba buon amaa bi'ela ka ba gaans.” 15 Ka Farisee dim keŋ gban'ad noor ban na niŋ si'em bend o, pian'ad la poogin. 16 Ka ba tum ba nya'andolib o sa'an na ne na'ab Herod nidib, ka ba yet ye, “Pa'ana, ti mi' ye fu ane yelmeŋir sob, ka pa'an Wina'am suer su'uŋa, ka pu gi'igid nidiba, ka me pu gaansid kpi'emnam ne tadimnama. 17 Yelimi ti fun ten'esid si'el. Li dol suer ye ti zaŋ lampo n tis na'ab Kaisa bee li pu dol suere?” 18 Ka Yesu baŋi ba poten'ebe'ed la, ka yeli ba ye, “Zam dima, bo ka ya makid mane? 19 Bigisim man lampo la'af yinni.” Ka ba mor la'af na. 20 Ka o bu'osi ba ye, “Ano'on foto ne ano'on yu'ure n sobi tabili li ni?” 21 Ka ba yel ye, “Li ane Kaisa din.” Ka o yeli ba ye, “Tisimi na'ab Kaisa o din ka me tis Wina'am line a o din.” 22 Ka ban wum ne'e la, ka li lidigi ba, ka ba bas o ka keŋ. 23 Ka daar kan la ka Sadusii dim bane yiti yet ye ku'um ku vu'ug la, kenn o sa'an na ye ba bu'os o si'el, 24 ka bu'os o ye, “Pa'ana, Moses da sob ye, dau so' ya'a kpi ka ka' biiga, asee ka o bier bee o pitu di pokoonr la, n du'a biise tis one kpi la. 25 “Kelisima. Dau daa be ti sa'an ne o pitib ayuobu, ka di po'a ka kpi ka pu mor biiga. 26 Ka one tia'al la di pokoonr la ka me kpi. Ka atan' sob la me niŋi ala n ti kaligi ba wusa. 27 Ka po'a la yu'un kpi. 28 Ka ba ya'a vu'ug kumin ne, ano'one na so'e po'a la, ban wusa di o la zugo?” 29 Ka Yesu lebisi ba ye, “Ya yidig ne, yaname zi' Wina'am gbauŋ la gbin ne Wina'am paŋ la zug. 30 Ku'um vu'ugir daar la ba pu dit po'aba ka po'ab me pu kun dapa. Ba wenne maleknam bane be arazana ni la. 31 Ka li ya'a ane ku'um vu'ugir la, ya pu karem lin ka Wina'am yele ya ye, 32 ‘Man ane Abraham Wina'am ne Isaak Wina'am ne Jakob Wina'am la.’ Zugsob a Wina'am one pu kpiida, amaa o voe dinzug Wina'am sa'an ka nidib wusa na voe.” 33 Ka nidib la wum ka on pa'al ne'eŋa la ka li lidigi ba. 34 Ka Farisee dim la wumi ye Yesu nyaŋ Sadusii dim la, ba la'as o sa'an na. 35 Ka ba yinni, one a wada sob bood ye o zam o, ka bu'os o ye, 36 “Pa'ana, wada kane kpi'em wada la wusa ni?” 37 Ka o lebis o ye, “ ‘Noŋimi Wina'am one a fu Zugsob la ne fu sunf wusa, ne fu siig wusa, ne fu ya'am wusa.’ 38 Ne'eŋa a wada kpi'euŋ line a yiiga la. 39 Ka line tia'al la wenne lina ye, ‘Noŋimi fu tiraan wuu fu meŋ ne.’ 40 Ka Moses wada la ne Wina'am nodi'esidib sob si'el wusa la be ne bama nya'aŋ.” 41 Ka Farisee dim la'as taaba zi'e la, Yesu bu'osi ba 42 ye, “Ya ten'esid bo Kiristo yela? Ano'on yaaŋ a o?” Ka ba lebis ye, “David yaaŋ.” 43 Ka o yeli ba ye, “Li niŋ wala ka David buon o ye, Zugsob, on pian'ad lin ka Wina'am Siig Suŋ tis o la, ye 44 ‘Zugsob Wina'am yeli m Zugsob ye, “Zin'inimi m datiuŋ, hale ka m ti maal fu bi'emnam ka ba be fu noba teŋir.” ’ ” Ka Yesu bu'osi ba ye, 45 “David ya'a buon o ye, Zugsoba, li niŋ wala ka o a David yaaŋa?” 46 Ka so' pu lem nyaŋe lebis o si'ela. Ka dabis kan la gaad, so' pu lem nyaŋe bu'os o si'el ya'asa.
