MATEO 21

1Ka ban li'el Jerusalem la ba paae Befage, Olive zuerin la. Ka Yesu tumi o nya'andoliba ayi, 2ka yeli ba ye, “Kemi teŋkpeŋ kane be ya tuon la ka ya na nye, ka ba lo buŋe zi'el ne o biig. Idigim o more ba na. 3Ka so' ya'a yeli ya si'el, yanam on yelim ye Zugsob la bood o, ka o na tisi ya. Ka ya mor o na.” 4Ne'eŋa niŋe ye li pa'al Wina'am nodi'es la n da pian' si'el la ye li aa ameŋa ye, 5“Zion dima ya na'ab kenna. O sie o meŋi ban' buŋ. O ban'ad bunkonbbil kane ka ba more tum tuuma.” 6Ka nya'andolib la keŋ tum on yeli ba si'em la. 7Ka ba mor buŋ ne o biig la na, ka ba noki ba fuud n pa'al buŋ la zug ka o ban'. 8Ka nidib bedego yadigi ba fuud sueren, ka sieba me nwa'e tiis vaandi yadig. 9Ka nidib bane be o tuon ne bane be o nya'aŋ la wusa yet ne kukotita'ar ye, “Hosaana, na'ab David Yaaŋa. Yelsum be ne one ken na ne Zugsob la yu'ur zug. Bane be agol na yel ye, Hosaana.” 10Ka ban n kpen'ed Jerusalem la, ka li lidig teŋ la dim wusa, ka ba bu'osid ye, “Ano'one nwa?” 11Ka nidib la lebis ye, “One a Wina'am nodi'es Yesu la, one yi Nazaret, Galilee so'olimin la.” 12Ka Yesu kpen' Wina'am pu'usum yin, ka nye bane kuosid ne bane da'ad la'ad. Ka o kadi ba yiis, ka lidigi bane tiad ligidi la teebulnam lub, la'am ne bane kuosid dawana la kogus men. 13Ka o yeli ba ye, “Li sob Wina'am gbauŋin ye, ‘Ba na buoni m yir la ye Wina'am pu'usum yir.’ Ka yanam lebigi li ka li a na'ayiis suak zin'ig.” 14Ka zunzoos ne wabis kenn o sa'an na ka o ti'ebi ba. 15Ka Wina'am maalmaan kpeenmnam ne gbauŋmi'idib nye tuumnyalimban ka o tum la, ka biis maan vuud pu'usum yin la, n yet ye, “Hosaana, yelsum be ne na'ab David Yaaŋ la.” Ne' ke ne ka ba sunya pelig. 16Ka ba yel Yesu ye, “Fu wum ban yet si'em laa?” Ka Yesu lebis ye, “Eenn, m wumiya. Amaa ya pu karem lin yet ye, ‘Fu di'e pian'ar dine yit biis ne bilies noya ni laa.’ ” 17Ka Yesu yi ani keŋ Betani teŋin gbeenn anina. 18Ka beug nie ka o lebid Jerusalem ka o ko'om zabid, 19ka o nye kekaŋ ka li zi'e suer la kukpeŋ. Ka o keŋi ani ka pu nye kekamaa ka li ane vaand gullim. Ka o yel tiig la ye, “Fu ku lem wel ya'ase.” Ka anina yim ka tiig la kudug. 20Ka o nya'andolib la nye li la ka li lidig ba, ka ba ye, “Li niŋ wala ka tiig nwa kpelim kudug to'oto?” 21Ka Yesu lebis ye, “Asida ka m yeti ya ye, ya ya'a niŋ Wina'am yadda ka pu bi'esida, ka'a ye ya tum wen wuu man tum tikaŋa si'em la ma'anee. Amaa ya na tun'e yel zuekaŋa ye li vikim keŋ lu mo'arin la sa, ka li na niŋ ala. 22Ka ya ya'a niŋ yadda ka sos si'el Wina'am sa'an, ya na di'e.” 23Ka on kpen' pu'usum yin n pa'an la, ka maalmaan kpeenmnam ne kpeenmnam sieba kena bu'os o ye, “Fu nye suer yaani tum tuum bama? Ka ano'on tis uf noore?” 24Ka Yesu lebisi ba ye, “Mam me na bu'osi ya si'el. Ya ya'a lebisi ma, m na yele ya one tis man noor la. 25Ka bu'osi ba ye, ‘Joon ku'om suub la da yine Wina'am sa'an na bee ninsaalib sa'an ne?’ ” Ka nidib la gban'ad noor yinni ne taaba ka yet ye, “Ti ya'a yel ye, ‘Wina'am din,’ o na yele ti ye, ‘ka bo ka ti pu siaki?’ 26Ka ti ya'a ye, ‘dunia din,’ ti gi'id nidib la, bozugo ba siak ye Joon daa ane Wina'am nodi'es.” 27Ka ba lebis Yesu ye, “Ti zi'.” Ka o me yeli ba ye, “Alaa mam me ku yele ya mam nye noor la so' sa'an ne.” 28“Ya ten'es ka siiliŋ kaŋa gbin a bo? Dau so' daa be more o biis ayi ka keŋ yinni sa'an yel o ye, ‘M biiga, kem tum lombon'ogin la zina.’ 29“Ka biig la lebis o ye, ‘M ku keŋe.’ Ka li niŋ bi'ela ka o tiak o ya'am ka keŋ. 30“Ka o keŋ oŋa la sa'an ye o me kem tum. Ka o yel o ye, ‘M zugsoba m na keŋ.’ Amaa o pu keŋe. 31“Ka babayi nwa, ano'one tumi o ba' boodim la?” Ka ba lebis ye, “Yiiga sob la.” Ka Yesu yeli ba ye, “Asida ka m yeti ya ye, lampodi'esidib ne po'agoonda na deŋi ya tuon kpen' Wina'am so'olim la ni. 32Bozugo Joon daa kena ye o pa'ali ya popielim suer. Ka yanam pu niŋ o yadda, amaa lampodi'esidib ne po'agoonda daa niŋ o yadda. Hale baa yanam nye bama nwa la, ya pu siaki tiake ya sunyaa. 33“Kelisimi siiliŋ yinni ya'as. Yidaan da be ka maali o tiis poog, ka me zaŋguoma n giligi li, ka me pogu'ud doog, ka tu bumbok kane ka ba na nwia'asid wela la ku'om, ka bas n tis pogu'udib ka nwie. 34Ka li pon'ob saŋa li'el la, o tumi o tumtumnib ye ba di'e wela line na aa o din na. 35“Ka bane di'e poog la tum la gban'e o tumtumnib la yinni bu' o, ka ku yinni ka lob oŋa la ne kuga. 36Ka o lem tum sieba ka ba zu'e gaad yiiga dim la. Ka ba lem niŋe ba ala ya'as. 37Ka o yu'un tumi o meŋ biig ka ten'esid ye, ‘Lin a m meŋ biig la. Ba na na'as o.’ 38“Ka kpaadib la nye o la ka yel ye, ‘Eheenn, oŋa so'e faar la. Keli ka ti kuu o ka ti na so'e faar la.’ 39Ka ba ve' o yiis poogin la ka kuu o.” 40Ka Yesu ye, “Poog la daan ya'a kul na, ya baŋ ye o na niŋ pogu'udib la wala?” 41Ka ba lebis ye, “O na namis nimbe'ednam la hale kuu ba, ka tiake ninsieba ka ba di'e poog la tum, bane na tis o wela line aa o din, pon'ob saŋa ya'a ti paae.” 42Ka Yesu bu'osi ba ye, “Ya pu karem Wina'am gbauŋ line yet ye, ‘Kugkan ka tan meedib da zan'as la, lieb lodigin kugsuŋ. Nwa ane Zugsob la niŋir ka ti nyee li ka li a tuumnyalima.’ ” 43Ka Yesu yeli ba ye, “M yeti ya ye, Wina'am so'olim la, m na di'e li ya sa'an ka noke tis buudi bane na wel welsuma.” 44Ka on mekama lu kugkaŋa zug o na pusig n yaam. Ka kugir la ya'a lu so' zug li na medig o. 45Ka maalmaan kpeenmnam ne Farisee dimi wum siilis la, ka ba baŋ ye o pian'adi ban yela. 46Ka ba boodin ye ba gban' o ka gi'ig nidib la, bozugo ba siak ye o ane Wina'am nodi'es.

will be added

X\