1 Ka Yesu yel ye, “Wina'am so'olim wenne yidaan, one yi bekeeung n keŋ nok tumtumnib ye ba tum o poogin. 2 Ka ba siak ye o yo ba anzurifa la'af daar yinni poogin. Ka o tumi ba o poogin la. 3 “Ka nintaŋ ziankir saŋa, ka o yi ka nye ninsieba ka ba zi'e da'an, ka pu tumma. 4 Ka o yeli ba ye, ‘Yanam me kemi m poogin la tum. Ka m na yo ya line nar.’ Ka ba due keŋ poogin la. 5 Ka nintaŋ tisoos ne nintaŋ gbeligir ka o yi lem niŋ ala ya'as. 6 Ka zaam noor ka o lem nye ninsieba ka ba zi'e. Ka o bu'osi ba ye, ‘Bozugo ka ya zi'e beugin sa, ka pu tum si'ela?’ 7 “Ka ba lebis ye, ‘So' pu noki ti tuuma la zug.’ Ka o yeli ba ye, ‘Yanam me kemi m poogin la tum.’ 8 “Ka winlir saŋa paae ka poogdaan yel o tumtumnib kpeenm ye, ‘Buolim tumtumnib la na, ka yo ba. Pin'ilim yo bane yuolim kena la n ti paae bane deŋ na la.’ 9 “Ka bane keŋ zaam noor la wusa di'e anzurifa la'af yinni yinni. 10 Ka bane deŋi kena la mor potenda ye ba na di'e gaad bane yuolim kena la. Ka ba wusa di'e anzurifa la'af yinni yinni wenne bane yuolim kena di'e si'em la. 11 Ka ban di'e la, ka nyon ne yidaan la, 12 ka yet ye, ‘Bane yuolim la tum ne saŋa bi'ela nwa. Amaa fu ke ka ba di'e azinzema ne tinam bane tum hale beugin sa n namis ne nintaŋ tuulug.’ 13 “Ka o lebisi yel ba nid yinni ye, ‘M zua, m pu tum uf taale. Fu pa'a pu siak ye fu na di'e anzurifa la'af yinnii? 14 Nokimi fu yood n keŋ. Li ane man boodim ye o yo bane yuolim la azinzema ne fun. 15 Li pu nar ye m zaŋi m la'ad niŋ lin ka m booda? Bee m tuumsoma la ka fu nen naa? 16 “ ‘Dinzugo tuon dim na lieb nya'aŋ dim, ka nya'aŋ dim lieb tuon dim.’ ” 17 Ka Yesu daa wa'ae Jerusalem la, o da buoli o nya'andolib la gullim ka yeli ba ye, 18 “Gosimi ya, ti wa'ane Jerusalem, ka ba na gban'e Ninsaal Biig la n tis Wina'am maalmaan kpeenmnam ne gbauŋmi'idib, ka ba na kad o saria ka koos o yela ye o su'um ne ku'um. 19 Ka nok o tis bane ka' Jew dim ka ba na la'ad o, ka fieb o, ka kpa' o dapuudir zug n kuu o. Ka daba atan' daar, ka o na lem vu'ug ka bas ku'um.” 20 Ka Zebedee po'a dol o biis n kenn Yesu tuon na igin ka sos o ye o maal si'el tis o. 21 Ka Yesu bu'os o ye, “Fu bood ye m maal bo tis uf fo?” Ka po'a la lebis ye, “M bood ye fu siak ka fu ya'a ti di fu na'am la, fun ke ka m biribis ayi nwa, ka ayinni zin'ini fu datiuŋ ka ayinni la me zin'ini fu dagobug.” 22 Amaa Yesu lebisi ba ye, “Ya zi' yaname sosid si'el yelaa. Ya na nyaŋe nu m nwam kane aa m namisug ka m ye m nu laa?” Ka ba ye, “Ti na nyaŋ.” 23 Ka o lebis ye, “Ya sid na nu li. Amaa man lee pu mor suere na ke ka so' zin'ini m datiuŋ bee m dagobuga, asee ban ka m Ba' ti'ebi guri ba la.” 24 Ka nya'andolib bane kpelim piiga la n wum ne'eŋa la, ka ba sunya pelig ne babayi la. 25 Ka Yesu buoli ba n yel ye, “Ya mi' ye bane a na'anam dunia nwa ni mugusidi ba nidib hale. 26 Amaa ne yanama, ya ku niŋ alaa. Ka one bood ye o a kpeenm ya sa'an, li nar ka o liebi ya tumtum. 27 Ka one me bood ye o a tuon sob, on na liebi ya yamug wenne Ninsaal Biig la. 28 O pu kena ye nidib tum tis oo, amaa o kena ye o tum tisi ba ka yiisi o nyovur ka ke ka nidib bedego nye yolisim.” 29 Ka ban daa yit Jeriko la, ka nidib bedego dol Yesu. 30 Ka zunzoos ayi zin'i suer kukpeŋ ka wum ka Yesu gaad la, ka ba tansid ye, “David Yaaŋa, zomi ti nimbaanlig.” 31 Ka nidib la kadi ba ye ba kel vuud. Ka ba maligim tans gaad ala ye, “Zugsoba, one a David Yaaŋa, zomi ti nimbaanlig.” 32 Ka Yesu zi'en ka buoli ba, ka bu'osi ba ye, “Ya bood ye m tum bo tisi ya?” 33 Ka ba lebis ye, “Zugsoba, ti bood ye ti nini lak ka ti nyet.” 34 Ka Yesu zo ba nimbaanlig ka si'isi ba nini, ka ba nini lak ka ba nyet, ka ba kpelim dol o.
