MATEO 2

1Ba daa du'a Yesu Betilehem n be Juuda so'olim, na'ab Herod saŋa la. Ka dap bane a baŋidib yi ya nya'aŋ n kenn Jerusalem na 2n bu'osid ye, “On ka ba du'a ye o niŋ Jew dim na'ab la be yaani? Bozugo ti nye ne o nwadibil ya nya'aŋ, lin zug ka ti kena ye ti pu'us o.” 3Na'ab Herod n daa wum la, li pak on ne Jerusalem dim wusa. 4Ka o buol Wina'am maalmaan kpeenmnam ne gbauŋmi'idib n bu'osi ba wusa ye, “Yaani ka ba na ti du'a Kiristo la?” 5Ka ba yel o ye, “Betilehem n be Juuda so'olim, bozugo Wina'am nodi'esidib la da sobne ala ye, 6‘Yanam Betilehem dima, Betilehem kane be Juuda so'olim la, ye ya na'am ka' bumbil Juuda na'anam sisooginee, ye bozugo ya ni ka na'ab na yi na n gur on Wina'am nidib Israel dim.’ ” 7Ka Herod su'a buol baŋidib la n bu'osi ba saŋkan ka nwadibil la daa nie, 8ka yeli ba ye, “Kem Betilehem n ia su'uŋa, ka ya ya'a nye biig la, yanam leb na ka m baŋ, ka mam me na keŋ n pu'us o.” 9Ka ban wum na'ab la yel la, ka ba keŋ. Ka nwadibil kan ka ba daa nye ya nya'aŋ la, gaad ba tuon hale n paae zi'en biig la n be zin'isi'a la. 10Ban daa nye nwadibil la, ka ba sunya ma'ae. Ka ba maal sumalisim bedego. 11Ka ban kpen' yin la n nye biig la ne o ma Meeri, ba igin teŋin n pu'us o, ka yidig ba bunsuma la n tis o piini line a salima ne frankinsense ne mir. 12Ka Wina'am sa'ali ba zaansuŋ poogin ye ba da lem leb na'ab Herod sa'ane. Alazug ka ba luak n leb kul ba meŋ teŋin. 13Ka ban yi la, ka Zugsob malek nie o meŋ n pa'al Josef zaansuŋin n yel o ye, “Duom n zaŋ biig la ne o ma n zo n keŋ Egipiti teŋin n zin'i anina n ti paae saŋkan ka m na yel uf si'el, bozugo na'ab Herod na ti ied biig la ye o ku.” 14Ka Josef due yu'uŋ n zaŋ biig la ne o ma n keŋ Egipiti teŋin 15n zin'in anina hale ka Herod ti kpi. Lin na ke ka Zugsob la da yel ne o nodi'es noor si'em la niŋ ameŋa ye, “M buol m biribiŋi yi Egipiti teŋin la na.” 16Herod n daa baŋ ye baŋidib nwa zam o la, o sunf daa pelig hale. Ka o tum ye ba ku biribis bane be Betilehem ne teens bane kpi'e anina la, bane a yuma ayi bee bane pu paae ala wusa, wenne on bu'os baŋidib n baŋ saŋa la. 17Ka Wina'am nodi'es Jeremia da yel si'em la niŋ ameŋa ye, 18“Ba wum so' kukor Rama teŋin, ka o kaasid ka fabin. Li ane Rakel, n kaasid o biis la yela, ka pu siakid belisigo bozugo o biis kpi ne.” 19Ka na'ab Herod ku'um nya'aŋ la, ka Zugsob malek daa nie o meŋ n pa'al Josef zaansuŋin, Egipiti teŋin, n yel o ye, 20“Duom n zaŋ biig la ne o ma n leb Israel teŋin, bozugo bane da ied biig la ye ba ku o la, kpiya.” 21Ka o due n zaŋ biig la ne o ma n kul Israel teŋin. 22Ka Josef n daa wum ye Arkelaus n di o ba' Herod na'am Juuda ni la, o daa zotne dabiem ye o keŋ anina. Ka Josef zaansim nye ka li sa'al o. Ka o yi anina n keŋ Galilee so'olim 23ka keŋ zin'in Nazaret teŋin, wen wuu Wina'am nodi'esidib la da yel si'em la niŋ ameŋa, ye, “Ba na buol o ye o ane Nazaret teŋ nid.”

will be added

X\