MATEO 19

1Ka Yesu n pian' naae la, o yi Galilee n kpen' Juuda zin'isi'a line be Joodan mo'ar nya'aŋ. 2Ka nidib bedego dol o ka o ma'ae ban'adnam la wusa ban'as anina. 3Ka Farisee dim kenn o sa'an na ye ba kpansi o pian'adi gos, ka bu'os ye, “Ti wada puugine, suer be ye dau lebisi o po'a, yelsi'a yelaa?” 4Ka Yesu lebis ye, “Ya pu karem Wina'am gbauŋ laa? Pin'ilugin la Wina'am maal dau ne po'a, 5ka yel ye ne'eŋa yela ka dau basi o ba' ne o ma, ka on ne o po'a babayi la ta'al taaba a yinni. 6Ka ba leŋ ka' babayi ya'ase. Amaa ba yu'un liebne yinni. Ban ka Wina'am ta'al taaba la, so' da weligi baa.” 7Ka Farisee dim la bu'os o ye, “Ka wala ka Moses da sobi tis noor ye dau tun'e tis o po'a lebisug gbauŋ ka kad o?” 8Ka Yesu lebis ye, “Ya sukpi'euŋ la zug, ka Moses da tis noor ye ya tun'e lebisi ya po'ab. Amaa pin'ilugin sa la li da ka' alaa. 9Ka m yeti ya ye, so' ya'a lebis o po'a ka li ka' dian'ad tuuma yela, o ya'a toom di po'a ya'as, on sob tum ne po'a sa'uŋ.” 10Ka o nya'andolib la yel o ye, “Dau ne o po'a yela ya'a ane ala, li pu su'um ka dap di po'aba.” 11Ka o yeli ba ye, “Li ka' nidib wusa na nyaŋe di'e pian' kaŋaa, asee bane ka Wina'am tisi ba la. 12Ba du'a dap sieba ka ba daulim kae'. Ka nidib me fua dap sieba. Ka Wina'am yela sieba pu dit po'aba wenne ba fua ba meŋ ne. Ka one na nyaŋe di'e yelkaŋa, on di'em.” 13Ka ba mor biis kenn Yesu sa'an na ye o nok nu'ug n pa'al ba zutin ka pu'us Wina'am tisi ba. Ka o nya'andolib la kad nidib la. 14Ka Yesu yel ye, “Kel ka biis la kena ka da kadi baa. Wina'am so'olim ane bamanam taaba din.” 15Ka noke o nu'ug pa'ali ba zutin ka keŋ. 16Daar yinni ka dau kenn Yesu sa'an na, ka bu'os o ye, “Pa'ana, m na tum tuumsuŋ bo ka nye nyovur dine ka' naare?” 17Ka o lebis o ye, “Bo ka fu bu'osidi m one a su'um yela? Yinni ma'aa be, one a su'um. Fu ya'a bood ye fu nye nyovur, fun tumi o noyelug la yet si'em la.” 18Ka o bu'os ye, “Nooryelug bane sa'ane?” Ka Yesu lebis yel o ye, “Da ku nida, da sa'am po'a, da zuu, da dit ziri kaseta, 19na'asimi fu ba' ne fu ma ka noŋi fu tiraan wuu fu meŋ.” 20Ka dasaŋ la yel o ye, “Ne'enam wusa man niŋiya, ka bo lem kpelim?” 21Ka Yesu lebis o ye, “Fu ya'a bood ye fu zemis fun kem kuos fun mor si'el wusa tis noŋ dim. Ala ka fu na nye kpan'am arazana ni. Ka kena dol man.” 22Ka on wum ne'eŋa la ka o keŋ ne susa'aŋ, bozugo o da ane kpan'a. 23Ka Yesu yel o nya'andolib la ye, “Asida ka m yeti ya ye, li na toe tis arazak daan ne on na kpen' Wina'am so'olim la ni. 24M yeti ya ya'as ye, li na a na'ana ye yugum kpen' kparipiim voonrin n gat arazak daan na kpen' Wina'am so'olim la ni.” 25Ka o nya'andolib la n wum ne'e la ka li paki ba hale. Ka ba yet ye, “Ano'on yu'un na nye faangire.” 26Ka Yesu gosi ba ka yel ye, “Yel kane toe tis ninsaal la, li pu toe tis Wina'am.” 27Ka Piita lebis o ye, “Ti bas si'el wusa ka dol uf. Ka ti na nye bo?” 28Ka Yesu yeli ba ye, “Asida ka m yeti ya ye, dunia paal la ni, ka Ninsaal Biig ya'a zin'ini o na'am gbauŋ venliŋ la zug la, yanam bane doli m la me na zin'in na'am gbana piinayiiŋa la zug, ka kad Israel buudi piinayiiŋa la saria. 29Ka bane wusa basi ba ya, bee ba bieya, bee ba pitib, bee ba tanp, bee ba ba'anam, bee ba manam, bee ba biis, bee ba pood, mam yu'ur zug, ba na di'e ban bas si'el la, noor kobuga, ka lem nye nyovur line ka' naare. 30Ka bedego bane a tuon dim la na leb nya'aŋ, ka bane be nya'aŋ la na be tuon.”

will be added

X\