MATEO 18

1Saŋkan la, nya'andolib la da kenn Yesu sa'an na, yet ye, “Ano'one a kpeenm Wina'am so'olimin la?” 2Ka Yesu buol biigi zi'eli ba soogin na, 3ka yeli ba ye, “Asida ka m yeti ya ye, ya ya'a pu tiake ya sunya a wuu biis ne, ya ku kpen' Wina'am so'olimin naa. 4Ka one wusa siedi o meŋ wenne biig ne, o na a kpeenm Wina'am so'olimin la. 5“Ka one di'e bibil ka o wenne oŋa, man yu'ur zug, o di'e man.” 6“One ke ka bibibis bama yinni bane niŋi m yadda la tum tuumbe'ed, li aan su'um o sa'an ka ba deŋim nokin neertita'ar n lo kolo o niŋgoonr ka losin o mo'ar zuluŋin ka ku'om dii o.” 7Ka ye, “Dunia dima, ya na namis, yaname pan'as nidib ka ba tum tuumbe'ed la zug. Asee ka pan'asug be, amaa namisug na be n tis one ket ka pan'asug be la. 8“Fu nu'ug bee fu nobir ya'a ket ka fu tum tuumbe'ed, fun fi'igime li bas. Li a su'um ne fun na nye nyovur ka nu'ug bee nobir ko'og, n gaad fun na mor nu'us ne noba wusa ka kpen' bugum kane pu kpiisida. 9Fu nif ya'a ket ka fu tum tuumbe'ed, fun likimi li bas. Li a su'um ne fun na nye nyovur ka nif kae' n gaad fun na mor nini ayi ka ba lob uf bas bugum teŋ.” 10Ka Yesu yel ye, “Baŋimi ka da po'ogi bibama yinnii. M yeti ya ye ba maleknam bane be arazana ni la be m Ba' tuon saŋa mekama. 11(Ninsaal Biig la ken na la, ane ye o faaene bane bodig la.)” 12“Ya ten'esid bo? Ka so' naan more pe'es kobuga ka yinni bodige, o ku bas piiswai ne awai la zuer zugin ka ba onbid, ka o keŋ ia yinni laa? 13Ka o ya'a nye li, o sunf na ma'ae ne yinni la gaad piiswai ne awai bane pu bodig laa. 14Li ane ala n tis m Ba' one be arazana ni la. O pu bood ye biis la yinni bodige. 15“Fu ba'abiig one a yadda niŋid ya'a tum uf taal, kem yel o taali a si'em, fu ne on ma'aa. Ka o ya'a siaki fu noor o kpelim ane fu ba'abiig. 16Amaa o ya'a zan'as fu noor, fun dol nid yinni bee ayi pa'asi fu zug n keŋe o sa'an. Ka nidib ayi bee atan' na di kaset yel la maalug zug. 17Ka o ya'a pu siaki ba, fun yelimi li Wina'am nidib la'asugin. Ka o ya'a pu siak Wina'am nidib la sooginee, yanam basimin o wenne one pu dol Wina'am bee lampodi'es. 18“Li ane asida ka m yeti ya ye, lin ka ya lo dunia nwa ni la Wina'am me na lo. Ka lin ka ya idig la Wina'am me na idig. 19“M yeti ya ya'as ye nidib ayi ya'a naal noor ka sos m Ba' Wina'am si'el, o na maali li tisi ba. 20Ka nidib ayi bee atan' ya'a la'as man yu'ur zug, m na be ne ba.” 21Ka Piita kena n bu'os Yesu ye, “M Zugsoba, m ba'abiig na tum tuumbe'ed n po'ogi m, noor ala ka m na tis o suguru? Noor ayopoi bee?” 22Ka Yesu yel o ye, “M pu yel ye noor ayopoi ma'anee. Amaa m ye hale noor piisyopoi bu yopoi. 23“Dinzugo arazana so'olim wenne na'ab so' one bood ye o gelig o sama ne o tumtumnib. 24Ka one pin'il geligir la, ba mor nid yinni na, one di o sam ligidi yon tusa piiga. 25Ka on ku nyaŋ n yo laa, o zugsob tis noor ye ba kuosim o ne o po'a ne o biis ne o la'ad wusa n yo o sam la. 26“Ka o vabin o zugsob tuon n sos o ye, o dim o suguru, ka o na yo sam la wusa. 27Ka o zugsob la zo o nimbaanlig, ka bas sam la, ka ke ka o keŋ.” 28“Amaa tumtumkan n yi la, o tu'us o tumtum tiraan kane di o sam anzurifa ligidi kobug (li pu paae yolug yinnii,) ka gban' o n siank o kukor, ka yel o ye, ‘Yoom m sam la n tisi m.’ 29“Ka o tumtum tiraan la vanbin o tuon n sos o ye, ‘Dim suguru, ka m na yo fu sam la.’ 30“Ka o zan'as, ka zaŋ o kpen'es sarega ni ye, asee o yo o sam la. 31Ka o tumtum taaba la nye ala la, ka ba sunya sa'am hale. Ka ba keŋi ba zugsob sa'an n tu'as o line niŋ la wusa. 32“Ka o zugsob buol o n yel ye, ‘Tumtumbe'ed daana nwa, sam kan wusa ka fu di la, m kee li bas, fun sosim la zug. 33Li me pu su'um ye fun zo fu tiraan nimbaanlig, wuu man zo fun nimbaanlig si'em laa?’ 34Ka o zugsob la suunr pelig hale. Ka o ke ka ba zaŋ o n kpen'es sarega ni ye ba namis o ka yel ye, asee o yo sam la wusa. 35“Ala men ka m Ba' one be arazana ni la na niŋ ne ya, ya ya'a pu tisi ya ba'abiis suguru ne ya sunya wusa.”

will be added

X\