MATEO 17

1Ka daba ayuobu nya'aŋ la, ka Yesu zaŋ Piita ne Jemes ne Jemes ba'abiig Joon n du zuetita'ar zug. Ka ban gullim be anina. 2Ka o tiak ba tuon. Ka o nindaa niene nyain wuu nintaŋ ne. Ka o fuud pelig hale. 3Ka ba nye Moses ne Elija, ka ba kena n sonsid ne Yesu. 4Ka Piita yel Yesu ye, “M Zugsoba, li a su'um ye ti be kpela. Fu ya'a siak, m na ti' suga atan' n tis fun yinni, Moses yinni, Elija me yinni.” 5Ka on nam kpelim pian'ad la, ka saŋgbauŋ line nie nyain kena n ligili ba. Ka kukor yi saŋgbauŋ la ni n yel ye, “Oŋa ane m binoŋir, one paae m ya'am bedego. Kelisimi ne o pian'ad.” 6Ka o nya'andolib la n wum la, ka ba vabin teŋin ne dabietita'ar. 7Ka Yesu li'el n si'isi ba n yel ye, “Duomi, ka da zot dabiem.” 8Ka ba godig ba zut n gos, ka pu lem nye nidaa, asee Yesu gullim. 9Ka ban sigid zuer zug la na, Yesu sa'ali ba ye, “Mit ka ya yel nid bun kan ka ya nye la, hale ka Ninsaal Biig la ti vu'ug ka bas ku'um.” 10Ka o nya'andolib la bu'os o ye, “Wala ka gbauŋmi'idib yel ye, Elija na deŋi kena?” 11Ka o lebis yeli ba ye, “Li ane ameŋa ye Elija na deŋ kena, ka lebis si'el wusa li zin'igin. 12Amaa man yeti ya ne ye, Elija pun kena sa, ka ba pu baŋ on a so', ka niŋ o ban bood si'em la. Ala men ka Ninsaal Biig la na nye namisugi ba nu'usin.” 13Ka o nya'andolib la yu'uŋ baŋ ye o yeti ba ne Joon one suud nidib ku'om la yela. 14Ka ban paae nidib bedego la sa'an la ka dau so' kena igin Yesu tuon, 15ka yel ye, “M Zugsoba, zomi m biig nimbaanlig ka o lutne kpisiŋkpi'ir ka li namisid o hale. Ka li ya'a yiti due o, o lutne bugumin bee ku'omin. 16Dinzug ka m mor o na amaa fu nya'andolib la pu nyaŋe ti'eb oo.” 17Ka Yesu lebisi ba ye, “Zumaaŋ kaŋa nidib bane kae' yadda ka me ka'a yelmeŋir dim la. Saŋa wala ka ya bood ye m be ne ya? Saŋa wala ka ya bood ye m gbenn ne ya?” Ka o yel dau la ye, “Mor biig la na.” 18Ka Yesu kad kikirig la biig la ni, ka anina yim ka biig la nye laafe. 19Ka nya'andolib la keŋ Yesu sa'an baanlim na bu'os o ye, “Bo niŋ ka ti pu nyaŋe kad kikirig la yiise?” 20Ka o lebisi ba ye, “Ya yadda pu zu'e la zug. Li a sida ka m yeti ya ye ya ya'a niŋ Wina'am yadda hale ka li kudim pood bi'ela nwa wenne so'od biili ne, ya na tun'e yel zuer kaŋa ye, ‘Toom keŋ zin'isi'a sa,’ ka li na niŋ ala. Ka si'el kae' ka ya ku nyaŋe maali. 21Asee Wina'am sosug ne noloor ka ya na tun'e kad ne'enam buudi.” 22Ka nya'andolib la la'as taaba n kenn Galilee na, ka Yesu yeli ba ye, “Ba na ti gban'e Ninsaal Biig la n niŋ o nidib nu'usin 23ka ba ku o, ka daba atan' daar o na ti vu'ug ka bas ku'um.” Ka ba sunya sa'am bedego. 24Ka Yesu ne o nya'andolib la paae Kapeenum teŋin, ka Wina'am pu'usum yir lampodi'esidib bu'os Piita ye, “Ya pa'an la yood pu'usum yir lampo bee?” 25Ka o lebis ye, “O yood walla.” Ka Piita n kul yin la Yesu deŋin pian' o ye, “Simon, fu ten'esid ye bo? Ano'on sa'an ka dunia nwa na'anam di'esid ba lampo? Teŋin dimin bee bane a saam la ni?” 26Ka Piita ye, “Saam la ni.” Ka Yesu yel o ye, “Ala teŋin dim la ba'a kae'. 27Tiname pu bood ye ti ziemi ba la zug, kem los gu'a beuŋin la ka fun gban'e ziŋ si'a yiiga la, fun ya'ami o noor ka fu na nye anzurifa la'af line ka fu na yo man ne fu yela.”

will be added

X\