MATEO 16

1Ka Farisee dim ne Sadusii dim sieba kenn Yesu sa'an na n bood ye ba bend o, ka yet o ye o maal bunnyalima line sid yi arazana ni. 2Ka Yesu lebis ye, “Winig ya'a kpen'ed ya yet ye zin'ig la a nyain bozugo saŋgbana la a zen'ug la zug. 3Ka bekeeung ka ya yet ye saa na ni, bozugo saŋgbana la a zen'ug ka sobug la zug. Ya tun'e pa'al saŋgbana la a si'em, amaa ya ku nyaŋe baŋ zabina line pa'an saŋa la a si'em. 4Zumaaŋ kaŋa nidib bane a nimbe'ednam ne dian'ad tuuma dim ka pu dol Wina'am suer la, bood tuumnyalima amaa ba ku nyee asee Jona tuumnyalima zabin la.” Ka o basi ba ka toom. 5Ka nya'andolib la lo'oŋ beuŋ gbeug la sa, ka tam bodobodo morem. 6Ka Yesu yeli ba ye, “Gu'usimi ya meŋ ne Farisee dim ne Sadusii dim dabin la yela.” 7Ka nya'andolib la pian'ad ne taaba ye, “Tiname pu mor bodobodo na la zug ka o yel ala.” 8Ka Yesu baŋi li ka bu'osi ba ye, “Yanam bane yadda niŋir pood nwa, bo ka ya pian'ad yaname pu mor bodobodo la yela? Ya nam pu baŋ li gbin nee? 9Ya pu tenr bodobodo gbila anu la ka dap tusa anu daa di laa? Ka ya daa vaae dikane daa kpelim la n pe'el peeda ala? 10Bee bodobodo gbila ayopoi la ne dap tusa anaasi la? Peeda ala ka ya daa vaae dikane daa kpelim la? 11Ka bo ka ya pu baŋ ye m pu pian'adi ya bodobodo yela? Gu'usimi yanam ne Farisee ne Sadusii dim dabin la yela.” 12Ka ba naam baŋ ye o pu yeli bane ye ba gu'usimi ba meŋ ne dabin kane gendig bodobodo ni laa, amaa Farisee dim ne Sadusii dim pa'ala la. 13Ka Yesu paae Sizerea Filipi teŋin ka bu'os o nya'andolib la ye, “Nidib yet ye man one a Ninsaal Biig la a ano'one?” 14Ka ba lebis n yel ye, “Sieba ye, fu ane Joon, one da suud nidib ku'om la. Ka sieba ye Elija. Ka sieba ye, Jeremia, bee one a Wina'am nodi'es so'.” 15Ka o lebis n bu'osi ba ye, “Ka yanam on yet ye man a ano'one?” 16Ka Simon Piita lebis n yel o ye, “Fu ane Kiristo, Wina'am one voe la Biig.” 17Ka Yesu lebis n yel o ye, “Simon, Joon biig, yelsum be fu zug, bozugo li ka' ninsaal pa'al fu nwaa, amaa li ane m Ba' one be arazana ni la. 18M yet uf ye, fu ane Piita. Ka tampiing kaŋa ka m na zi'el m yadda dim la'asug. Ka ku'um ku mor paŋ ne baa. 19M na tis uf arazana so'olim saafibiis. Bun lin wusa ka fu na lo dunia nwa zug la, lin me na lo arazana ni. Ka bun lin wusa ka fu na idig dunia nwa zug la, lin me na idig arazana ni.” 20Ka Yesu sa'al o nya'andolib la ye, ba da yel so' ye, one a Kiristo laa. 21Saŋkan la ka Yesu pin'il n pa'an o nya'andolib la ye, “Li a tilas ye m keŋ Jerusalem n paam namisug bedego teŋin kpeenmnam ne Wina'am maalmaan kpeenmnam ne gbauŋmi'idib sa'an. Ka ba na ku m. Ka daba atan' daar ka m na vu'ug kumin.” 22Ka Piita buol o n yi kpeŋ n pin'il n sa'an o ye, “Wina'am na yiis uf yelkaŋa ni, ka li da niŋ uf alaa.” 23Ka Yesu fendig n yel Piita ye, “Lem m nya'aŋ, Sutaana nwa. Fu giŋid man ne. Fu ten'esug ane ninsaal poten'er ka ka' Wina'am din ne.” 24Ka Yesu yel o nya'andolib la ye, “Nid ya'a bood ye o dol man, asee ka o zan'as o meŋ boodim ka zaŋ o ku'um dapuudir n dol man. 25On wusa bood ye o sua' o nyovur la, o nyovur la na bodig. Amaa on wusa n bas o nyovur man zug la, o na nye o nyovur. 26Nid ya'a nye dunia nwa la'ad wusa, ka o meŋ nyovur la bodig, o nyood a bo? Bozugo si'el kae' dunia ni ka nid na zaŋ n tiak o nyovure. 27Ninsaal Biig la na ti kena ne o Ba' na'am line nyeen pil pil ne o maleknam, ka saŋkan la o na tis so' kam wusa yood line zemisi ba tuuma. 28Yelmeŋir ka m yeli ya ye, ninsieba zi'e kpela ka ku kpii, ka na nye Ninsaal Biig la n kenna ne o na'am.”

will be added

X\