MATEO 15

1Ka Farisee dim sieba ne gbauŋmi'idib la yi Jerusalem n kena bu'os Yesu ye, 2“Bo ke ka fu nya'andolib la zan'as ti yaanam malima la? Ba pu piesidi ba nu'us su'uŋa ka nan dita.” 3Ka o lebisi bu'osi ba ye, “Bo ke ka ya zan'as Wina'am noyelug la ka doli ya meŋ malima? 4Wina'am noyelug la ye, ‘Na'asimi fu ba' ne fu ma.’ Ka lem yel ye, ‘Nid ya'a po'ogi o ba' bee o ma, o su'um ye ba kuu o.’ 5Amaa yanam lee pa'an ye, so' ya'a mor si'el ka na suŋ o ba' bee o ma, ka yele ba ye bun la ane Wina'am din, li pu mugus ye o noki li n tis o ba' laa. 6Lina ke ka ya zan'as Wina'am noyelug ka doli ya meŋ malima. 7Yanam zam dima, Azaya da mor sida on da di'e Wina'am noyelug tisi ya ka li yel ye, 8‘Nimbama nwa na'asid mam Wina'am ne ba pian'ad, amaa ba sunya lalli mam hale. 9Ka ba na'asi la ane zaalim tis mam, bozugo ba pa'an ne ninsaalib noyelug wenne li ane mam Wina'am pa'alug ne.’ ” 10Ka Yesu buol nidib ka yeli ba ye, “Kelisimi ka baŋi li gbin. 11Ka'a line kpen'ed ninsaal noorin la ket ka o a dian'ade, amaa line yit ninsaal noorin la ket ka o a dian'ad daan.” 12Ka o nya'andolib la bu'os o ye, “Fu mi' ye Farisee dim la sunya peligne ne fun yel si'em laa?” 13Ka Yesu lebis ye, “Bunbutir mekama wusa ka m Ba' one be arazana ni la pu bud la, ba na voonn li bas. 14Keli ba sa. Ba wenne zunzoŋ naani ve'ed zunzoŋ ne. Ka zunzoŋ ya'a ti ve'ed zunzoŋ asee ka ba wusa lu bumbokin.” 15Ka Piita yel o ye, “Pa'alimi ti siiliŋ kaŋa gbin a si'em.” 16Ka o bu'osi ba ye, “Yanam pu tun'e baŋida? 17Ya pu baŋ ye line ka so' dit la sigidne poorin ka lem yit o niŋgbina nii? 18Amaa line yit ninsaal noorin la yit ne o suunrin ka ne'eŋa ket ka o a dian'ad daan. 19Ka poten'er be'ed yitne suunrin na. Line ket ka o a ninkuud, ka sa'amid po'ab, ka tum dian'ad tuuma, ka faand nidib, ka ma'ad dama'am, ne yu'ur sa'aŋ. 20Ne'eŋa a dian'ad nidibin ka ka'ane a dit ka pu pied nu'usi a dian'ade.” 21Ka Yesu toomi anina n keŋ teens bane kpi'e Taya ne Sidon la. 22Ka Keinan dim po'a yi teŋ ban na n kenn o sa'an na sos o ye, “David yaaŋa, zomi m nimbaanlig, ka m po'ayu'a ka kikirig dol o ka li namisid o hale.” 23Ka Yesu sin. Ka o nya'andolib la sos o ye, “Kadim po'a la ka o keŋ sa; ka o maan tukpeedug.” 24Ka o yeli ba ye, “Wina'am tum man ne Israel dim sa'an gullim, bane wenne konbid bane bodig la.” 25Ka po'a la kena igin o tuon ka yel ye, “Zugsoba suŋimi m.” 26Ka o lebis ye, “Li pu nar ye so' zaŋ biis diibi lobi tis baase.” 27Ka po'a la lebis ye, “Zugsoba, li a sida. Ka baa daan ya'a dit ka dizora lut teŋin, baas la na pi'isi li.” 28Ka o lebis ye, “Po'aa, fu mor yadda niŋir bedego. Ka fun bood si'el la, li na a ala n tis uf.” Ka anina yim ka o po'ayu'a la nye laafe. 29Ka Yesu yi anina den'ed Galilee beuŋ la noorin, ka keŋ du zuer zug zin'in anina. 30Ka nidib bedego kenn o sa'an na, n mor wabis, ne zunzoos, ne ponda, ne gigis, ne wiim sieba bedego kena digili ba o tuon. Ka o ti'ebi ba. 31Ka li lidig nidib la, ban nye ka gigis pian'ad, ka ponda tiake a su'uŋa, ka wabis ken, ka zunzoos nyet, ka ba na'asid Wina'am on ka Israel dim pu'usid la. 32Ka Yesu buol o nya'andolib la, ka yele ba ye, “M zot nidib nwa nimbaanlig bozugo li paae daba atan' ka ba be m sa'an ka me pu mor diib na dii. Ka m pu bood ye m basi ba ka ba kul ne ko'om. Li ya'a ka' ala ba na ti vip sueren.” 33Ka o nya'andolib la bu'os o ye, “Ka ti ye ti nye diib yaani moogin nwa diis nidib bedego bama nwa?” 34Ka Yesu bu'osi ba ye, “Ya mor bodobodo gbila ala?” Ka ba lebis ye, “Ayopoi ne zimbibis bi'ela.” 35Ka Yesu yel nidib la ye ba zin'inim teŋin. 36Ka o zaŋ bodobodo gbila ayopoi la ne zimi la, ka pu'us Wina'am, ka gben'es diib la n tis o nya'andolib la. Ka ba zaŋi pudug tis nidib la. 37Ka ba wusa dii tig. Ka ba vaae dikane kpelim la la'as ka li pe'el peed ayopoi. 38Ka bane di diib la kal a tusa anaasi, hale ka po'ab ne biis kal pu pa'ase. 39Ka o bas nidib la, ka kpen' aaruŋin keŋ Magadan teŋin.

will be added

X\