MATEO 13

1Ka daakan ya'as ka Yesu yi yin la keŋe zin'in beuŋ gbeug. 2Ka nidib bedego la'as o sa'an na, ka o kpen' aaruŋin, ka nidib be beuŋ gbeug. 3Ka o yeli ba yela bedego ne siilis n yet ye, “Dau da be n keŋ ye o waal o bunbuuda. 4Ka on waan la, bunbuud sieba lu suer zug. Ka niis kena n di. 5Ka sieba lu zin'ikan ka tan pu zu'e ka a tampiins zut. Ka tani pu zu'e la zug ka li bul to'oto. 6Ka nintaŋi tulug la, ka ba zianki nwiilim, lin ka'a nya'a la zug. 7Ka sieba lu gon'os soogin, ka gon'os la nobugi sianki ba. 8Amaa sieba lu ko'olum zin'ig, ka wel bielim. Sieba wel kobuga. Ka sieba wel piisyuobu. Ka sieba me wel piistan'. 9One mor toba on wum.” 10Ka o nya'andolib kena bu'os o ye, “Bo ka fu pian'ad ne siilis tisidi ba?” 11Ka o lebisi ba ye, “Yanam di'e Wina'am so'olim yelsua'ada. Amaa ban pu di'ee. 12One mor na di'e pa'as ka li a bedego. Ka one pu mor la, hale ba na di'e on mor si'el la. 13Dinzug ka m pian'adi tisidi ba ne siilis, bozugo ba gosidne ka pu nyeti lii, ka me wum ka pu baŋidi li gbin ne. 14Sobkan ka Azaya da sob la niŋ sida ba ni ye, ‘Ya na wum ka ku baŋi li gbin ne, ka na gosid ka ku nyeti lii. 15Ba sunya digilimne, ka ba li' ba toba ka pu wum na, ka umi ba nini ka pu nyeta. Li ya'a ka' alaa, ba na nye ne ba nini, ka wum ne ba toba, ka baŋi li gbin ne ba sunya, ka tiake lebe m sa'an na ka m ti'ebi ba.’ ” 16Ka Yesu ye, “Amaa yelsum be ya ni, yaname mor nini ka li nyet, ka mor toba ka li wum la. 17Yelsida ka m yeti ya ye, Wina'am nodi'esidib ne popielim dim bedego bood hale ye ba nye yaname nye si'el la, ka pu nyee lii, ka bood ye ba wum yaname nye si'el la, ka pu wum.” 18“Dinzug, kelisimi one waal bunbuuda la siiliŋ la gbin. 19So' ya'a wum Wina'am labaar la ka pu baŋi li gbin ne, o wenne bunbuuda bane lu sueren la. Ka Sutaana one a tuumbe'ed daana la kena n yiis line kpen' o suunrin la. 20Ka bane lu tampiins zug la wenne one wum labaar la ka di'e li aniŋa niŋa ne sumalisim. 21Ka line ka'a nya'a la zug, li pu yuuge ka kpi. O ya'a di fara bee namis Wina'am labaar yela o nyorigidne n bas. 22Ka bane lu gon'os soogin nwa ane bane wum labaar la, ka dunia poten'er daami ba, ka araza'as boob yela siank labaar la ka li pu wele. 23Ka bane lu ko'olum zin'ig la ane one wum labaar la ka baŋi li gbin. Ka sid welne wela wuu kobuga bee piisyuobu bee piistan'.” 24Ka Yesu lem siilim ba siiliŋ yinni ya'as ye, “Wina'am so'olim wenne dau kane budi o ki poogin. 25Ka yu'uŋ sob ka nidib be gbeemin ka dataa me zaŋ natis keŋ n budi gendig kiin la. 26Ka ki la yi na nobugi siak pidigir. Ka natis la me nobug ka ba nye ka li ka' kii. 27“Ka tumtumnib la kenn yidaan la sa'an na n bu'os o ye, ‘Zugsoba, fu daa pu bud kisuma poogin laa? Ka bo ka natis gendig bedego?’ 28“Ka o yel ye, ‘Li ane dataa la niŋe li.’ “Ka tumtumnib la bu'osi ye, ‘Fu bood ye ti keŋ vonn natis la bee?’ 29“Ka o yeli ba ye, ‘Ayei, ya ya'a niŋ ala ya na la'am vonn ne ki. 30Kel ka li wusa bi'ig n ti paae bunib saŋa, ka m yel m bunib la, ka ba vonn natis la yiiga n bobigi ba n nyu'e bugum. Ka lee bun ki la n su buorin.’ ” 31Ka Yesu yeli ba siiliŋ yinni ya'as ye, “Wina'am so'olim la wenne zensi'a, line yu'ur buon ye mustard bielim, ka dau so' budi o poogin. 32Bielim la pood gat bielim wusa amaa li ya'a bud li nobugid n gat tituud bane be wusa, ka lieb wenne tiig ne ka niis kena maali ba teed li wila ni.” 33Ka o yeli ba siiliŋ yinni ya'as ye, “Wina'am so'olim la wenne dabin ne, ka po'a noki li gendig bodobodo ni, ka li ke ka li nob.” 34Ne'eŋa wusa ka Yesu pian'ad nidib la ne siilis, hale o pu yeli ba pian'asi'a ka li ya'a ka'ane siiliŋa. 35Ne'eŋa ane ye li niŋ sida Wina'am nodi'es la da sob si'el la ye, “M na siilim ne siilis, ka na pa'al yelsua'ada bane sua'ad dunia pin'ilug saŋa la n ti paae nannanna nwa la.” 36Ka Yesu bas nidib la ka kpen' yin. Ka o nya'andolib kena yel o ye “Pa'alimi ti poog la natis la gbin ne a si'em.” 37Ka o yeli ba ye, “One waal bunbuud soma la ane Ninsaal Biig la. 38Ka poog la a dunia, ka bunbuud soma la gbin ane Wina'am so'olim nidib. Ka natis la a Sutaana nidib. 39Ka dataa one but natisi gendig la, a Sutaana. Ka bunib saŋa la a dunia naar. Ka bunib la a Wina'am maleknam. 40“Ka ban la'as natis la los bugumin si'em la, ala men ka li na niŋ dunia naar la. 41Ninsaal Biig la na tumi o maleknam ka ba la'as bane pan'asid nidib, ne tuumbe'ed dim wusa bane be Wina'am so'olimin la 42ka yiisi ba lob bugum zin'igin. Ka ba na kum ka ga'adi ba nyina. 43Ka nidib bane a ninsuma na nie ba Ba' Wina'am so'olimin wenne winig nied si'em la. Dinzugo one mor toba, on wum.” 44Ka Yesu ye, “Wina'am so'olim la wenne araza'as bane sua' teŋin. Ka dau so' nye li ka lem lebisi ligili li ya'as. Ka o sunf ma'ae hale ka o kuli kuos on mor si'el wusa lebi n da' poog la.” 45Ka lem ye, “Wina'am so'olim wenne kukpinkpine one ied kugvenla ban ka ba buon peel la, ka li ligidi zu'e hale. 46Ka on nye peel yinni ka li ligidi zu'e bedego la, o keŋ kuos on mor si'el wusa lebi da'a li.” 47Ka Yesu ye “Wina'am so'olim la lem wenne lauŋ kane ka ba lob mo'arin ka li gban'e zimi buudi wusa. 48Ka li pe'el lauŋ la. Ka ba teegi li du'os guur ka gaans bunsuma la n su ba gona ni, ka lob bunbe'ednam la bas. 49Li me na a ala dunia naar saŋa. Wina'am maleknam na kena n gaans nimbe'ednam la ninsuma soogin, 50ka lobi ba bas bugum zin'igin, ka ba na kum ka ga'ad nyina.” 51Ka Yesu bu'osi ba ye, “Ya baŋ ne'enam gbin ne?” Ka ba lebis o ye, “Eenn.” 52Ka o yeli ba ye, “One a gbauŋmi'id Wina'am gbauŋ kudigin la ka yu'un zamis bam Wina'am gbauŋ paalig la Wina'am so'olim la yela, wenne yidaan one yiisidi o bunsuma bane a bunkuda ne bunpaala ne.” 53Ka Yesu n siilim siilis la naae la ka o 54kuli o teŋin ka pa'ali ba, ba la'asug doodin. Ka li lidigi ba, ka ba yel ye, “Ka oŋa nye ya'am kaŋa ne tuumnyalima nwa yaani? 55O ka'ane dakpi'ed biiga? Ka li ka'ane o ma ka ba buon Meeri laa? Ka li ka'ane o pitib a Jemes ne Josef ne Simon ne Judas laa? 56Ka ka'ane o tanpi nwa zi'e ne ti laa? Ka yaani ka dau kaŋa nye ne'enama?” 57Ka ba zan'as o. Amaa Yesu yeli ba ye, “Ba na'asid nodi'es zin'ig wusa, asee o meŋ teŋin ne o yidimin ka ba ku na'as oo.” 58Ban pu niŋ o yadda la zug, ka o pu tum tuumnyalima bedego anina.

will be added

X\