MATEO 12

1Saŋkan la ka Yesu daa buŋ ki poodin Jew dim vu'usum daar, ka o nya'andolib ko'om zabid ka ba gis ki la nweem onbid. 2Ka Farisee dimi n nye la ka ba yel Yesu ye, “Gosima, fu nya'andolib la sa'amidne wada la suer, ban niŋid si'em vu'usum daar la.” 3Ka Yesu lebis ye, “Ya pu karem lin ka David da niŋ saŋkan ka on ne bane dol o ko'om daa zabid laa? 4O daa kpen' Wina'am pu'usum yin n di bodobodo kan ka ba maal maan tis Wina'am la, line pu nar ye ba di, asee bane a Wina'am maalmaanib la gullim. 5Bee ya pu karem Moses wada gbauŋin la ye Wina'am maalmaan sa'am vu'usum daar wada la, ba maalmaan tuuma ni, ka taal kae'? 6Man yeti ya ne ye so' be kpela n gat Wina'am pu'usum yir la, 7Ya ya'a baŋin sob kaŋa nwa gbin, ye Wina'am bood nimbaanlzoor n gaad maana la, ya naan ku yelin ye taal be, bane pu mor taale la zugo. 8Bozugo Ninsaal Biig la, one a vu'usum daar la Zugsob.” 9Ka Yesu keŋ kpen'e ba la'as doogin. 10Ka dau so' be anina ka o nu'ug kpi. Ka dap be anina n bood ye ba yel ye Yesu tum taal, ka bu'os o ye, “Li dol wada suer ye so' ti'ebim nidib vu'usum daare?” 11Ka Yesu lebis ye, “Ya so' ya'a more o pe'og ka li lu bumbokin Wina'am vu'usum daar, o ku yiisi o? 12Amaa ninsaal mor nyood bedego gaad peog. Dinzugo li dol wada suer ka so' tum line a su'um vu'usum daar.” 13Ka Yesu yel dau la ye, “Tienmi fu nu'ug la.” Ka o tienn. Ka o nu'ug la niŋ su'uŋa wuu nu'ug kaŋa la men. 14Ka Farisee dim la yi yiŋ ye ba gban'e noor yinni ka ku Yesu. 15Ka Yesu baŋi li ka toom zin'ig. Ka nidib bedego dol o. Ka o ti'ebi ba wusa. 16Ka o yeli ba ye ba da ke ka so' baŋi li yela. 17Ne'eŋa niŋ ala ye Wina'am nodi'es Azaya da pian' si'el la niŋ sida ye, Wina'am yel ye, 18“Gosim, man tumtum, one ka m gaŋ o ka noŋ o. O yela ma'edi m suunr bedego. Ka m na ke ka m Siig Suŋ be o ni, ka o na mool mam yelsida n tis buudi wusa. 19O ku mor noŋgban kpi'euŋ bee tansida. Ka so' ku wum o kukotita'ar paalo nii. 20Dibir line ko'og ka pu naae, o ku ko'ogi li naae. Ka lauŋ kane pu dit su'uŋa, o ku kpiisi lii. O na niŋ ala n ti paae saŋkan ka yelsida na nyaŋ si'el wusa. 21Ka buudi wusa na mor ti'ir o yu'urin.” 22Ka nidib mor nid yinni, one a zunzoŋ, ka lem a gik, ka kikiris dol o la, n kenn Yesu sa'an na. Ka o tis o laafe hale ka one a gik la pian'ad ka nyet. 23Ka li lidig nidib bedego la wusa, ka ba bu'os ye, “Dau nwa ka'ane na'ab David yaaŋaa?” 24Ka Farisee dim wum ala, ka yel ye, “Beelzebul one a kikiris na'ab la n tis dau kaŋa paŋ ka o kad kikiris.” 25Ka Yesu baŋ ban ten'esid si'el la, ka yeli ba ye, “So'olimkan wusa ka weligir be li ni la na sa'am. Ka teŋkan wusa bee yikan wusa ka weligir be, li ku zi'ene. 26Sutaana ya'a kad Sutaana, o weligidne o meŋ. Dinzugo o so'olim na niŋ wala zi'ene? 27Man ya'a kad kikiris ne Beelzebul paŋa, ano'on paŋ ka yanam biis na kad kikirise? Alazug ban na a ya antu'a tu'ad. 28Amaa li ya'a ane Wina'am Siig Suŋ paŋ ka mam kad kikiris la, Wina'am so'olim kenn ya sa'an na. 29“So' na niŋ wala kpen' paŋ sob yin n vaae o la'ad, ya'a ka' ye o deŋi lo paŋ sob la, ka naan yu'un vaae la'ad la? 30“One pu be man sa'anee, o zan'asidne man. Ka one pu la'ased ne manee, o widigidne. 31Alazugo m yeti ya ne ye, pian'abe'ed wusa ne tuumbe'edkan wusa ka nidib niŋ la, ba na nye suguru. Amaa one pian'ad Wina'am Siig Suŋ la be'ed wusa, o ku nye suguru. 32Nidkan wusa pian'ad Ninsaal Biig la pian'abe'ed, on na tun'e nye suguru. Amaa nid kane pian'ad Wina'am Siig Suŋ la be'ed, o ku nye suguru dunia nwa saŋa, bee saŋa kane kenna laa. 33“Asee ka tiig a su'um ka li wela me a su'um. Tiig ya'a a tibe'ed li wela me ane welbe'ednam. Tiig wela bigisid lin a tisi'a. 34Ya ane wiigi biise! Ya na niŋ wala ten'esid be'ed ka pian'ad sida? Line be ya suunrin la, lin ka ya pian'ad. 35Ninsuŋ yiisidne bunsuma ban ka o sua' o suunrin na. 36M yeti ya ye, hale pian'a yaalis wusa ka ya pian' la, ba na bu'osi ya ya'as saria kadib daar. 37Ya meŋi pian'ad si'el nannanna la na yiisi ya. Ka ya meŋi pian'ad si'el nannanna la me na kpen'esi ya yelin.” 38Ka gbauŋmi'idib ne Farisee dim yel Yesu ye, “Pa'ana, ti bood ye fu tum tuumnyalima ka ti gos.” 39Ka o lebisi ba ye, “Yanam bane a tuumbe'ed dim ne bane pu niŋe m yadda bood ye ya nye tuumnyalima. Ya ku nye tuumnyalima asee Wina'am nodi'es Jona tuumnyalima la. 40Wenne Jona da be ziŋ tita'ar poogin daba atan', yu'uŋ ne nintaŋ la, ala men ka Ninsaal Biig la na be yaugin daba atan' yu'uŋ ne nintaŋ. 41Nineve dim na ti du'e zi'en saria kadib daar, ka li a kaset be'ed zumaaŋ kaŋa dim zug. Bozugo ba daa wum ka Jona moon Wina'am labaar la ka ba tiake ba sunya. Amaa so' be kpela gat Jona. 42Ka po'ana'ab one da yi teŋ lalle la me na du'e zi'en saria kadib daar, ka li a kaset be'ed zumaaŋ kaŋa dim zug. Bozugo o daa yine teŋ kane lal na ye o wum na'ab Solomon ya'am pian'ad. Amaa so' be kpela gat na'ab Solomon.” 43Ka Yesu ye, “Kikirig ya'a yi nid sa'an o ken ne pipirigin, n ied zin'ig ye o be. Ka o ya'a pu nye lii, 44o na yele o meŋ ye, ‘M na leb ne yikan ka m daa yi ka bas la ni.’ Ka o ya'a leb ka nye ka si'el si'el kae', ka li piis nyain zi'e, 45o na yi lem mor kikiris ayopoi bane tuumbe'ed gat o na. Ka ba wusa kpen'e be anina. Ka nid la fara yu'un na gaad yiiga la. Li na niŋe ala n tis zumaaŋ kaŋa nwa dim.” 46Yesu n da nam kpelim pian'ad ne nidib la, ka o ma ne o pitib paae na, ka be kukpeŋi n bood ye ba pian' ne o. 47Ka nid yinni yel o ye, “Gosima, fu ma ne fu pitib be kukpeŋ bood ye ba nyee uf.” 48Ka Yesu lebis o ye, “Ano'one a m ma? Ka ano'onami a m pitiba?” 49Ka o tiesi o nu'ugo pa'ani o nya'andolib la ka yel ye, “Gosima, bama nwa a m ma ne m pitib. 50One tum m Ba' one be arazana ni la boodim, one a m pitu ne m taunn ne m ma.”

will be added

X\