MATEO 11

1Ka Yesu n pa'ali o nya'andolib piinayiŋa la naae la, ka o yi zin'ikan keŋ teens bane kpi'e la n moon Wina'am labaar ka pa'an nidib la. 2Ka Joon n da be sarega ni la ka wum Kiristo tuuma labaar, ka tum o nya'andolib Yesu sa'an, 3ye ba bu'os ye, “Fune a one na kenna la bee ti gur so' nya'aŋa?” 4Ka Yesu lebis ye, “Kem yeli Joon yanam wum ka nye si'el. 5Zunzoos nyet ka ponda ken ka kukoma nye laafe, ka tobkpidanam wum ka bane kpi vu'ug, ka ba moon labasuŋ n tisid noŋdim. 6Yelsum be ne one pu bi'esid ne mam.” 7Ka ban n keŋ la ka Yesu pian'adi pa'an nidib la Joon yela ye, “Bo bun ka ya daa keŋ moogin ye ya gose? Ya daa keŋ ye ya gos mood ban ka sisi'em mi'imi ba la bee? 8Ka bo yela ka ya keŋe? Ya keŋ ye ya nye dau kane ye fusuma la bee? Ten'esimi, bane ye fusuma la be na'anam yaan. 9Ka bo yela ka ya keŋe? Ya keŋ ye ya gos Wina'am nodi'es la bee? M yeti ya ye, eenn, asida. On ka ya keŋ gos la gaad Wina'am nodi'es si'a. 10Dau kaŋa a one yela ka li da sob la ye, ‘Gosimi m tumi m tumtum fu tuon na, ka o na maali fu suer nyain.’ ” 11Ka Yesu yel ye, “So' kae' ka ba du'a o ka o gaad Joon ne. Amaa one a kpaanr Wina'am so'olim ni la gaad Joon.” 12Joon labaar moolug saŋa la n ti paae nannanna nwa la, nidib daa mugusidi ba meŋ ye ba paam Wina'am so'olim la kpen'. Ka zigid ye ba keŋ tuone kpen'. 13Wina'am nodi'esidib wusa ne wada kan ka Moses da tis la sobne so'olim la yela hale ka Joon nan kae'. 14Ya ya'a bood ye ya baŋi li gbin, Joon ane Elija one na kenna la. 15One mor toba, n bood ye o wum, on baŋin li gbin su'uŋa. 16“Bo ka m na zaŋi n mak ka li wen wuu zumaaŋ kaŋa nidiba? Ba wenne biise zin'i da'ani buoni ba taaba ye, 17‘Ti piebid wiis ka ya pu wa'ada, ka kaasid kuur ka ya pu fabin na.’ 18Ka Joon kena lood noor ka pu nuud daam ka ba yel ye, ‘Kikirise dol o.’ 19Ka Ninsaal Biig la kena dit ka nuud ka ba yel ye, ‘O ane diis ne danuud, ka o zuanam ane lampodi'esidib ne ninyood.’ Ya'am sob tuuma pa'an ye o mor ya'am.” 20Ka o zerigi teens bane ka o tum tuumnyalima bedego ka ba pu tiake ba tuumbe'ed la. Ka yel ye, 21“Korazin dima, yel to'og be ya zug. Besaida dima, yel to'og be za zug men. Bozugo tuumnyalima line tumi ya sa'an nwa ya'a da tumin ne Taya ne Sidon teensin ba naan tiakin ka yee boto fuud ka bug tampeligim line pa'al ye ba tiakeya. 22Ala zug ka m yeti ya ye, Wina'am saria kadib daar la, li na toe tisi ya n gaad Taya ne Sidon dim. 23Ne yanam Kapeenum dima, ya bood ye ya du'osi ya meŋ arazana nii? Ya na sig ku'um zin'igin. Tuumnyalima line ka m tum ya sa'an nwa ya'a da tumin Sodom teŋin li naan kpelim been zinkaŋa nwa. 24Ka m yeti ya ye Wina'am saria kadib daar la, li na toe n tisi ya n gaad Sodom dim.” 25Saŋkan la Yesu yel Wina'am ye, “M Ba' one a arazana ne dunia Zugsoba, m pu'us uf ne fun sua'ad yela nwa ka ya'am dim ne baŋidib ku baŋi li gbin la, amaa fu ke ka biis baŋi li. 26Eenn m Ba', li ane fu meŋ ya'amboodim.” 27Ka Yesu yel nidib la ye, “M Ba' pun tisi m si'el wusa. So' zi' Biig laa, asee Ba' la. Ka so' me zi' Ba' laa, asee Biig la ne ban ka Biig la bood ye o nie pa'ali ba o Ba' la. 28“Kemi mam sa'an na, yanam ban wusa ze zetebisa genn la, ka mam na tisi ya vu'usum. 29Zaŋimi m yokisin daug la n pa'al ya niŋgoya zug ka zamis mam sa'an. Ala ka ya na nye vu'usum, bozugo m ane sumbugusum daana. 30M yokisin daug la fakne ka m ziid la pu tebisa.”

will be added

X\