1 Ka Yesu buol o nya'andolib piinayiŋa la la'as taaba ka tisi ba paŋ ye ba kad kikiris, ka ma'ae ban'as ne wiim buudi wusa. 2 O Tumtumnib piinayiŋa la yuda nwa. Yiiga sob ane Simon, on ka ba buon ye Piita la, ne o pitu Andrew, ne Zebedee biis Jemes, ne Joon, 3 ne Filip ne Bartolomew, ne Tomas, ne Mateo, on a lampodi'es la, ne Jemes, Alfeus biig, ne Tadus, 4 ne Simon, o ane nidib bane bood ye Jew dim zabi ba teŋgbauŋ yolisim zug la yinni, ne Judas Iskariot, one na zam Yesu la. 5 Piinayi kaŋa nwa ka Yesu da tumi ba ka yeli ba ye, “Da keŋ buudi kan ka'a Jew dim la sa'anee, ka da kpen' Samaria dim teŋinee. 6 Amaa kemi Israel dim sa'an bane wenne pe'ebane bodig la. 7 Ya ya'a ken, yanam moolim ye, ‘Wina'am so'olim la li'el ne.’ 8 Ka ma'ae ban'adnam, ka vu'ug bane kpi, ka maal kukoma ka ba nye laafe, ka kad kikiris. Ya di'edne ka pu yooda, dinzugo tisimi ka da di'e yoode. 9 Da zaŋ salima ligidi bee anzurifa ligidi bee koba ya buorisnee. 10 Da zanl kolug sueren bee banaas ayi bee ta'ada bee duore. Li nar ka one tum tuuma la me di. 11 “Ya ya'a kpen' teŋsi'a yanam iem ninsuŋ yire sig ka kpelim anina n ti paae ya yiib saŋa. 12 Ya ya'a kpen' yin la, yanam pu'usimi ba. 13 Ka ba ya'a di'e ya, yanam ke ka ya sumalisim sigi ba ni. Amaa ba ya'a zan'asi ya, yanam ke ka ya sumalisim kpelimi ya sa'an. 14 Ka yikan bee teŋkane pu di'e yaa bee kelisidi ya pian'ade yanam kpa'asimi ya noba titan ka yi. 15 Asida sida ka m yeti ya ye saria kadib daar la, teŋkan dim na nye toog n gaad Sodom ne Gomorra nidib.” 16 Ka Yesu lem yel ye, “M tumi ya wenne pe'esi na be kunduna soogin. Ala zugo more ya'am wuu wiigi ne, ka a su'uŋa wenne na'adawana ne. 17 “Gu'usimini ya meŋ ne nidib. Ba na ti gban'e ya more keŋ koto ni, ka bu'u ya ba la'asug doodin. 18 Mam zug ba na gban'e ya keŋ kpeenmnam ne na'anam tuon. Ka ya na tu'asi mam labasuŋ la tisi ba, ne buudi kane ka' Jew dim la. 19 Ka ba ya'a more ya na, da ke ka li paki ya, yaname na yel si'ela bee yaname na pian' si'ela. Bozugo Wina'am Siig Suŋ na tisi ya yanam na pian' si'el saŋkan. 20 Pian'abane ka ya ye ya pian'a la, ka'a ya dinne. Li ane ya Ba' Wina'am Siig Suŋ one be ya ni la pian'ad. 21 “Ba'abiig na gbi'i o ba'abiig n ke ka ba kuu o. Ka saamnam me na niŋ ala ne ba biis. Ka biis me na gbi'i ba du'adib n ke ka ba kuu ba. 22 Ka nidib bedego na kisigi ya, man yu'ur la zug. Ka one modig ka doli m n ti paae si'el mekama wusa naar saŋa, o na nye faangir. 23 Ba ya'a namisi ya teŋ si'a, yanam zo toom teŋ. Mam yeti ya ne ye, ya ku nyaŋe naae ya tuuma la Israel teensin ka Ninsaal Biig la nyaan kenaa. 24 “Nya'andol pu gati o tuon soba. Ka samkpan'as me pu gati o zugsoba. 25 Li su'um ka nya'andol wen wuu o tuon sob ne, ka samkpan'as wenne o zugsob ne. Ka ba ya'a tu' yidaan ye o a Beelzebul, ba na tu' yidim la ka li gaadi ala. 26 “Da zoti nidib dabiem. Si'el kae' ka ba ligili li ka li ku lake. Ka line sua' wusa na nie paalo. 27 Man yeti ya si'el likin nwa, asee ka ya nie li nintaŋin. Ka mane nya'am si'el ya toba ni nwa, moolimi li dood zug ka so' wusa wum. 28 Da zoti dabiem ne bane kuud niŋgbina, ka ku nyaŋe ke ka siig la kpi laa. Amaa zomi Wina'am one na nyaŋe sa'am niŋgbina ne siig wusa bugum teŋin. 29 Ba pu kuosid niimbibisa ayi kobire? Amaa baa yinni ku lu teŋin n kpii, asee ka ya Ba' Wina'am siaki li. 30 Hale zuobid line be ya zutin la, Wina'am mi'i li kal. 31 Dinzugo, da zoti dabiem. Ya mor nyood gaad niimbibis bedego. 32 “On mekama siak mam nidibin ye o doli man, m me na siak o m Ba' Wina'am tuon arazana ni. 33 Ka on mekama ki'is mam nidibin ye o ku doli ma, m me na ki'is o m Ba' Wina'am tuon arazana ni.” 34 “Da ten'es ye mam kena ye m mor sumalisim dunia ni naa. Ka' alaa. Li ane zabir ka man more kena. 35 M ken la zug ane ye, ‘biribis zab ne ba saamnam, ka bipumis zab ne ba manam, ka bipo'ab me zab ne ba sidib manam. 36 Ka nid bi'emnam na aa o meŋ yidim.’ 37 “Ka on mekama noŋ o saam bee o ma gati m, o pu nar ne o na doli ma. Ka one mekama noŋ o biribiŋ bee o bipuŋ gati m, o pu nar ne o na doli ma. 38 Li ane ala men tis on mekama pu nok o dapuudir zee n doli ma. 39 Ka on mekama guri o nyovur, na ko'oŋi li. Amaa one basi o nyovur mam dolim zug, na nyee li. 40 “On mekama di'e ya, o di'ene man. Ka on mekama di'e man, o di'ene one tum man na la. 41 Ka on mekama di'e Wina'am nodi'es on a Wina'am nodi'es la zug, o na di'e nyood wenne Wina'am nodi'es la ne. Ka on mekama di'e popielim sob, on a popielim sob la zug, o na di'e nyood wenne popielim sob la ne. 42 Ka on mekama kulum nok ku'om ma'asig n tisi m nya'andolbibis nwa yinni, on aa m nya'andol la zug, m yeti ya asida ye, o na di'e o nyood.”
