MATEO 1

1Ne'eŋa a Yesu one a David yaaŋ, ka a Abraham yaaŋ la yaanam yela. 2Abraham du'a Isaak. Ka Isaak du'a Jakob. Ka Jakob du'a Juda, ne o bieya ne o pitib. 3Ka Juda du'a Perez ne Zera, ka ba ma yu'ur a Tama. Ka Perez du'a Heziron. Ka Heziron du'a Ram. 4Ka Ram du'a Aminadab. Ka Aminadab du'a Nason. Ka Nason du'a Salmon. 5Ka Salmon du'a Boaz, ka Rahab aa o ma. Ka Boaz du'a Obed ka Ruf aa o ma. Ka Obed du'a Jese. 6Ka Jese du'a na'ab David. Ka David du'a Solomon. O ma da ane Uria po'a. 7Ka Solomon du'a Rehoboam. Ka Rehoboam du'a Abija. Ka Abija du'a Asa. 8Ka Asa du'a Jehosafat. Ka Jehosafat du'a Joram. Ka Joram du'a Uzia. 9Ka Uzia du'a Jotam. Ka Jotam du'a Ahaz. Ka Ahaz du'a Hezekia. 10Ka Hezekia du'a Manase. Ka Manase du'a Amos. Ka Amos du'a Josia. 11Ka Josia du'a Jekonia ne bisieba. Saŋkan la ka ba gban'e Israel dim n more ba keŋ Babilon la. 12Ka ban keŋ Babilon la, li nya'aŋ, ka Jekonia du'a Sealtiel. Ka Sealtiel du'a Zerubabel. 13Ka Zerubabel du'a Abiud. Ka Abiud du'a Eliakim. Ka Eliakim du'a Azor. 14Ka Azor du'a Zadok. Ka Zadok du'a Akim. Ka Akim du'a Eliud. 15Ka Eliud du'a Eleazar. Ka Eleazar du'a Matan. Ka Matan du'a Jakob. 16Ka Jakob du'a Josef, Meeri sid, one da a Yesu on ka ba buon Kiristo la ma. 17Ne'eŋa pa'al ye Abraham n ti paae David ane yaanam kon'ob kon'ob piinanaasi. Ka David n ti paae saŋkan ka ba more Israel dim keŋ Babilon la ane yaanam kon'ob kon'ob piinanaasi. Ka saŋkan ka ba more ba keŋ Babilon la n ti paae Kiristo la da ane yaanam kon'ob kon'ob piinanaasi. 18Yesu Kiristo du'am daa ane nwa. O ma Meeri daa ane Josef po'a'eliŋ. Ka Josef daa nan pu baŋ o la, ba nye ka o mor ne poog lin a Wina'am Siig Suŋ la din. 19Ka o sid Josef ane dau kane a sida sob, ka pu bood ye o diis Meeri nyan nidibinee, ka gban'e o poten'erin ye o su'a bas Meeri. 20Ka on daa ten'esid yelbama o suunrin la, ka Zugsob malek kenn o sa'an na zaansuŋin. Ka malek la yel o ye, “Josef, David yaaŋa, da ke ka dabiem kpen' uf ne fun na di'e Meeri ka o niŋ fu po'a, bozugo biig kan poog ka o mor la, ane Wina'am Siig Suŋ la din. 21Ka o na du'a biribiŋ. Ka fu na pud o yu'ur ye Yesu, bozugo o na faaenn o nidib ba tuumbe'edin.” 22Yelbama wusa daa niŋ ne ye Zugsob la da ke ka o nodi'esidib la yel si'el la niŋ ameŋa ye, 23“Gosima, po'asadir kane zi' dau la, na tuk poog n du'a biribiŋ, ka ba na pud o yu'ur Emanuel, lin gbin ane ye, Wina'am be ne ti.” 24Ka Josef nie gbeemin n niŋ wuu Zugsob malek la yel o si'em la, ka pi'e o po'a kul. 25Amaa o daa pu baŋ oo, hale ka o ti du'a biribiŋ la. Ka o pud biig la yu'ur Yesu.

will be added

X\